KULAVA 14
14
Vatu navalikanga kuli Yehova
1Jino vaka-lizavu vosena vatetele namazu akukanguka, kaha vatu valilile ufuku uze.
2Vana vaIsalele vosena vatatwokesele vaMose naAlone. Vaka-lizavu vosena vavambile ngwavo, Kaci twafwilile mulifuci lyaEjipitu! Mokomoko, kaci twafwilile mupambo muno!
3Yehova ali nakutunehela ika mulifuci lino, mangana tukalindumukelindumuke kujipoko jamikwale? Mapwevo jetu navana vetu navakapwa tupinji. Cinawahe kuli etu kukinduluka kuEjipitu, nyi?
4Ngoco valyambile ngwavo, Tutongolenu kapitau, tukindulukenu kuEjipitu.
5Kaha Mose naAlone Valimbilile cameso avo hamavu kumeso aliwuka lyalizavu lyavana vaIsalele lyosena.
6Kaha Yoxuwa mwanaNune naKaleve mwanaYefune, vaze vapwile vakusokesa vaze vasondwesele lifuci, vapulile mahinavo,
7vahanjikile kulizavu lyavana vaIsalele lyosena ngwavo, Lifuci olyo twahitanga nakusondwesa, likiko lifuci lyamwaza cikumakuma.
8Kaci nge Yehova nevu cipepa kuli etu, kaha mwakatuhetesa mulifuci kana nakutuhanalyo, likiko lifuci lyakumbwambumuka mavele nawuci.
9Oloze kanda mulikanga kuli Yehovako, cipwe kwivwa woma wavatu vaka-lifuci eli. Mwomwo vanapu kulya cetu. Mukingo wavo unavafumu helu, kaha Yehova ali nayetu. Kanda muvevwa womako.
10Oloze lizavu lyosena lyambile kuvasa malolwa. Kaha upahu waYehova wasolokele mumbalaka yakuliwanyina kuli vana vaIsalele vosena.
11Yehova ambile kuli Mose ngwenyi, Vatu ava navangusaulanga palanga nakumwaka uka? Palanga nakumwaka uka navakananga kungufwelela havinjikizo vyosenovyo ngunalingi lyehi muli vakivo?
12Nanguvaveta namusongo wacihita nakuvacimbuka, nakukulingisove kupwa umuyaci wangolo waunene wakuvahambakana vakivo.
13Mose ambile kuli Yehova ngwenyi, Kaha vaEjipitu navakacivwa. Mwomwo wavalowele vatu ava nangolo jove muli vakivo.
14Kaha navakacambulula kuli ava vatwama mulifuci lino. Vakivo vanevu lyehi omu uli Ove Yehova mukaci kavatu ava, mwomwo veji kukumonangOve Yehova meso nameso, livwi lyove linemana helu lyavo, kaha weji kuvatwaminyinangako mupanda yalivwi hamusana namupanda yakakahya haufuku.
15Jino, kaci nge naujiha vatu ava nge mutu umwe, kaha vaka-mafuci vaze vanevu lyehi puho yove navakahanjika ngwavo,
16Mwomwo Yehova ahonene kuhetesa vatu ava mulifuci olyo alixingilile kuli vakivo, xikaho navajihila mupambo.
17Acitave jino ngolo jaYove Mwata jitohwe, nge omu unahanjika lyehi ngwove,
18 #
Kulo. 34.6, 7. Yehova eji kuxipwokelanga kutenuka, ali nalikoji lyalivulu, eji kukonekelanga kuhenga nomwo vanazomboka jiximbi, kaha kexi kusambisou atela kumupayisako, eji kuzangamisanga vana hakuhenga camasevo nakucisemunwino camucitatu nacize camuciwana.
19Aci konekele kuhenga cavatu ava, nge kutesa nakuvula calikoji lyove, nomwo unavakonekelanga lyehi vatu ava kufumisa kuEjipitu palanga noholili.
Kalunga mwavazangamisa vaIsalele
(Luxi. 1.34-40)
20Yehova amwambile ngwenyi, Ngunavakonekela nge omu mwaya lizu lyove.
21Oloze Camwenemwene, nakuyoya cami tu, nomwo nakukasula kumavu kwosena naupahu waYehova,
22mwomwo vatu ava vamona lyehi upahu wami navinjikizo vyami ngwalingile kuEjipitu namupambo, oloze #Kulo. 5.2; 14.11; 15.24; 16.2; 17.2, 3; 32.1; Kula. 11.1, 4; 12.1; 14.2.vanangweseka lyehi kusokesa mulikumi, vanakane kwivwilila mulizu lyami,
23xikaho kavexi kukamona lifuci lize ngwalixingilile kuli vakaka javoko, kaha vaze vanangusaula vosena kavexi kukalimonako.
