VYAVALEVI 10
10
Mulonga waNatave naAvihu
1Jino Natave naAvihu, vana VaAlone, vambacile mutu himutu ciloso cenyi cakulumbila vize vyalivumba lyamwaza, vahakilemo kakahya, vahakileho vize vyalivumba lyamwaza, vanehele kakahya keka kumeso aYehova, kaze azenekele kuvalweza.
2Kahokwo kuli Yehova kwalovokele kakahya nakuvanongesa, kaha vafwilile kumeso aYehova.
3Mose ambile kuli Alone ngwenyi, Mukiko vene mwanahanjika Yehova ngwenyi, Nangujilila hali ava navapandama kuli Ami, kaha nangutohwa kumeso avatu vosena. Kaha Alone aliholelele kulu.
4Mose asanyikile Mixaele naElezafwane, vana vaUjiyele ise yaAlone, avambile ngwenyi, Pandamenu mumbate vandumbwenu muvafumise kulutwe lwazuvo yajila, muvatwale kusali yacilombo.
5Ngoco vapandamineko, vavatwalile havikuto vyavo kusali yacilombo, nge muze ambile Mose.
6Mose ambile kuli Alone nakuli vana venyi Eleyaza naItamale ngwenyi, Kanda mutwama nalipupi kumitwe yenuko, kaha kanda mupula mahinenuko, kucina namufwa, kucina Yehova mwasangumukila lizavu lyosena. Oloze vandumbwenu, zuvo yaIsalele yosena, valile hakuwema kana nawemesa Yehova.
7Kanda mulovoka kucikolo cambalaka yakuliwanyinako, kucina namufwa, mwomwo maji aYehova Kalunga kenu akuwavisa ali hali enu, xikaho. Kaha valingile nganomu mwayile lizu lyaMose.
8Yehova ahanjikile kuli Alone ngwenyi,
9Omu namwingila mumbalaka yakuliwanyina, kanda munwa vinyo cipwe wala wausasuko, cipwe ove, cipwe vana vove vamalunga uli navo, kucina namufwa. Cipwenga cilika haya myaka yosena mukusemunwina cenu cosena,
10kaha mangana muhandununenga vyajila navyasanga, navyavipi navitoma,
11kaha mangana munangulenga vana vaIsalele vilika vyosenevi nahanjika Yehova kuli vakivo muli Mose.
12Mose ahanjikile kuli Alone nakuli Eleyaza nakuli Itamale, vana VaAlone vaze vasalileho ngwenyi, Mbatenu wana wakulya uze unasaleho kumawana aYehova akwoca hakakahya, muulile wakuzeneka cimbalwila kutenga yalijiko lyakulumbila, mwomwo ukiko wajila cikuma.
13Muulila kuma kwajila, mwomwo cikiko cazano cove, cikiko cazano cavana vove, cakumawana aYehova akwoca hakakahya, mwomwo ngoco muvanangulweze.
14Kaha pambo lyakuhungisa nalihinji lyakuzundula muvilila kuma kutoma, nayove, navana vove vamalunga, navana vove vamapwevo nawa hamwe, mwomwo vanavihane kupwa cazano cove, cazano cavana vove vamalunga cakuvimuna vakuvatula vamawana avana vaIsalele akulweza keke.
15Lihinji lyakuzundula napambo lyakuhungisa vavinehe namawana akwoca hakakahya amaji hamwe, mangana vavihungise kupwa wana wakuhungisa kumeso aYehova. Kaha lipwe lyove nalyavana vove nawa hamwe, kupwa cazano haya myaka yosena, nge omu vanangulweze kuli Yehova.
16Jino pembe wawana wahaxili Mose amutondele cakumutonda, kaha kumana, vanamulumbu lyehi. Kaha avatenukilile Eleyaza naItamale, vana VaAlone vaze vasalileho ngwenyi,
17 #
6.24-30. Munakanyina ika kulya wana wahaxili muze mwajila? mwomwo ukiko wajila cikuma, kaha namihanewo mangana mumbate kuhenga calizavu, muvalingile cakufwika xili kumeso aYehova.
18Tala, #6.30.manyingawo kavawengixile mutulo mwajilako. Kaci mwaulyanga wakulya omu mwajila, nge omu ngwamilwezanga.
19Alone ahanjikile kuli Mose ngwenyi, Tala, likumbi lyalelo vanahane wana wavo wahaxili nawana wavo wakulumba kumeso aYehova, kaha vyuma vyangana vinanguwane, kaha kaci ngwalyanga wana wahaxili lelo, Yehova kaci nacimono kuwaha numba?
20Omu acivwile Mose, acimwene kuwaha.
Currently Selected:
VYAVALEVI 10: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
