KULAVA 35
35
Uswana wavaLevi
1Jino Yehova ahanjikile kuli Mose kuvyana vyaMowave kuYotau kuYeliko ngwenyi,
2Valweze vana vaIsalele vakaVahane vaLevi membo akutwama akuuswana waluheto lwavo, navipapa nawa kumembo aze jingulwixi mukavihana kuli vaLevi.
3Vakahetenga membo kana mangana vakatwamengamo, kaha vipapa vyakuhatako vikapwenga vyavimuna javo, vyaluheto lwavo, vyatunyama twavo vosena.
4Vipapa vyakumembo aze, vize namukavahana vaLevi, vikapwe vyakufuma kukembwe yalimbo nakuheta kulikombakaji lyajikuvite kwosena jingulwixi.
5Mukeseka kusali yalimbo jikuvite makombakaji avali kumutamba wamusamuko, najikuvite makombakaji avali kuluhaci lwakusulo, najikuvite makombakaji avali kumutamba wamulauko, najikuvite makombakaji avali kuluhaci lwanote, nalimbo lyakutwama mukaci. Evi vikiko vikapwe vipapa vyavo vyakumembo aze.
6Membo aze namukavahana vaLevi akapwe #Yoxu. 20.7-9.membo akuswama aze atanu nalimwe, aze namukahana mangana wexowo mwakajiha mutu akacinyineko. Kaha mukawezako nawa membo makumi awana namembo avali.
7Membo osenaze namukavahana vaLevi akapwe membo makumi awana namembo atanu naatatu, membo aze navipapa vyawo.
8Kaha membo aze namukahana akutambula kuluheto lwavana vaIsalele, kuli ava vanavulu mukatambulako amavulu, kuli ava vanakehe mukatambulako amandende. Mutu himutu akahane membo enyi kuli vaLevi nge kutesa nauswana wenyi uze mwakaswana.
Membo akuswama
(Luxi. 19.1-13)
9Yehova ahanjikile kuli Mose, amwambile ngwenyi,
10Hanjika kuli vana vaIsalele uvambulile ngwove, Enu hakuzauka Yotau nakuheta mulifuci lyaKanane,
11kalitongwelenu membo kupwa membo akuswama, mangana Wexowo mwakajiha mutu hamutamu akacinyineko.
12Membo kana akapwe akuswama muka-kutenda kuli enu, mangana wexowo mwakajiha mutu akazeneke kufwa, kuvanga mwakemana kumeso alizavu vakamusopese.
13Membo aze namukahana akapwe membo akuswama atanu nalimwe kuli enu.
14Kahanenu membo atatu musali yaYotau, namembo atatu mulifuci lyaKanane. Akapwe membo akuswama.
15Membo aze atanu nalimwe akapwe hali vana vaIsalele nahali vangeji nahali vaka-kuzuzumana muli vakivo, mangana vakaswamemo, mangana wexowo mwakajiha mutu hamutamu akacinyineko.
16Oloze kaci nge amuvetanga na cuma cafwelu, nge mutu himwafwa, kaha ikiye muka-kujiha mutu. Muka-kujiha mutu vakamujihe cakumujiha.
17Kaci nge amuvetanga nalilolwa Nakukwata mulivoko vanahase kujihisa mutu, nge mutu himwafwa, kaha ikiye muka-kujiha mutu. Mukakujiha mutu vakamujihe cakumujiha.
18Mokomoko, kaci nge amuvetanga nacuma camutondo cakukwata mulivoko vanahase kujihisa mutu, nge mutu himwafwa, kaha ikiye muka-kujiha mutu. Muka-kujiha mutu vakamujihe cakumujiha.
19Ivene muka-kutenda manyinga akamujihe muka-kujiha mutu. Omu mwakamuwana akamujihe.
20Kaci nge amuxinjilanga hakumuhunga, mokomoko kaci nge amwasanga hakumuswaminyina, ngoco himwafwa,
21mokomoko kaci nge amuvetanga nalivoko nakole, ngoco mutu himwafwa, kaha ou amuvetanga vakamujihe cakumujiha. Ikiye muka-kujiha mutu. Omu navakamuwana kuli muka-kutenda manyinga, akamujihe uze muka-kujiha mutu.
22Oloze kaci nge amuxinjikanga cakukasumuka cakuzeneka kole, mokomoko kaci nge amwasanga cuma cimwe cakuzeneka kumuswaminyina,
23cipwe nalilolwa mwahasa kufwa mutu, cakuzeneka kumumona, kaci nge amwasangalyo ngoco mutu himwafwa, kaci nge kapwile muka-kole wenyiko, kasakile kumupihisako,
24kaha vaka-lizavu vakasopese uze navete namuka-kutenda manyinga, nge mwaya mazu akuyulawa.
25Uze najihi mutu vaka-lizavu vakamupululule mulivoko lyamukakutenda manyinga. Kaha vaka-lizavu vakamuhilwise kwimbo lyenyi lyakuswama, kuze acinyinanga. Akatwamengako palanga nakukufwa cakapilixitu wakulitulaho, ou vawavixile maji ajila.
26Oloze uze najihi mutu, kaci nge hamwe mwakazomboka ngiza yalimbo lyenyi lyakuswama, kuze mwacinyina,
27nge muka-kutenda manyinga himwamuwana kusali yangiza yalimbo lyenyi lyakuswama, kaci nge mukakutenda manyinga himwamujiha uze ajihile mutu, kexi kukapwa namulonga wamanyingako.
28Mwomwo kaci asalanga kwimbo lyenyi lyakuswama palanga nakukufwa cakapilixitu wakulitulaho, xikaho. Oloze omu mwakalinga kapilixitu wakulitulaho hanafu lyehi, numba uze ajihile mutu akakinduluke kulifuci lyaluheto lwenyi.
Luximbi lwakuvuluka vinjiho najindando jakusokola vatu
29Vyumevi vikapwe cilika caciyulo kuli enu mukusemunwina cenu cosena kwosena munatwame.
30Wose mwakajiha mutu himutu, uze najihi mutu vakamujihe haunjiho wavinjiho. Oloze Cinjiho umwe kaha kanda akambulula unjiho wakupayisa mutu numba afweko.
31Kaha nawa, kanda mukatambula ndando yakusokola mwono wamutu uze najihi mutu, uze ali namulonga wakufwilako. Vakamujihe cakumujiha.
32Kanda mukatambula ndando yakumusokola uze nacinyina kwimbo lyenyi lyakuswama numbeze ceka nakutwama mulifuciko, kuvanga hakufwa cakapilixitu.
33Ngoco kanda mukajilulula lifuci munatwameko. Mwomwo manyinga, akiko eji kujilululanga lifuci. Kaha lifuci kavahasa kulikukila manyingaze vanamwangemo, #Kupu. 9.6.xina kuvanga namanyinga ayauze awamwangile.
34Kanda mukajilulula lifuci munatwame, omu ngwatwamAmi. Mwomwo Ami Yehova ngunatwame mukaci kavana vaIsalele.
Currently Selected:
KULAVA 35: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
