KULAVA 21
21
VaKanane navavalovokela vaIsalele
1Jino kaKanane, mwangana waAlate, uze atwaminenga kusulo, evwile ngwavo, VaIsalele vali nakwiza mujila yaAtalime. Kaha alwile navaIsalele, akwacile vakwavo vamwe ufunge.
2Ngoco vaIsalele vaxikile Yehova luxiko, vamwambile ngwavo, Kaci nge nauhana vatu ava mumavoko etu, natunongesa membo avo ndolokoto.
3Yehova evwililile mumazu avaIsalele, ahanyine VaKanane mumavoko avo. Kaha vavanongesele namembo avo ndolokoto. Ngoco valukile kuze ngwavo, #21.3: Nge ngwavo, Kukunonga ndolokoto.KuHoloma.
Manoka vaka-kwoca
4Jino Vakatukile kupili Hole vayile mujila yakutwala kukalungalwiji Ucila, mangana vakondoloke lifuci lyavaEtome. Kaha vatu valwixile micima yavo hajila.
5Ngoco vatu vatatwokesele Kalunga naMose ngwavo, Munatulowela ika muEjipitu tufwile mupambo? Mwomwo kakwexi kulyako, kakwexi meyako, kaha myono yetu yinevu unyengwe wakulya cino cacipi.
6Ngoco Yehova atumine manoka vaka-kwoca muli vatu, kaha vasumine vatu. #Koli. 1, 10.9.Vatu yavaIsalele vavavulu vafwile.
7Vatu vejile kuli Mose, vamwambile ngwavo, Tunavulumuna, mwomwo tunatatwokesa Yehova nakukutatwokesove. Aci lombe kuli Yehova mangana atufumise manokava. Kaha Mose avalombelele vatu.
8Yehova ambile kuli Mose ngwenyi, Fula linoka muka-kwoca, umuhake kucitondo cacisuku. Kaha nacisoloka, Wexowo mwasumuwa, hakumumona mwayoya.
9 #
Yowa. 3.14, 15. Mose afulile linoka waunengu, amuhakile kucitondo cacisuku. Kaha casolokele, kaci nge linoka asumine mutu, omu atalile kulinoka waunengu ayoyele.
VaIsalele navavakondoloka vaMowave
10Vana vaIsalele vatambukile, vatungile cilombo cavo kuOvote.
11Vakatukile kuOvote, vatungile cilombo cavo kuIye-avalime, mupambo, kulutwe lwaMowave, kutala kumwizakumbi.
12Vakatukile kuze, vatungile cilombo cavo kucinema caZelete.
13Vakatukile kuze, vatungile cilombo cavo musali yaAlanone muze, mupambo, ou afuma kungiza yava Amole. Mwomwo Alanone napu ngiza yavaMowave, hakaci kavaMowave navaAmole.
14Xikaho vanambe hamukanda wajijita jaYehova ngwavo,
Vaheve kuSufwa,
Navinema vyaAlanone,
15Namungulunga wavinema Wakutala kwatwama Ale,
Wakukundamina hangiza yava Mowave.
16Kaha hakufuma kuze vayile kuMbele. Lize likiko lixima kana avulukile Yehova kuli Mose ngwenyi, Kungulula vatu, kaha nanguvahana meya.
17Hahaze vene vaIsalele vembile mwaso uno ngwavo,
Ove lixima, vweluka. Limbilenu mwaso.
18Lixima kana, eli vafulile vakakulitulaho,
Eli vene vasepele Vilolo javatu,
Namukombo wawangana namikombo yavo yamujila.
Vafumine mupambo, vayile kuMatana.
19Vafumine kuMatana vayile kuNahalyele. Vafumine kuNahalyele, vayile kuMbamote.
20Vafumine kuMbamote, vayile kucinema cize cili kulifuci lyaMowave, kwilu lyaPixinga, kutala kumavu kulikundu.
VaIsalele navamuhasa Xihone
(Luxi. 2.26-37)
21Kaha vaIsalele vatumine valuwa kuli Xihone mwangana wavaAmole ngwavo,
22Tupulasane mwane mulifuci lyove. Katwexi kupeukila muwandeko, cipwe muwande wamivinyoko. Katwexi kukanwa meya amumaximako. Natuyila mulikuku lyamwangana, palanga nomu natukalinga hitunafumu lyehi mulifuci lyove.
23Xihone ketavile vaIsalele kupulasana mulifuci lyenyiko. Oloze Xihone akungulwile vatu jenyi vosena, avalovokelele vaIsalele mupambo, ejile kuYahaze, alwile navaIsalele.
24VaIsalele vamuhonesele nauvela wajipoko jamikwale, Vahetele lifuci lyenyi kufumisa kuAlanone nakuheta kuYavoke, mbwe nakuli vana vaAmone, mwomwo ngiza yavana vaAmone yapwile nangolo.
25Ngoco vaIsalele vatambwile membo aze osena. VaIsalele vatwamine mumembo avaAmole osena, muHexevone namuvikwazo vyayo vyosena.
26Mwomwo Hexevone yapwile nganda yaXihone mwangana wavaAmole, uze alwile namwangana uze apwileko hakulivanga, uze wavaMowave, kaha atambwile lifuci lyenyi lyosena mulivoko lyenyi mbwe akuAlanone.
27Xikaho vaka-kuta Viximo veji kwambanga ngwavo.
Twayenu kuHexevone,
Nganda yaXihone vayitunge nakuyizamisa.
28Mwomwo kakahya kanalovoka muHexevone,
Mulangi unalovoka munganda yaXihone.
Kanali lyehi Ale yaMowave,
Navamyata vakumilundu yakunyunga yakuAlanone.
29Mama lelo hali ove, ove Mowave!
Munanongo, enu vatu jaKemoxe.
Nahane vana venyi vamalunga kupwa vaka-kucinwojoka,
Vana venyi vamapwevo navahane muupinji,
Kuli Xihone mwangana wavaAmole.
30Tunavase, Hexevone yinanongo mbwe nakuNjivone,
Tunenyekako mbwe nakuNofwa,
Kuze kutwala kuMeteva.
VaIsalele navamuhasa Onge wakuMbaxane
(Luxi. 3.1-11)
31Ngoco vaIsalele vatwaminenga mulifuci lyavaAmole.
32Mose atumine vatu vakasondwese Yazele. Kaha vatambwile membo alyo, vahangile vaAmole vapwileko kuze.
33Valumukileko vakandukile mujila yakutwala kuMbaxane. Kaha Onge mwangana waMbaxane avalovokelele, ikiye navatu jenyi vosena, nakulwa navo jita kuEtelei.
34Yehova ambile kuli Mose ngwenyi, Kanda umwivwa womako, mwomwo ngunamuhane mulivoko lyove, navatu jenyi vosena, nalifuci lyenyi. Ukamulinga nganomu walinganga kuli Xihone mwangana wavaAmole, uze atwamanga kuHexevone.
35Ngoco vamuvetele, navana venyi, navatu jenyi vosena, palanga nomu kakwasalile vamwe venyiko. Kaha Vahetele lifuci lyenyi.
Currently Selected:
KULAVA 21: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
