KULAVA 32
32
VaLuvene navaNgate nacimbwa camuyaci wavaManase navatwama kwavo musali yaYotau akumusamuko
(Luxi. 3.12-22)
1Jino vana vaLuvene navana vaNgate vapwile navimuna vavavulu cikumakuma. Kahomu vamwene lifuci lyaYazele nalifuci Ngileyate, kutalako kukiko kuma kwavimuna,
2vana vaNgate navana vaLuvene vejile nakuhanjika kuli Mose nakuli kapilixitu Eleyaza nakuli vaka-kulitulaho jalizavu ngwavo,
3Atalote naNjivone naYazele naNyimila na Hexevone naEleyale naSevame naNevo naMbeyone,
4lifuci lize avetele Yehova kumeso alizavu lyavaIsalele, likiko lifuci lyavimuna, kahetu vangamba jove tuli navimuna.
5Kaha vamwambile ngwavo, Nge tunawane likoji kumeso ove, vatuhanetu vangamba jove lifuci eli kupwa luheto lwetu. Kanda ukatuzawisa Yotauko.
6Mose ambile kuli vana vaNgate nakuli vana vaLuvene ngwenyi, Vandumbwenu vakaye kujita kahenu mutwamenga kuno numba?
7Ikaze namutangwila micima yavana vaIsalele kucina navazauka nakuheta mulifuci lize navahane Yehova?
8Mukiko vene #13.3, 26.muvalingilile masenu omu ngwavatumine vakatuke kuKatexe-mbalaneya vakatale lifuci.
9Mwomwo hakukanduka kucinema caExekole nakumona lifuci, vatangwile micima yavana vaIsalele, mangana vakane kwingila mulifuci kana avahanyine Yehova.
10Kaha Yehova akwacile utenu halikumbi lize, alixingile ngwenyi,
11 #
14.28-30. Camwenemwene, hali malungava vanalovoka muEjipitu, kufumisa kuli ava vamyaka makumi avali nakusambula, cipwe umwe kexi kukamona lifuci lize ngwalixingilile kuli Apalahama nakuli Isaka nakuli Yakovako, mwomwo kavangukavile namicima yavo yosenako, xikaho.
12Xina Kaleve kaha mwanaYefune kaKenaze, naYoxuwa mwanaNune, mwomwo vanakave Yehova namicima yavo yosena, xikaho.
13Kaha #14.33-35.Yehova akwacile utenu hali vaIsalele, avakimbwojokeselenga mupambo myaka makumi awana, palanga nomu valalile vaka-cisemunwino cize vosena vaze valingile mwamupi kumeso aYehova.
14Kaha kumana, enu munakatuka nakuxisa muli masenu, mumbuto yamalunga vaka-xili, mangana muhakileko ceka kuliyena lyautenu waYehova hali vaIsalele.
15Mwomwo nge namwalumuka nakuseza kumukava, mwavaseza ceka mupambo, kaha namunongesa vatu ava vosena.
16Kaha vapandamine kuli ikiye, vamwambile ngwavo, Natutunga malimba avimuna jetu kuno, namembo akutwama vana vetu vavandende.
17Oloze etu vavene natupwa twavwala lyehi vitwa vyetu nakuvatwaminyina vana vaIsalele, palanga nomu natukalinga hitunavahetesa lyehi kwavo. Kaha vana vetu vavandende navatwamanga kumembo kana ali najikembwe, kucina vatu vakutwama mulifuci.
18Katwexi kukakinduluka ceka kujizuvo jetuko, kuvangomu navakalinga vana vaIsalele hivanaswane lyehi mutu himutu uswana wenyi.
19Mwomwo katwexi kukaswana navo musali yaYotau nakutwala kulutweko, mwomwo uswana wetu tunauwane lyehi musali yaYotau muno kumutamba wamusamuko, xikaho.
