Popular Bible Verses from 1 Pedro 1

Share

¡Señornintsik Jesucristupa Taytan Dios Yaya alabashqa kaykullätsun! Llakipäkuq kayninwanmi yapay yurishqanö kanapaq mushuq kawayta qaramashkantsik. Jesucristo wañuskir kawamunqanpitam musyantsik noqantsikpis kawaskamur gloriaman chänapaq kanqanta. Gloriaman chaykurmi Dios Yaya shuyätsimanqantsik herenciata chaskishun. Tsay herenciaqa manam imaypis qarwatanqatsu, ismunqatsu ni illakanqatsu.

Tsayta musyarmi kay patsachö kawayanqaykiyaq imaykata ñakarpis kushishqa kawaykäyanki. Qorita tsullutsirraq püru kanqanta musyanqantsiknömi qamkunapis pruëbakunawanraq musyayanki Dios Yayaman rasunpa confiakuyanqaykita. Creyikuynikikunaqa qoripitapis masmi välin. Tsaymi alläpa sufrirpis Dios Yayaman confiakuyaptikiqa Jesucristo kay patsaman kutimur aläbayäshunki, alli rikäyäshunki y alliman churayäshunki.

Tsaypa rantinqa akramaqnintsik Dios Yaya santu kanqannölla qamkunapis santu kayay. Dios Yayapa palabranmi nin: <<Noqaqa santum kä. Qamkunapis santu kayay>>.

Dios Yayapa wamranna kaykarqa payta cäsur munanqannö kawakuyay. Jesucristuta manaraq chaskir kawayanqaykinöqa ama kawayaytsu.

Tsaynö kaykaptinqa shumaq tantiyakur Dios Yaya munanqannö kawakuyay. Jesucristo kutimur Dios Yayapa puntanman qorimänapaq kanqanta ama qonqayaytsu.

<<Llapan runakunapis qewanö ushakaqllam. Poderyuq kayninpis waytanö shushuqllam. Qewapis tsakinmi y waytapis shushunmi. Peru Dios Yayapa palabranmi sïqa imayyaqpis kaykanqa>>. Tsay palabratam Jesucristupa willakuqninkuna willayäshushkanki.