KULAVA 18
18
Vyuma vyakuvahana vapilixitu navaLevi
1Yehova ambile kuli Alone ngwenyi, Ove navana vove navaze vakuzuvo yavakakuluka jove hamwe #Kulo. 28.38; Levi 10.17; 22.16.namumbatanga kuhenga cakuzuvo yajila. Kahove navana vove hamwe namumbatanga kuhenga caupilixitu wenu.
2Navandumbwove nawa, vakamuyaci waLevi, muyaci wakakuluka yove, uvapandamisa nayove hamwe, mangana valipanjike nayove vakuzacilenga. Oloze ove navana vove hamwe mupwanga kulutwe lwambalaka yaunjiho.
3Kaha valamengomu nauvalweza, valamenga mbalaka yosena, oloze kanda vapandama kuvyuma vyakuzuvo yajilako, cipwe kulijiko lyakulumbila, kucina navafwa, cipwe vakivo cipwenu.
4Valipanjike nayove nakulama mbalaka yakuliwanyina, kumilimo yosena yamumbalaka. Mutu weka kanda akapandama kuli enuko.
5Mulamanga zuvo yajila, mulamenga lijiko lyakulumbila, kucina nakupwa ceka ndombo hali vana vaIsalele.
6KahAmi, tala, vandumbwenu vaLevi ngunavatambula muli vana vaIsalele. Vanapu wana wenu ou vahana kuli Yehova, vakuzata milimo yakumbalaka yakuliwanyina.
7Ove navana vove vamalunga hamwe mulamanga upilixitu wenu havyuma vyakulijiko lyakulumbila vyosena nahavize vyamutulo yalihina lyakuvatasana. Kaha muzatanga. Ngunamihane upilixitu kupwa milimo yawana. Mutu weka mwakapandamako vakamujihe.
8Yehova ahanjikile kuli Alone ngwenyi, KahAmi, tala, ngunakuhane kulama #Levi 7.28-34.mawanami akuzundula, vyuma vyavana vaIsalele vyakujilika vyosena. Ngunavihane kuli ove mwomwo hakukuwavisa, nakuli vana vove, cikiko cazano cenu haya myaka yosena.
9Evi vikiko vipwenga vyove kuvyuma vyajila cikuma vyakwoca hakakahya, mawanavo osena, #Levi 2.1-16.mawanavo akulya osena, #Levi 6.30.namawanavo ahaxili osena, namawanavo ahakuhingika osena, aze navanguhana, apwenga ajila cikuma ayove navana vove.
10Ulyangako nge kuvyuma vyajila cikuma. Malunga vosena valyengako. Vipwenga vyajila vyayove.
11Kahevi vinapu vyove, mawana akuzundula kumawanavo, mawana avana vaIsalele akuhungisa osena. #Levi 22.1-16.Ngunavihane kuli ove nakuli vana vove vamalunga nakuli vana vove vamapwevo hamwe, kupwa cazano cenu haya myaka yosena. Vakuzuvo yove vosenava vanatomo valyeko.
12Maji akuhambakana kuwaha osena, navinyo vyakuhambakana kuwaha vyosena, nakulya camanona, vize vyavo vyakulivanga vize navahana kuli Yehova, ngunavihane kuli ove.
13 #
Kulo. 22.29; 23.19; 34.26. Vize vyakulivanga kwihya kuvyuma vyosena vili mulifuci lyavo, vize navakaneha kuli Yehova, vikapwe vyove. Vakuzuvo yove vosena vanatomo vakalyeko.
14 #
Levi 27.1-33. Vyosena vyakutengulwila kuli Yehova muli vaIsalele vipwenga vyove.
15 #
3.46; Kulo. 13.13, 15. Vosena vakuliteta mitwe, kuli vosenava veji kuhananga kuli Yehova, namutu nakanyama, vapwenga vove. Oloze vatwatwa vavatu ukavasokola cakuvasokola, kaha vatwatwa vatunyama vavapi ukavasokola nawa.
16Vaze navakasokola kuli vakivo ukavasokola kufumisa kuli ava vakakweji umwe, nge omu nawesekela, najimbongo jajixekele jitanu, nge kutesa naxekele yakuzuvo yajila (yikiko jingela makumi avali).
