VYAVALEVI 9
9
1Kaha casolokele halikumbi lyamucitanu naatatu, Mose asanvikile Alone navana venyi navakulwane javaIsalele.
2Ambile kuli Alone ngwenyi, Likwacile mwanangombe kupwa wana wahaxili, nacizamba camukoko wawana wakulumba, wakuzeneka katenga, uvanehe kumeso aYehova.
3Hanjika kuli vana vaIsalele ngwove, Likwacilenu cizamba capembe kupwa wana wahaxili, namwanangombe namwanamukoko, vosena vavali vamwaka umwe, vakuzeneka katenga, kupwa wana wakulumba,
4nangombe nacizamba camukoko kupwa mawana akulweza keke, muvavatwile kumeso aYehova, nawana wakulya munahingunwina lyehi maji. Mwomwo lelo Yehova mwalisolola kuli enu.
5Vize avalwezele Mose vavinehele kulutwe lwambalaka yakuliwanyina. Kaha lizavu lyosena lyapandamine, lyemanyine kumeso aYehova.
6Mose avambile ngwenyi, Eci cikiko cuma namilweze Yehova ngwenyi, mucilinge, kaha upahu waYehova hinausoloka kuli enu.
7Mose ambile kuli Alone ngwenyi, Pandama kulijiko lyakulumbila uhane wana wove wahaxili, nawana wove wakulumba, ulilingile cakufwika xili naceci cavakwenu vatu nawa, hikuhana wana wavatu vakwenu, uvalingile cakufwika xili, nge omu namilweze Yehova.
8Ngoco Alone apandamine kulijiko lyakulumbila, ajihile mwanangombe wawana wahaxili, uze wapwile wahali ivene.
9Vana vaAlone vamunehelele manyinga. Kaha atupikile munwe wenyi mumanyingaze, awakwicile kujimbinga jalijiko lyakulumbila, awahingunwinyine manyinga kuxina yalijiko lyakulumbila.
10Oloze maji, najiyise, naciwuva camaji cahalisuli lyawana wahaxili, avilumbilile halijiko lyakulumbila, nge omu valwezele Mose kuli Yehova.
11Kaha nyama nalilambu avilumbilile hakakahya kusali yacilombo.
12Ajihile wana wakulumba. Vana VaAlone vamutwalilile manyinga, kaha awasapwilile halijiko lyakulumbila jingulwixi ndo.
13Vamutwalilile wana wakulumba cipuka nacipuka, namutwe, kaha avilumbilile halijiko lyakulumbila.
14Akosele vize vyamujimo namahinji, avilumbilile hawana wakulumba halijiko lyakulumbila.
15Anehele wana wavatu, akwacile pembe wawana wahaxili uze wapwile wahali vatu, amujihile, amuhanyine haxili, nge uze wakulivanga.
16Anehele wana wakulumba, auanyine nge mwaya mazu akuyula.
17Anehele wana wakulya, atapwileko livoko lyenyi lyato, aulumbilile halijiko lyakulumbila, kulunjika hawana wakulumba wacimene.
18Ajihile nawa ngombe nacizamba camukoko, vakivo vimuna vakuvatula vamawana akulweza keke, vaze vapwile vahali vatu. Kaha vana vaAlone vamutwalilile manyinga. Awasapwilile halijiko lyakulumbila jingulwixi ndo.
19Vamutwalilile maji angombe nawawa acizamba camukoko, namukila wamaji, namaji aze apwile helu lyavize vyamujimo, najiyise, naciwuva camaji cahalisuli.
20Vawahakile maji hamapambo, kaha alumbilile maji aze halijiko lyakulumbila.
21Namapambo nalihinji lyacilyo Alone avihungixile kupwa wana wakuhungisa kumeso aYehova, nge omu vavalwezele kuli Mose.
22Alone olwele mavoko enyi awatalikixile kuli vatu, avakiswile. Kaha axikumukile kukuhana wana wahaxili nawana wakulumba namawana akulweza keke.
23Mose naAlone vengilile mumbalaka yakuliwanyina, valovokelemo ceka, vakiswile vatu. Kaha upahu waYehova wasolokele kuli vatu vosena.
24Okwo kuli Yehova kwalovokele kakahya, kalile wana wakulumba namaji halijiko lyakulumbila. Omu vakamwene vatu vosena, vatambakanyine, Valimbilile cameso-hamavu.
Currently Selected:
VYAVALEVI 9: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
