KULAVA 34
34
1Yehova ahanjikile kuli Mose ngwenyi,
2Valweze vana vaIsalele uvambulile ngwove, Enu hakwingila mulifuci j lyaKanane (eli likiko lifuci lize nalikapwa uswana wenu, lifuci lyaKanane mwahita ngiza yalyo),
3kaha lifuci lyenu lyakusulo likapwe kufumisa kupambo Jine nakuhita kuluhaci lwaEtome. Ngiza yenu yakusulo yikafume kusongo yaCijiva caMungwa yikatwale kumusamuko.
4Ngiza yenu yikalumuke yikatwale kusulo, kumukandu wakuAkalavime kunote, yikahete kuJine. Kaha kulovoka cayo cikapwe kusulo, kuKatexe-mbalaneya kunote, nakulovoka kuHazale-atale nakuhita kuAzamona.
5Ngoco ngiza yikalumuke kufuma kuAzamone yikahete kukalwiji waEjipitu, kaha kulovoka cayo cikapwe kukalungalwiji.
6Jino ngiza yenu yakumulauko yikapwenga kukalungalwiji wamunene nangenge yenyi, ikiye Ukapwenga ngiza yenu yakumulauko.
7Eyi yikiko yikapwenga ngiza yenu yakunote. Kufumisa kukalungalwiji wamunene mukalifunjikila nakupili Hole.
8Kufumisa kupili Hole mukalifunjikila nakuze kwakwingilila kuHamate. Kulovoka cangiza cikapwe kuZetate.
9Ngiza yikalovoke kuJifwilone, kaha kulovoka cayo cikapwe kuHazale-enane. Eyi yikapwenga ngiza yenu yakunote.
10Ngiza yenu yakumusamuko mukayifunjika kufuma kuHazale-enane nakuheta kuXefwame.
11Ngiza yikafume kuXefwame yikaxikumuke kuLivila, kutala kumusamuko, kuAine kumulauko. Ngiza yikaxikumuke yikahete kusongo yacijiva caKinelete kutala kumusamuko.
12Ngiza yikaxikumuke kuYotau, kaha kulovoka cayo cikapwe kucijiva caMungwa. Eli likapwenga lifuci lyenu nge mwaya jingiza jalyo jingulwixi ndo.
13Jino Mose avalwezele vana va Isalele ngwenyi, Eli likiko linapu lifuci lize namukaswana hakusakula natutacikijiio, lize alwezele Yehova kuhana kumiyaci yitanu nayiwana nacimbwa camuyaci,
14mwomwo muyaci wavana va Luvene mwaya jitanga javakakuluka javo, namuyaci wavana vaNgate mwaya jitanga javakakuluka javo, vakivo vanatambula lyehi uswana wavo, nacimbwa camuyaci waManase nawa vanatambula lyehi uswana wavo.
15Miyaceyi yivali nacimbwa camuyaci vanatambula lyehi uswana wavo musali yaYotau kuYeliko kumutamba wamusamuko kutala kumwizakumbi.
16Jino Yehova ahanjikile kuli Mose amwambile ngwenyi,
17Awa akiko majina amalunga vaze navakamipangila lifuci kupwa uswana wenu, ou kapilixitu Eleyaza, ou Yoxuwa mwanaNune.
18Kaha mukasakula muka-kulitulaho umwe kumuyaci, muka-kulitulaho umwe kumuyaci, mangana vakapange lifuci kupwa uswana wenu.
19Awa akiko majina amalunga kana. Ou wakumuyaci waYuta ikiye Kaleve mwanaYefune.
20Ou wakumuyaci wavana vaXimeyone ikiye Xemwele mwanaAmihute.
21Ou wakumuyaci waMbenjamine ikiye Elitate mwanaKixilone.
22Ou wakumuyaci wavana vaNdane, muka-kulitulaho, Mbuki mwanaYongoli.
23Ava vahali vana vaYosefwe, ou wakumuyaci wavana vaManase, muka-kulitulaho, Hanyele mwanaEfwote.
24Ou wakumuyaci wavana vaEfwalime, muka-kulitulaho, Kemwele mwanaXifwatane.
25Ou wakumuyaci wavana vaZevulune, muka-kulitulaho, Elizafwane mwanaPalanake.
26Ou wakumuyaci wavana vaIsakale, muka-kulitulaho, Palacele mwanaAzane.
27Ou wakumuyaci wavana vaAxele, muka-kulitulaho, Ahihute mwanaXelomi.
28Ou wakumuyaci wavana vaNafwatale, muka-kulitulaho, Petahele mwanaAmihute.
29Ava vakivo vaze alwezele Yehova kupangila uswana kuli vana vaIsalele mulifuci lyaKanane.
Currently Selected:
KULAVA 34: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