17Oloze twatwa wangombe, cipwe twatwa wamukoko, cipwe twatwa wapembe, kanda ukamusokolako. Vanapu vajila. Manyingavo ukawasapwila halijiko lyakulumbila, ukalumbe maji avo kupwa wana wakwoca hakakahya, walivumba lyalupengopengo kuli Yehova.
18Kaha nyama yavo yipwenga yove. Yipwenga yove nge omu lyapwa pambo lyakuhungisa nalihinji lyacilyo, yipwenga yove.
19Mawana akuzundula osena akuvyuma vyajila vize navahana vana vaIsalele kuli Yehova, ngunawahane kuli ove, nakuli vana vove vamalunga, nakuli vana vove vamapwevo hamwe, kupwa cazano cenu haya myaka yosena. Lunapu luxiko lwamungwa haya myaka yosena kumeso aYehova kuli ove nakuli vaka-tanga yove hamwe.
20Yehova ambile kuli Alone ngwenyi, Kanda ukatwama nauswana kulifuci lyavoko, cipwe kutwama nacazano muli vakivo. Ami yami cazano cove, nguuswana wove muli vana vaIsalele.
21Kaha vana vaLevi, tala, ngunavahane #Levi 27.30-33.vize vyakusokesa mumakumi vyamuli vaIsalele vyosena, kupwa uswana wavo wakuvafweta kumilimo yavo navazatanga, eyi vene milimo yakumbalaka yakuliwanyina.
22Kufumisa kulikumbi lyalelo vana vaIsalele kanda vapandama kumbalaka yakuliwanyinako, kucina navawana mulonga nakufwa.
23Oloze vaLevi vazatenga milimo yakumbalaka yakuliwanyina, vambatenga kuhenga cavo. Cipwenga cilika haya myaka yosena mukusemunwina cenu cosena. Kanda vakatwama nauswana muli vana vaIsaleleko.
24Mwomwo vize vyavana vaIsalele vyakusokesa mumakumi, vize veji kuhananga kupwa wana wakuzundula kuli Yehova, ngunavihane kuli vaLevi kupwa uswana wavo. Xikaho ngunavambe ngwami, Kanda vakatwama nauswana muli vana vaIsaleleko.
25Yehova ahanjikile kuli Mose ngwenyi,
26Hanjika kuli vana vaLevi uvambulile ngwove, Omu namukatambula vize vyakusokesa mumakumi kuli vana vaIsalele, vize ngunamihane vyakuli vakivo kupwa uswana wenu, numba mukahaneko wana wakuzundula wakuhana kuli Yehova, vyakusokesa mumakumi vyakuvize vyakusokesa mumakumi.
27Wana wenu wakuzundula navakamilavilawo nge wakulya camanona cakucizungwilo, nge vize vyakusula mucikamwino cavinyo.
28Ngoco nayenu nawa mukahana wana wakuzundula wakuvize vyenu vyakusokesa mumakumi vyosena kuli Yehova, vize namutambula kuli vana vaIsalele. Kaha mukambataho wana waYehova wakuzundula mukauhane kuli kapilixitu Alone.
29Kumawanenu osena mukahanako mawana aYehova akuzundula osena, kuvyuma vyawo vyakuhambakana kuwaha vyosena, vize vyawo vyakujilika vyakumbataho.
30Xikaho uvambulila ngwove, Enu hakuzundulako vize vyawo vyakuhambakana kuwaha, numba vakavalavilevyo vaLevi nge mbuto jakwima jakucizungwilo, nge vize vyakwima vyakucikamwino cavinyo.
31Mukayilyanga kwosena, enu navaze vakujizuvo jenu, mwomwo yinapu fweto yenu yakuminana hamilimo yenu yakumbalaka yakuliwanyina, xikaho.
32Kaha kamwexi kukambata mutonga waxili havikikoko, hakuzundulako vize vyavyo vyakuhambakana kuwaha. Kanda mukajilula vyuma vyavana vaIsalele vyajilako, kucina namukafwa.
Currently Selected:
KULAVA 18: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
