KULAVA 20
20
Meya amulilolwa
1Jino vana vaIsalele, lizavu lyosena, vahetele mupambo Jine hakakweji wakulivanga. Vatu vatwamine kuKatexe. Milyame afwile kuze, kaha vamufunjile kuze.
2Jino kakwapwile meya akunwa vaka-lizavuko. Kaha vavawungililile vaMose naAlone.
3Vatu vamukokojwesele Mose, vahanjikile ngwavo, Kaci twatokele omu vatokele vandumbwetu kumeso aYehova!
4Ikaze munanehela liwuka lyaYehova mupambo muno, numba tufwilemo, nayetu navimuna jetu?
5Munatulowela ika muEjipitu nakutuneha kuno kwakupi? Kuno kakwexi kuma kwambutoko, cipwe kwajikuyu, cipwe kwamawande amivinyo, cipwe kwajiloma, kaha nawa, kakwexi meya akunwako.
6Mose naAlone vafumine kumeso aliwuka, vayile kucikolo cambalaka yakuliwanyina, valimbilile camesohamavu. Kaha upahu waYehova wavasolokelele.
7Yehova ahanjikile kuli Mose ngwenyi,
8Mbata #Kulo. 4.17, 20; 17.5, 6.mukombo, ukungulule lizavu, nayove nayayove Alone. Hanjikenu kulilolwa kumeso avo, mangana lilovole meyalyo. Kaha nauvalowela meya kulilolwa. Ngoco naunwisa vaka-lizavu navimuna javo.
9Mose ambacile mukombo kumeso aYehova, nge omu amulwezele.
10Mose naAlone vakungulwile liwuka kulutwe lwalilolwa lize, kaha avambile ngwenyi, #Samu 106.33.Ivwenu jino, enu vaka-kulikanga, tumilowele meya kulilolwa lino nyi?
11Mose azundwile livoko lyenyi avetele lilolwa namukombo wenyi kavali. Kaha #Samu 78.16; Koli. 1, 10.4.kwalovokele meya amavulu. Vaka-lizavu vanwine, navimuna javo nawa.
12Oloze Yehova ambile kuli Mose naAlone ngwenyi, Mwomwo mwakananga kungwitavila nakungujilika kumeso avana vaIsalele, xikaho kamwexi kukengisa liwukeli mulifuci lize ngunavahaneko.
13Awa akiko meya #20.13 Nge ngwavo, Akukokojola. Tala nawa Kulo. 17.7.aMeliva, mwomwo vana vaIsalele vamukokojwesele Yehova, kaha alilumbunwine muli vakivo Ikiye wajila.
VaEtome navakanyisa vaIsalele kuhita
14Mose atumine valuwa vafume kuKatexe vaye kuli mwangana wavaEtome, ngwenyi, Songo yove Isalele nambe ngwenyi, Ove unatacikiza kukilikita cosenoco cinatuwane lyehi,
15nomwo vayile vakaka jetu kuEjipitu, nomwo twatwaminenga myaka yayivulu muEjipitu, nomwo vatuyanjixilenga vaEjipitu, etu navakaka jetu.
16Kahomu twatetele kuli Yehova, evwile mazu etu, atumine kangelo atulowele muEjipitu. Kaha tala, tuli kuKatexe, kulimbo lili kusembwa yangiza yove.
17Aci twitavile mwane tuhite mulifuci lyove. Katwexi kukahicila muwandeko, cipwe muwande wamivinyo. Katwexi kunwa meya amumaximako. Natuyilanga tuhu mulikuku lyamwangana. Katwexi kupeukila kucilyoko, cipwe kucimoswe, kuvangomu natukalinga hitunafumu lyehi mulifuci lyove.
18Oloze Etome amwambile ngwenyi, Kanda muhicila mwamiko, kucina nangumilovokela najipoko jamikwale.
19Vana vaIsalele vamwambile ngwavo, Natukandukila mulikulakula kaha. Kaci nge natukanwa kumeyove, etu navimuna jetu, kaha natukeca ndando yawo. Tupulasanemo kaha hamavu, nacuma ceka pimbi.
20Oloze ikiye avambile ngwenyi, Kanda mupulasanamoko. Kaha Etome avalovokelele navatu vavavulu nalivoko lyangolo.
21Ngoco Etome akanyine kuvetavila vaIsalele kupulasana mulifuci lyenyi. #Luxi. 2.8.Ngoco vaIsalele yalumukile vamusezele.
Alone mwafwa kupili Hole
22Vakatukile kuKatexe, kaha vana vaIsalele, lizavu lyosena, Vahetele kupili Hole.
23Yehova ambile kuli Mose naAlone kupili Hole kungiza yalifuci lyavaEtome ngwenyi,
24Alone nangumutwala kuli vausoko wenyi, mwomwo kexi kwingila mulifuci lize ngunahane kuli vana vaIsaleleko, #v. 10-12.mwomwo mwalikangile kulizu lyami kumeya aMeliva, xikaho.
25Yako naAlone namwanenyi Eleyaza uvakandwise hapili Hole.
26Ukazula Alone mahinenyi, ukamuvwikewo mwanenyi Eleyaza. Alone nangumutwala kuli vausoko wenyi, mwakafwila kuze.
27Mose alingile nge omu vamulwezele kuli Yehova. Vakandukile kupili Hole kumeso alizavu lyosena.
28Mose azulile Alone mahinenyi, amuvwikilewo mwanenyi Eleyaza. Kaha Alone afwile kuze kwilu lyapili. Mose naEleyaza vaxikumukile kupili.
29Omu vamwene vaka-lizavu vosena ngwavo, Alone nafu lyehi, valilile Alone makumbi makumi atatu, vaze vakuzuvo yaIsalele vosena.
Currently Selected:
KULAVA 20: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
