KULAVA 23
23
1Mbalame ambile kuli Mbalaka ngwenyi, Ngutungile majiko akulumbila atanu naavali kuno, ngulongesele vangombe vavikuji vatanu navavali namikoko vavizamba vatanu navavali kuno.
2Mbalaka alingile nganomu ahanjikile Mbalame. Kaha Mbalaka naMbalame valumbile ngombe wacikuji namukoko wacizamba halijiko halijiko.
3Mbalame ambile kuli Mbalaka ngwenyi, Imana kwakamwihi nawana wove wakulumba, kaha nangusosoloka. Kwiji, pamo Yehova mweza nakunguwana. Mwose mwangumwenesa, mukiko munangukulweza. Kaha ayile kupili yakapelupelu.
4Jino Kalunga awanyine Mbalame, kaha Mbalame amwambile ngwenyi, Majiko akulumbila atanu naavali ngunawalongesa lyehi, ngunalumbila ngombe wacikuji namukoko wacizamba halijiko halijiko.
5Yehova ahakile mazu mukanwa kaMbalame, amwambile ngwenyi, Kinduluka kuli Mbalaka, uhanjike ngana.
6Akindulukile kuli ikiye, kaha tala, apwile nakwimana kwakamwihi nawana wenyi wakulumba, ikiye navaka-kulitulaho javaMowave vosena hamwe.
7Atele ciximo cenyi ngwenyi,
Mbalaka nangunehe kungufumisa kuAlame,
Mwangana wavaMowave nangufumisa kujipili jakumusamuko,
Ngwenyi, Twaya, ukangwangwile Yakova,
Ngwenyi, Twaya, ukatenukile Isalele.
8Ou nakane Kalunga kutenukila, ami ngumutenukile ngacilihi?
Ou nakane Yehova kwinyisa, ami ngumwinyise ngacilihi?
9Mwomwo hano nguli helu lyamalolwa ngunamumono,
Hano hajipili ngunamutale.
Tala, ava vakivo vatu vakuliwamina kwauka wavo,
Kavexi kukavalavila navakamafuci eka hamweko.
10Iyaze mwahasa kulava lukungu lwaYakova,
Cipwe kwambulula kuvula calizavu limwe lyakusokesa mumazavu avaIsalele awana?
Mwono wami ukafwe nge omu veji kufwanga vaka-kusungama,
Kaha kukumisa cami cikapwe nge cenyi!
11Mbalaka ambile kuli Mbalame ngwenyi, Unangulingi ngacilihi? Ngunakusanyika mangana wangule vaka-kole jami, kaha kumana, unavakisula cakuvakisula.
12Amukumbulwile amwambile ngwenyi, Oco mwahaka Yehova mukanwa kami, cikiko vene ngucilame nakucihanjika, nyi?
13Mbalaka amwambile ngwenyi, Twaya mwane nayami, tuyenga kumwe kweka, kuze naukavamona, naukamonava vakusongosongo kaha, kawexi kuvamona vosenako. Ukangwangwililavo kuze.
14Ayile nenyi kulifuci lyaZofwime, kwilu lyaPixinga. Atungile majiko akulumbila atanu naavali, alumbile ngombe wacikuji namukoko wacizamba halijiko halijiko.
15Kaha ambile kuli Mbalaka ngwenyi, Imana kuno kwakamwihi nawana wove wakulumba, omu nanguya nakuliwana naYehova kuze.
16Yehova awanyine Mbalame, ahakile mazu mukanwa kenyi, amwambile ngwenyi, Kinduluka kuli Mbalaka, uhanjike ngana.
17Ahetele kuli ikiye, kaha tala, apwile nakwimana kwakamwihi nawana wenyi wakulumba, navakakulitulaho javaMowave hamwe. Mbalaka amwihwile ngwenyi, Yehova nahanjika ngwenyika?
18Atele ciximo cenyi ngwenyi,
Ove Mbalaka, katuka wivwilile,
Ove mwanaJipole, tengeleka matwitwi ove kuli ami.
19 #
Loma 11.29; Citu. 1.2; Hepe. 6.18; Yako. 1.17. Kalunga kexi mutuko numba onge,
Kexi mwanamutuko numba alumuke.
Ikiye nambe, kaha azeneke kulingamo numba?
Mokomoko nahanjika, kaha azeneke kucisolola numba?
20Tala, nangulweze ngwenyi, Vakisule.
Navakisula, kaha kangwexi kuhasa kucalumunako.
21 #
Samu 32.2, 5; 85.2. Kamwene kuhenga muli Yakovako,
Kamwene kuhingika muli Isaleleko.
Yehova Kalunga kenyi ali nenyi hamwe,
Kaha kulikuwa camwangana cili mukaci kavo.
22Kalunga Ikiye navalovola muEjipitu.
Ali nangolo nge ojo japakasa.
23Camwenemwene, kakwexi kupanda kuli Yakovako,
Kakwexi kutaha kuli Isaleleko.
Oholili navamba hali Yakova, hali Isalele, ngwavo,
Ovyuma nazate Kalunga!
24Tala, vatu ava navakatuka nge ndumba wacipwevo,
Mwalizundula nge ndumba.
Kexi kukautama cekako, xina kuvanga nali nyama yamukoka
Nakunwa manyinga avaze najihi.
25Mbalaka ambile kuli Mbalame ngwenyi, Nakuvangula kanda uvangulako, nakuvakisula kanda uvakisulako.
26Oloze Mbalame amukumbulwile ambile kuli Mbalaka ngwenyi, Ngwahanjikanga kuli ove nyi? ngwami, Mwose mwahanjika Yehova mukiko vene munangulinga.
27Mbalaka ambile kuli Mbalame ngwenyi, Twaya jino, nangukutwala kumwe kweka. Kwiji, pamo Kalunga mwakamona kuwaha ukangwangwililevo kuze.
28Mbalaka ayile naMbalame kwilu lyaPeyole, kuze kwakutala kumavu kulikundu.
29Mbalame ambile kuli Mbalaka ngwenyi, Ngutungile majiko akulumbila atanu naavali kuno, ngulongesele vangombe vavikuji vatanu navavali namikoko vavizamba vatanu navavali kuno.
30Mbalaka alingile nge omu ambile Mbalame, alumbile ngombe wacikuji namukoko wacizamba halijiko halijiko.
Currently Selected:
KULAVA 23: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
