Santiago 5

Rïcukunata piñapanqan

1¡Rïcukuna, wiyayämay! ¡Día del juiciuchömi alläpa ñakayanki! ¡Tsaymi qayaraykachar waqayanki! 2Imayka qoriyanqaykipis ismurmi ushakanqa. Llatapaykikunatapis puyum ushanqa. 3Qorikikuna y qellaynikikunapis manam välinqatsu. Ultimu tiempuchöna kaykarpis riquëzakunata kikillaykikunapaqmi qoriyanki. Tsaymi día del juiciuchö tsay qoriyanqayki riquëzaykikuna ayrajashqa kayanqaykipita acusayäshunki. Salvayäshunqaykipa rantinmi ninanö rupar ushayäshunki.#Mat. 6.19.

4Mana pägar arutsiyanqaykipitam aruqnikikuna Dios Yayata quëjakuykäyan. Paykuna quëjakuyanqantam llapanta mandaq Dios Yaya wiyashqa.#Deut. 24.14-15. 5Qellayniki kaptinmi kay patsachö munayanqaykita rurar kawaykäyanki. Tsaynö kawarmi pishtanapaq werayätsishqa wätanö kaykäyanki. 6Qamkunaqa defendikuyta mana puëdiq jutsannaq runakunatam wañutsiyashkanki.

Jesucristuta mana ajayaypa shuyänapaq ninqan

7Wawqikuna y panikuna, Señor Jesucristo kutimunqanyaq mana ajayaypa shuyäyay. Chakra aruqkunapis murupakuyänanpaq tamyataran shuyäyan. Mikuyninkunata qoriyänanpaqpis usyataran shuyäyan. 8Tsaynölla qamkunapis firmi creyikur mana ajayaypa Señor Jesucristuta shuyäyay. Pay kutimunanpaq ichikllanam faltan.

9Wawqikuna y panikuna, ama musyapänakuyaytsu. Musyapänakuyanqaykipitam Jesucristo kutimur juzgayäshunki. Runakunata juzgananpaq cercachönam.

10Wawqikuna y panikuna, yarpäyay Dios Yayapa shutinchö willakuq profëtakuna imanö kawayanqanta. Paykunam imaykata sufrirpis mana ajayaypa Dios Yaya munanqannö kawakuyarqan. Tsaynölla qamkunapis kawakuyay. 11Musyantsikmi imaykata sufrirpis mana ajayaypa Dios Yaya munanqannö kawaqkunata pay yanapanqanta.#Job 42.10-17. Tsaynöllash Jobqa alläpa sufrirpis Dios Yayaman mana ajayaypa creyikunaq.#Job 1.20-22; 2.7-10. Tsaynö creyikuptinshi Dios Yaya kuyapäkuq y llakipäkuq kayninwan bendicionninta churanaq.#Sal. 103.8; 111.4.

12Kuyashqa wawqikuna y panikuna, imata änirpis ama jurayankitsu ciëluchö kaqkunapa shutinchö ni kay patsachö kaqkunapa shutinchöpis. Ama ni imapa shutinchöpis jurayankitsu. Tsaypa rantinqa cumpliyänaykipaq kaptin äniyanki y mana cumpliyänaykipaq kaptinqa ama äniyankitsu. Tsaynö kawayaptikiqa manam Dios Yaya castigayäshunkitsu.#Mat. 5.34-37.

Dios Yayata mañakunapaq ninqan

13Llakishqa karqa Dios Yayata mañakuyay. Kushishqa karpis Dios Yayata agradëcikur alabayay. 14Mayqaykipis qeshyarqa mayor wawqikunata qayatsiyanki Dios Yayata mañakuyänanpaq. Paykunam Jesucristupa shutinchö aceitita umaykiman wiñar kutikäyänaykipaq Dios Yayata mañakuyanqa.#Mar. 6.13; Luc. 10.34. 15Llapan shonqunkunawan creyikur mañakuyaptinmi Dios Yaya kutikätsiyäshunki. Jutsata rurashqa kayaptikipis perdonayäshunkim. 16Tsaymi jutsata rurashqa karqa creyikuq majikita willar confesakuyay. Tsaynölla jukniki juknikipaqpis Dios Yayata mañakuyay. Tsaynöpam qeshyayanqaykipita kutikäyanki. Dios Yaya munanqannö kawakuq runa mañakunqantam Dios Yaya wiyan.

17Profëta Elías mañakunqantapis Dios Yaya wiyanaqshi. Noqantsiknö runalla kaykarpis mana tamyananpaq llapan shonqunwan mañakuptinshi kimsa wata y soqta killa tamyanaqtsu.#1Rey. 17.1; 18.1; Luc. 4.25. 18Tsaypita yapay tamyananpaq mañakuptinnash tamyamunaq.#1Rey. 18.42-45. Tsayshi murupakuyanqanpis wayunaq.

19Wawqikuna y panikuna, mayqaykipis jutsaman ishkiyaptiki pipis tantiyatsiyäshurnikim 20wañuypita salvashunki.#5.20 Wañuypita salvashunki ninanqa infiernuman mana jitarpushqa kayänaykipaq kaqtam nikan. Tsaynöpam jutsata rurashqa karpis perdonashqa kayanki.#Prov. 10.12; 1Ped. 4.8.

Currently Selected:

Santiago 5: qxn

Highlight

Copy

Compare