KULAVA 22
22
Mbalaka mwatuma nakusaka Mbalame
1Vana vaIsalele vakatukile, vatungile cilombo cavo kuvyana vyaMowave, musali yaYotau kuYeliko.
2Jino Mbalaka mwanaJipole amwene mwosenomu valingile vaIsalele kuli vaAmole.
3Mowave evwile woma cikuma wavaze vatu, mwomwo vapwile vavavulu, kaha Mowave alinyengele mwomwo vana vaIsalele.
4Ngoco Mowave ambile kuli vakulwane javaMicane ngwenyi, Makumbi ano vaka-liwukeli navakambula vyuma vyosena vili kuli etu jingulwixi, nge omu eji kukambulanga ngombe mwila wamucipapa. Makumbi aze Mbalaka mwanajipole apwile mwangana wavaMowave.
5Atumine tunganda kuya kuli Mbalame mwanaMbeyole, kuPetole, kuze kwakamwihi naKalwiji, kulifuci lyavana vavausoko wenyi, nakumusanyika, ngwenyi, Tala, kunalovoka vatu mulifuci lyaEjipitu. Tala, vali kwilu lyamavu kwosena, kaha vanatwame kwakulitalasana nayami.
6Xikaho twaya mwane, ungwangwile vatu ava, mwomwo vananguhambakana ngolo. Kwiji, pamo nanguvahasa, mangana tuvavete, mangana nguvahange mulifuci. Mwomwo ngunatacikiza ngwami, Ou naukisula napu wakukisula vene, kahou nawangula napu wakwangula vene.
7Ngoco vakulwane javaMowave navakulwane javaMicane Vakatukile vanakwate lyehi mivwi yakutaha mumavoko avo. Vahetele kuli Mbalame, amwambulilile mazu aMbalaka.
8Avambile ngwenyi, Savalenu kuno ufuku uno, kaha nangumyambulila mwexomwo mwahanjika Yehova kuli ami. Ngoco vaka-kulitulaho javaMowave vatwamine kuli Mbalame.
9Kalunga ejile kuli Mbalame, amwihwile ngwenyi, Malungava vali kuli ove vakivo veya?
10Mbalame ambile kuli Kalunga ngwenyi, Mbalaka mwanajipole, mwangana wavaMowave navatumu kuli ami ngwenyi,
11Tala, ava vatu kana vanalovoka muEjipitu vali kwilu lyamavu kwosena. Ngwenyi, Twaya jino ungwangwilevo. Ngwenyi, Kwiji, pamo nanguhasa kulwa navo nakuvahanga.
12Kalunga ambile kuli Mbalame ngwenyi, Kanda uya navoko. Kanda ukangula vatu vazeko, mwomwo vanapu vakukisula, xikaho.
13Mbalame ahindukile nacimene, ambile kuli vaka-kulitulaho jaMbalaka ngwenyi, Yenunga kulifuci lyenu, mwomwo Yehova nakane kungwitavila kuya nenu.
14Vaka-kulitulaho javaMowave Vakatukile, vayile kuli Mbalaka, vamwambile ngwavo, Mbalame nakane kwiza nayetu.
15Ceka nawa Mbalaka atumine vaka-kulitulaho kuhambakana vaze kuvula naulemu.
16Vahetele kuli Mbalame, vamwambulilile ngwavo, Mbalaka mwanaJipole nambe ngwenyi, Cipwe cuma cimwe kanda cikakuhungula numba uzeneke kwiza kuli amiko.
17Mwomwo nangukulemesa naulemu wauvulu, kaha mwexomwo naukangwamba, mukiko munangukalinga. Xikaho twaya mwane, ungwangwile vatu ava.
18Mbalame avakumbulwile, ambile kuli vangamba jaMbalaka ngwenyi, Kaci nge Mbalaka mwakanguhana zuvo yenyi yato napalata naulu, Oloze kangwexi kuhasa kuzomboka lizu lyaYehova Kalunga kamiko, cipwe nakulinga cacindendeko, cipwe nakulinga cacivuluko.
19Xikaho, enu nawa, aci savalenu kuno ufuku uno, mangana ngutacikize omu mwahanjika ceka Yehova kuli ami.
20Kalunga ejile kuli Mbalame naufuku, amwambile ngwenyi, Kaci nge malungava vaneza nakukusanyika, katuka uyenga navo. Oloze lizu lize kaha nangukahanjika kuli ove, likiko vene ukalilinga.
Kangelo nacimbulu caMbalame
21Ngoco #Petu. 2, 2.15.Mbalame ahindukile nacimene, alemene cimbulu cenyi, ayile navaze vaka-kulitulaho javaMowave.