24Xina ngamba yami Kaleve kaha, mwomwo apwile naxipilitu yeka, nomwo nangukave namucima wosena, xikaho nangukamuhetesa mulifuci lize ayile, kaha navaka-tanga yenyi navakaliheta.
25VaAmaleke navaKanane vatwama kucinema. Hamene alumukenu muyenga mupambo mujila yakuya kukalungalwiji Ucila.
26Yehova ahanjikile kuli Mose nakuli Alone ngwenyi,
27Lizavu eli lyalipi lyeji kungutatwokesanga nanguliyanjilanga palanga nakumwaka uka? Ngunevu lyehi kutatwoka cavana vaIsalele veji kungutatwokesanga.
28Vambulile ngwove, Yehova nambe ngwenyi, Nakuyoya cami tu, Camwenemwene omwo munahanjika mumatwitwi ami, mukiko munangumilingila.
29Mupambo muno namukalindumuka-lindumuka mijimba yenu yakufwa, vakwenu #1.45, 46.vosenovo valavile, nge kutesa nayenu muvosena valavile, kufumisa kuli ava vamyaka makumi avali nakusambula, enu munangutatwokesa.
30Camwenemwene enu kamwexi kukaheta mulifuci kana ngwalixingilileko ngwami, Nangukamitwamisamo, xina Kaleve kaha mwanaYefune, naYoxuwa mwanaNune.
31Oloze vana venu vavandende, ava mwavulukanga ngwenu, Navakapwa tupinji, nangukavahetesamo, kaha navakatacikiza lifuci eli munakane.
32 #
Koli. 1, 10.5. Oloze enu, mijimba yenu yakufwa nayikalindumuka-lindumuka mupambo.
33Vana venu navakapwa #14.33:MuuHepeleu ngwavo, Tufunga.vakakukimbwojoka mupambo myaka makumi awana nakumbata maujilenu, palanga nomu nayikalinga mijimba yenu yakufwa yinanongo lyehi mupambo.
34Nge hakulava makumbi aze mwasondwesanga lifuci, makumbi makumi awana, mwaka halikumbi mwaka halikumbi, ngoco namumbatanga vilinga vyenu vyakuhenga myaka makumi awana, kaha namukatacikiza kufutuka cami.
35Ami Yehova ngunahanjika. Camwenemwene mukiko vene munanguvalinga vaka-lizavu eli lyalipi vosena vananguwungilila. Mupambo muno navakatokelamo, kaha mukiko vene navakafwilamo.
Kufwa cavandoji vavapi likumi
36Jino malunga vaze atumine Mose nakusondwesa lifuci, vaze vakindulukile nakusowangiza vaka-lizavu vosena vamutatwokese hakufulilila lifuci,
37malunga vaze vafulililile lifuci mwamupi vafwile namusongo kumeso aYehova.
38Oloze Yoxuwa mwanaNune naKaleve mwanaYefune vasalile vavatonyi kuli malunga vaze vayile nakusondwesa lifuci.
VaIsalele navahona kuHoloma
(Luxi. 1.41-46)
39Jino Mose ambulwile mazu awa kuli vana vaIsalele vosena. Vatu valixonene cikuma.
40Kaha Vamenekele cimenemene, vakandukile helu lyapili, valyambile ngwavo, Yetu vano, kaha natukandukokwo natuxiki Yehova, mwomwo tunavulumuna.
41Mose avambile ngwenyi, Enu namuzombokela ika luximbi lwaYehova? mwomwo kacexi kufukilako.
42Yehova kexi mukaci kenuko, xikaho kanda mukandukakoko, kucina navakamiveta kuli vaka-kole jenu.
43Mwomwo vaAmaleke navaKanane vali kuze kulutwe lwenu, kaha namukalindumuka kujipoko jamikwale. Mwomwo munaseze lyehi kukava Yehova, xikaho Yehova kexi kupwa nayenuko.
44Oloze vazamukilile kukanduka helu lyapili. Oloze cikaxa caluxiko lwaYehova kacakatukile kucilomboko, cipwe Mose.
45Kaha vaAmaleke navaKanane, vaze vatwaminenga kupili yize, vaxikumukile vavavetele nakuvatwa palanga nakuHoloma.
Currently Selected:
KULAVA 14: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
