VYAVALEVI 7
7
1Elu lukiko luximbi lwawana wahakuhingika. Ukiko wajila cikuma.
2Okwo veji kujihilanga wana wakulumba vakajihileko nawana wahakuhingika nawa. Manyingenyi vakawasapwile kulijiko lyakulumbila jingulwixi ndo.
3Akahaneko maji enyi osena, namukila wamaji, namaji ali helu lyavize vyamujimo,
4najiyise josena jivali, namaji aliko ali kumitanda, naciwuva camaji cili alisuli akacifumiseko najiyise hamwe.
5Kapilixitu akavilumbile halijiko lyakulumbila kupwa wana wakwoca hakakahya wakuhana kuli Yehova. Ukiko wana wahakuhingika.
6Malunga vavapilixitu vosena vakalyeko. Vakaulile kuma kwajila. Ukiko wajila cikuma.
7Nge omu wapwa wana wahaxili, ngoco muunapu nawana wahakuhingika nawa. Luximbi lwawo lwolwo lumwe. Kapilixitu uze mwakalinga nawo cakufwika kuhingika, ikiye akatwame nawo.
8Kapilixitu uze mwakahana wana wamutu wakulumba, uze kapilixitu akatwame nalilambu lyawana wakulumba, ou nahane.
9Mawana akulya akwoca mufwolonyi osena, namawana akuzata hacikango nahacifwoyo cakwocela osena, akapwe akapilixitu ou mwawahana.
10Mawana akulya osena, cipwe awa vanahingunwina maji, cipwe awa aumu, akapwe avana vaAlone vosena, mutu umwe hamwe namukwavo.
11Elu lukiko luximbi lwacimuna wakuvatula wamawana akulweza keke, ou mwahana mutu kuli Yehova.
12Kaci nge mwamuhana kupwa wakusakwilila Yehova, kaha hamwe nayauze cimuna wakuvatula wakusakwila akahane jimbolo jakuzeneka cimbalwila vanahingunwina maji, najimbolo jakuzeneka cimbalwila jakuwavisa maji jajilelu, najimbolo vanahingunwina maji, jawunga wakusalulula unatambula lyehi maji.
13Akahane wana wenyi najimbolo jakuzeneka cimbalwila nacimuna wakuvatula wamawanenyi akulweza keke wakusakwila.
14Kumawanosena akahaneko mbolo yimwe yimwe kupwa wana wakuzundula wakuhana kuli Yehova. Yikapwe yakapilixitu uze mwakasapwila manyinga amawana akulweza keke.
15Nyama yacimuna wakuvatula wamawanenyi akulweza keke akusakwila vakayilye halikumbi olyo mwakahana wana wenyi. Kanda akasezaho nahakucako.
16Oloze cimuna wakuvatula wawana wenyi kaci nge napu wakuxika, mokomoko wana wakulyanukila, vakamulye halikumbi olyo mwakahana cimuna cenyi wakuvatula, kahomu akuca nawa, oyo yinasaleho nawa vayilye.
17Oloze oyo yinasaleho halikumbi lyamucitatu kunyama yacimuna wakuvatula, vakayilumbe hakakahya.
18Kaci nge halikumbi lyamucitatu navalya kunyama yacimuna wakuvatula wamawanenyi akulweza keke, kaha wana wenyi kavexi kuwitavilako, kavexi kuuvulukila hali ou mwauhanako. Unapu waunyengwe, kaha mutu uze mwakalyako mwambata kuhenga cenyi.
19Nyama kana nayikwata hacuma cacipi, kanda vayilyako. Vakayilumbe hakakahya. Kaha nyama kana, vosena vanatomo vakayilye.
20Oloze mutu uze mwakalya kunyama yize yacimuna wakuvatula wamawana akulweza keke, ou napu waYehova, uze mwakalyako nakupihya cenyi calambwe, mutu kana navakamuteta muli vatu vakwavo.
21Kahomu mwakwata mutu #5.2, 3.hacuma cacipi, cipwe hakupihya camutu, cipwe hakanyama wamupi, cipwe hacuma caunyengwe cacipi, kaha himwalya kunyama yacimuna wakuvatula wamawana akulweza keke, ou napu waYehova, mutu kana navakamuteta muli vatu vakwavo.
22Yehova ahanjikile kuli Mose ngwenyi,
23Hanjika kuli vana vaIsalele ngwove, Kanda mukalya majiko, cipwe angombe, cipwe amukoko, cipwe apembe.
24Maji ayauze wakulifwila, namaji ayauze vanatanye kuli tunyama, vanahase kuwazacisa milimo yeka, oloze kulyanyi kanda mukawalyako.
25Mwomwo Wexowo mwakalya maji acimunou veji kuhananga vatu wana wakwoca hakakahya wakuhana kuli Yehova, mutu uze mwawalya navakamuteta muli vatu vakwavo.
26Kwexokwo munatwame, manyingosena kanda mukawalyako, cipwe akajila, cipwe akanyama.
27Wexowo mwakalya manyinga, mutu uze navakamuteta muli vatu vakwavo.
28Yehova ahanjikile kuli Mose ngwenyi,
29Hanjika kuli vana vaIsalele ngwove, Uze mwahana cimuna wakuvatula wamawanenyi akulweza keke kuli Yehova, akanehe wana wenyi akucimuna wakuvatula wamawanenyi akulweza keke kuli Yehova.
30Mavoko enyivene akanehe mawana aYehova akwoca hakakahya, akanehe maji, napambo, mangana vakalihungise pambo kupwa wana wakuhungisa kumeso aYehova.
31Kapilixitu akalumbe maji halijiko lyakulumbila, oloze pambo likapwe lyaAlone navana venyi.
32Lihinji lyacilyo mukalihana kuli kapilixitu, kupwa wana wakuzundula wakuvimuna vakuvatula vamawanenu akulweza keke.
33Muli vana VaAlone uze mwahana manyinga awana wakulweza keke, namaji, ikiye akapwe nalihinji lyacilyo hicazano cenyi.
34Mwomwo pambo lyakuhungisa nalihinji lyakuzundula ngunavitambula kuli vana vaIsalele kuvimuna vakuvatula vamawanavo akulweza keke, kaha ngunavihane kuli kapilixitu Alone nakuli vana venyi kupwa cazano cavo cakuli vana vaIsalele haya myaka yosena.
35Eci cikiko cazano caAlone omu vanamuwavisa, cikiko cazano cavana venyi omu vanavawavisa, cakumawana aYehova akwoca hakakahya halikumbi lize avapandamixile mangana vamuzacilenga Yehova milimo yaupilixitu,
36oco valwezele kuli Yehova ngwenyi, vavahaneco kuli vana vaIsalele, halikumbi lize avawavixile. Cikiko cazano cavo haya myaka yosena mukusemunwina cavo cosena.
37Elu lukiko luximbi lwawana wakulumba, nalwelu lwawana wakulya, nalwelu lwawana wahaxili, nalwelu lwawana wahakuhingika, nalwelu lwakuhandunwina kuupilixitu, nalwelu lwacimuna wakuvatula wamawana akulweza keke,
38eji valwezele Mose kuli Yehova kupili Xinai, halikumbi lize avalwezele vana vaIsalele kuhana mawanavo kuli Yehova mupambo yaXinai.
Currently Selected:
VYAVALEVI 7: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