22Oloze Kalunga akwacile utenu mwomwo ayile. Kangelo kaYehova emanyine mujila nakumwimanyina. Jino Mbalame apwile nakutambuka hacimbulu cenyi navangamba jenyi vavali nawa apwile navo.
23Cimbulu amumwene kangelo kaYehova nemana mujila, napoko yenyi yamukwale yakusomona lyehi mulivoko lyenyi. Kaha cimbulu ateunukile mujila, ayile mucipapa. Mbalame amuvetele cimbulu amutalise ceka mujila.
24Kaha kangelo kaYehova auanyine mujila yakunekama mukaci kamawande amivyinyo, oku cipato camololwa oku cipato camalolwa.
25Cimbulu amumwene kangelo kaYehova, alixinjilile kucipato nakuxindakanyina lihinji lyaMbalame kucipato. Kaha amuvetele ceka.
26Kangelo kaYehova aswenyele ceka kulutwe, emanyine kwakundende, kakwapwile kwakuteunukila kucilyo cipwe kucimosweko.
27Cimbulu amwene kangelo kaYehova, kaha autamine naMbalame hanga namutwamina. Mbalame akwacile utenu, amuvetele cimbulu namukombo wenyi.
28 #
Petu. 2, 2.16. Yehova ajikwile kanwa kacimbulu, kahambile kuli Mbalame ngwenyi, Ngunakulingi ika, numba unguvete ngana katatu?
29Mbalame ambile kuli cimbulu ngwenyi, Mwomwo unanguhende, xikaho. Ngwami, ngwapwanga napoko yamukwale mulivoko lyami, kaci oholili ngunakujihi vene.
30Cimbulu ambile kuli Mbalame ngwenyi, Ami ngucimbulu cove nyi? unangutambukanga makumbi ove osena nakulikumbi lyalelo. Kulinga ngana ngwakulinga lyehi ngana numba? Ambile ngwenyi, Nduma.
31Hahaze vene Yehova atonesele Mbalame kumeso enyi, amwene kangelo kaYehova nemana mujila napoko yenyi yamukwale yakusomona lyehi mulivoko lyenyi. Kaha anongamine mutwe wenyi nakulimbila cameso-hamavu.
32Kangelo kaYehova amwambile ngwenyi, Ikaze unavetela cimbulu cove ngana katatu? Tala, ami ngunalovoka nakupwa ngumuka-kukwimanyina, mwomwo jila yove yinambilumuka kumeso ami, xikaho.
33Cimbulu angumonanga nakuteunuka ngana katatu kumeso ami. Kaci kanguteunukileko, kaci oholili ngunakujihi ove nakumulama ikiye wamutonyi.
34Mbalame ambile kuli kangelo kaYehova ngwenyi, Ngunavulumuna, mwomwo kangwatacikijileko ngwami, ove unemana mujila nakungwimanyina. Xikaho jino, kaci nge cinakwivwisa kupihya, kaha nangukinduluka ceka.
35Kangelo kaYehova ambile kuli Mbalame ngwenyi, Yakonga namalungava. Oloze lizu lize kaha nangukahanjika kuli ove, likiko vene ukalihanjika. Ngoco Mbalame ayile navaka-kulitulaho jaMbalaka.
36Jino Mbalaka hakwivwa ngwavo, Mbalame neza, alovokele nakumusesa kuLimbo lyaMowave, lize lili kungiza yaAlanone, kuze kusembwa yangiza.
37Mbalaka ambile kuli Mbalame ngwenyi, Ngwakusanyikile cakukusanyika nyi? Wakanyinyine ika kwiza kuli ami? Ngunahase vene kukulemesa nyi?
38Mbalame ambile kuli Mbalaka ngwenyi, Tala, nguneza lyehi kuli ove. Oloze nanguhasa vene kulihanjikila lizu limwe numba? Lizu kana mwahaka Kalunga mukanwa kami, likiko vene nangulihanjika.
39Mbalame ayile naMbalaka, vahetele kuKilyate-huzote.
40Kaha Mbalaka avatwile vangombe namikoko, atumine nyama kuli Mbalame nakuli vaka-kulitulaho vaze apwile navo.
Mbalame inwavakisula vaIsalele
41Kaha casolokele hacimene, Mbalaka ayile naMbalame, amukandwixile kumilundu #22.41:Tala 25.3.yaMbale yakunyunga. Hakwimana kuze amwene vatu vapwile kusongosongo yacilombo.
Currently Selected:
KULAVA 22: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