20Mose avambile ngwenyi, Kaci nge namulinga ngoco, nge namuvwala vitwa vyenu muyenga kujita kumeso aYehova,
21nge vakwenu malunga vosenava vanavwale vitwa navazauka Yotau kumeso aYehova palanga nomu mwakalinga hanahange lyehi vakakole jenyi kumeso enyi,
22nomu navakalinga hivanafungulula lyehi lifuci lyosena kumeso aYehova, numba mukakinduluke, nakupwa mwazeneka cuma cakumipayixila kumeso aYehova nakumeso avaIsalele, kaha lifuci lino nalikapwanga luheto lwenu kumeso aYehova.
23Oloze nge namukana kulinga ngoco, talenu, munamuvulumuna Yehova, kaha tacikizenu, mulonga wenu naukamiwana.
24Litungilenu membo akutwama vana venu vavandende, namalimba avimuna jenu vavandende. Lingenu nganomu munahanjika natunwa twenu.
25Kaha vana vaNgate navana vaLuvene Vambile kuli Mose ngwavo, Etu vangamba jove natulinga nganomu unatulweze ove mwata wetu.
26Vana vetu vavandende namapwevo jetu namautangetu navimuna jetu vosena navatwamanga kuze kumembo akuNgileyate.
27Oloze etu vangamba jove, malunga vosenava vanavwale vitwa vyajita, natuzauka kumeso aYehova nakuya kujita, nganomu unambe ove mwata wetu.
28Ngoco Mose ahanyine luximbi lwakuvavuluka kuli kapilixitu Eleyaza nakuli Yoxuwa mwanaNune nakuli vamyata jajitanga javakakuluka jamiyaci yavana vaIsalele.
29Mose avambile ngwenyi, Kaci nge vana vaNgate navana vaLuvene navakazauka Yotau nayenu, malunga vakuvwala vitwa vyavo vosena, nakuya kujita kumeso aYehova, nge navakafungulula lifuci kumeso enu, numba mukavahane lifuci Ngileyate kupwa luheto lwavo.
30Oloze nge navakakana kuzauka kumeso enu nakuvwala vitwa vyavo, vakatwamenga naluheto lwavo mukaci kenu mulifuci lyaKanane.
31Kaha vana vaNgate navana vaLuvene vamukumbulwile ngwavo, Mwanambe Yehova kuli etu vangamba jove, mukiko vene munatulingila.
32Natuzauka tunavwale lyehi vitwa vyetu kumeso aYehova nakuheta mulifuci lyaKanane, kaha luheto lwauswana wetu natutwamanga nalwo musali yaYotau muno.
33Kaha vana vaNgate navana vaLuvene nacimbwa camuyaci waManase mwanaYosefwe Mose avahanyine wangana waXihone mwangana wavaAmole, nawangana waOnge mwangana waMbaxane, lifuci lize nge omu ahicile membo alyo najingiza jawo, membo alifuci lize jingulwixi.
34Ngoco vana vaNgate vatungile Njivone naAtalote naAlowele
35naAtalote-xofwane naYazele naYongoveha
36naMbete-nyimila na Mbete-halane, akiko apwile membo akujingulwisa najikembwe, namalimba avimuna vavandende nawa.
37Vana vaLuvene vatungile Hexevone na Eleyale naKilyate-aime
38naNevo naMbale-meyone (nakuwaluka majineka), naXivima. Oloze membo aze vatungile vawalukile majineka.
39Vana vaMakile mwanaManase vayile kuNgileyate, vatambwileko, vahangile vaAmole vaze vapwileko.
40Mose ahanyine Ngileyate kuli Makile mwanaManase, kaha atwaminenga kuze.
41Yaile mwanaManase ayileko, atambwile membo aze apwileko, awalukile ngwenyi, #32.41:Nge ngwenyi, Membo aYaile.Havote-yaile.
42Nova nawa ayileko, atambwile Kenate namembo apwileko, alukileko ngwenyi, Nova, halijina lyenyi.
Currently Selected:
KULAVA 32: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
