KULAVA 10
10
Jineta japalata
1Yehova ahanjikile kuli Mose ngwenyi,
2Lifulile jineta japalata jivali. Ujifula jakutatula, kaha jipwenga jove jakusanyikisa lizavu, jakukatwisa Vilombo.
3Omu navakajimba, vaka-lizavu vosena vakawungile kuli ove kucikolo cambalaka yakuliwanyina.
4Kaci nge navakemba yimwe kaha, kaha vaka-kulitulaho, vamyata jamakombakaji avaIsalele vawungile kuli ove.
5Omu namukemba cakutungumuna, vaka-vilombo vili kumutamba wamusamuko vakakatuke.
6Kahomu namukemba cakuvatungumuna kamucivali, vaka-vilombo vili kuluhaci lwasulo vakakatuke. Vakembe cakuvatungumuna mangana vakakatuke.
7Oloze hakukungulula liwuka, mukemba, oloze kanda mukemba cakutungumunako.
8Vapilixitu Vana VaAlone vakembe jineta, kaha jipwenga kuli enu hicilika cahaya myaka yosena mukusemunwina cenu cosena.
9Omu namukaya nakwasa jita navaka-kole vali nakumiyanjisa mulifuci lyenu, numba mukembe jineta cakutungumuna, ngoco navakamyanuka kuli Yehova Kalunga kenu, kaha mwakamilwila kuli vaka-kole jenu.
10Nahalikumbi lyakuwahilila cenu nawa, nahaviwanyino vyenu vyakutongola nawa, nahakumweka catukweji twenu, #Samu 81.3-5.mukemba jineta hamawanenu akulumba, nahavimuna vakuvatula vamawanenu akulweza keke. Kaha najikapwa jakwanukilaho kuli enu kumeso aKalunga kenu. Ami yami Yehova Kalunga kenu.
VaIsalele navakatuka kuXinai
11Jino casolokele hamwaka wamucivali, hakakweji wamucivali, halikumbi lyakakweji lyakusokesa mumakumi avali, livwi lyazundukile helu #10.11: Tala 1.50.lyatavanaku yaunjiho.
12Ngoco vana vaIsalele vatambukile mwayile misango yavo, vafumine mupambo yaXinai. Kaha livwi lyatwamine mupambo Palane.
13Valivangile kukatuka nge mwaya luximbi lwaYehova, luze ahanyine muli Mose.
14Hakulivanga lipandelo lyacilombo cavaYuta lyakatukile, nge kumayongomenavo. Mwata waliyongomena lyenyi apwile ikiye Naxone mwanaAminatave.
15Mwata waliyongomena lyamuyaci wavana vaIsakale apwile ikiye Netanele mwanaZuwale.
16Mwata waliyongomena Namuyaci wavana vaZevulune apwile ikiye Elyave mwanaHelone.
17Jino vazulile tavanaku, kaha vana vaNgelexone navana vaMelali vakatukile, vakivo vapwile vakakumbata tavanaku.
18Kaha lipandelo lyacilombo cavaLuvene lyakatukile nge kumayongomenavo. Mwata waliyongomena lyenyi apwile ikiye Elizule mwanaXeteule.
19Mwata waliyongomena Namuyaci wavana vaXimeyone apwile ikiye Xelumyele mwanaZulixatai.
20Mwata waliyongomena lyamuyaci wavana vaNgate apwile ikiye Elyasafwe mwanaNduwele.
21Jino vaKohate vakatukile, nakumbata vize vyakuzuvo yajila. Vakwavo vajikile tavanaku cakutalilila kwiza cavo.
22Kaha lipandelo lyacilombo cavana vaEfwalime lyakatukile nge kumayongomenavo. Mwata waliyongomena lyenyi apwile ikiye Elixama mwanaAmihute.
23Mwata waliyongomena lyamuyaci wavana vaManase apwile ikiye Ngamalyele mwanaPetazule.
24Mwata waliyongomena lyamuyaci wavana vaMbenjamine apwile ikiye Avitane mwanaNgiteyonyi.
25Kaha lipandelo lyacilombo cavana vaNdane lyakatukile nge kumayongomenavo, cikiko cakusulilika kuvilombo vyosena. Mwata waliyongomena lyenyi apwile ikiye Ahyezele mwanaAmixatai.
26Mwata waliyongomena Namuyaci wavana vaAxele apwile ikiye Pangiyele mwanaOkolane.
27Mwata waliyongomena Namuyaci wavana vaNafwatale apwile ikiye Ahila mwanaEnane.
28Ngoco mucapwilenga kutambuka cavana vaIsalele, nge kumayongomenavo. Kaha Vakatukile.
29Jino Mose ambile kuli #Kuyu. 4.11.Hovave, #Kulo. 2.18; 3.1; 8.12.mwanaLuwele kaMicane, isewenu lyaMose ngwenyi, Tuli nakutambuka nakuya kuze navuluka Yehova ngwenyi, #Kupu. 12.7; Kulo. 6.4-8.Nangukamihanako. Tuyenunga nayetu, kaha natukuwahisa. Mwomwo Yehova navulukila kuwaha hali vaIsalele.
30Oloze amwambile ngwenyi, Kangwexi kuyako, oloze nangukatuka nguye kulifuci lyami nakuli vausoko wami.
31Mose amwambile ngwenyi, Kanda utusezako mwane, mwomwo Unatacikizomu natukatungila Vilombo vyetu mupambo, kaha naupwanga nge meso kuli etu.
32Kaha nacikapwa, kaci nge nauya nayetu, nacikapwa, oco kuwaha kana mwakatuwahisa Yehova, cikiko vene natukakuwahisove.
33Ngoco Vakatukile kupili yaYehova, kutambuka makumbi atatu. Kaha cikaxa caluxiko lwaYehova cavatwaminyinyineko kutambuka makumbi atatu nakuvatondela kwakunokela.
34Livwi lyaYehova lyapwile helu lyavo hamusana, omu vakatukile kucilombo.
35Kaha casolokele, omu cakatukile cikaxa, Mose ambile ngwenyi, Ove Yehova, aci katuke, vaka-kole jove vavamwange mwamwa, vakakukuhunga vacine kumeso ove.
36Kahomu catulile, ambile ngwenyi, Ove Yehova, aci kinduluke kutununu twamakombakaji avaIsalele.
Currently Selected:
KULAVA 10: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
