VYAVALEVI 4
4
1Yehova ahanjikile kuli Mose ngwenyi,
2Hanjika kuli vana vaIsalele ngwove, Kaci nge mutu mwavulumuna hakutamuka kucuma cimwe cavyuma vyosena vize nakande Yehova ngwenyi, Kanda vakavilingako, nge mwakalinga cimwe,
3kaci nge kapilixitu uze vawavisa lyehi mwavulumuna nakuneha mutonga hali vatu vakwavo, kaha akahane ngombe wacikuji walivuvu wakuzeneka katenga, kumuhana kuli Yehova hamulonga wenyi navulumuna, kupwa wana wahaxili.
4Akanehe uze ngombe wacikuji kucikolo cambalaka yakuliwanyina kumeso aYehova. Akanangike livoko lyenyi hamutwe wayauze ngombe wacikuji, akajihe uze ngombe wacikuji kumeso aYehova.
5Kapilixitu uze vawavisa lyehi akambate kumanyinga ayauze ngombe wacikuji, akawanehe kumbalaka yakuliwanyina.
6Kapilixitu akatupike munwe wenyi mumanyinga, akasapwile manyinga katanu nakavali kumeso aYehova, kulutwe lwalihina lyakuvatasana lyamuzuvo yajila.
7Kapilixitu akahake manyingamwe hajimbinga jalijiko lyakulumbila vize vyalivumba lyamwaza kumeso aYehova, eli lili mumbalaka yakuliwanyina. Kaha manyinga ayauze ngombe wacikuji osena akawahingunwine kuxina yalijiko lyakulumbila mawana akulumba, olyo lili kucikolo cambalaka yakuliwanyina.
8Maji angombe wacikuji wawana wahaxili osena akamufumisewo, namaji aze ali helu lyavize vyamujimo, namaji osenaze ali havize vyamujimo,
9najiyise josena jivali namaji aliho ali kumitanda, naciwuva camaji cili halisuli akacifumiseko najiyise hamwe,
10nge omu veji kuvifumisanga kungombe wakuvatula wamawana akulweza keke. Kapilixitu akavilumbile halijiko lyakulumbila mawana akulumba.
11Kaha lilambu lyangombe wacikuji nanyama yenyi yosena namutwe wenyi namahinji enyi navize vyamujimo lyenyi natuji twenyi,
12ngombe wacikuji wosena vene akamutwale kusali yacilombo kuma kutoma, oku veji kukombelanga wuto, kaha akamulumbileko hajikunyi hakakahya. Okwo veji kukombelanga wuto, kwokwo vene vakamulumbileko.
13Kaci nge lizavu lyavaIsalele lyosena nalitamuka, nge cuma kana kacalumbunukile kumeso aliwukako, nge vanalingi cuma cimwe cavyuma vyosena vize nakande Yehova ngwenyi, Kanda vakavilingako, nakupwa namulonga,
14omu naulinga mulonga wavo vanavulumuna unalumbunuka lyehi, kaha liwuka likanehe ngombe wacikuji walivuvu kupwa wana wahaxili, vakamunehe kulutwe lwambalaka yakuliwanyina.
15Vakulwane jalizavu vakanangike mavoko avo hamutwe wayauze ngombe wacikuji kumeso aYehova, vakajihile uze ngombe wacikuji kumeso aYehova.
16Kapilixitu uze vawavisa lyehi akanehe kumanyinga angombe wacikuji kumbalaka yakuliwanyina.
17Kaha kapilixitu akatupike munwe wenyi mumanyinga, akawasapwile katanu nakavali kumeso aYehova kulutwe lwalihina lyakuvatasana.
18Akakwite kumanyingaze hajimbinga jalijiko lyakulumbila eli lili kumeso aYehova, eli lili mumbalaka yakuliwanyina. Kaha manyingosena akawahingunwine kuxina yalijiko lyakulumbila mawana akulumba, olyo lili kucikolo cambalaka yakuliwanyina.
19Maji enyi osena akawafumiseko, akawalumbile halijiko lyakulumbila.
20Akalinge nangombe wacikuji uze nganomu alinganga nangombe wacikuji wawana wahaxili, mukiko mumwakalinga nayou. Ngoco kapilixitu mwavalingila cakufwika xili, kaha navavakonekela.
21Kaha akatwale uze ngombe wacikuji kusali yacilombo, akamulumbe nganomu alumbanga ngombe wacikuji wakulivanga. Unapu wana wahaxili wahaliwuka.
22Omu mwavulumuna muka-kuyula, nakutamuka hakulinga cuma cimwe cavyuma vyosena vize nakande Yehova Kalunga kenyi ngwenyi, Kanda vakavilingako, nakupwa namulonga,
23kaci nge vanamulumbunwina mutonga wenyi navulumuna, akanehe wana wenyi wapembe, cilunga wakuzeneka katenga.
24Akanangike livoko lyenyi hamutwe wapembe, akamujihile oku veji kujihilanga wana wakulumba kumeso aYehova. Unapu wana wahaxili.
25Kapilixitu akambate kumanyinga awana wahaxili namunwe wenyi, akawakwite kujimbinga jalijiko lyakulumbila mawana akulumba. Kaha manyingenyi akawahingunwine kuxina yalijiko lyakulumbila mawana akulumba.
26Maji enyi osena akawalumbile halijiko lyakulumbila, nge mwamaji acimuna wakuvatula wamawana akulweza keke. Ngoco kapilixitu mwamulingila cakufwika hamulonga wenyi, kaha navamukonekela.
27Kaci nge kuli vaka-lifuci lyenu mutu umwe mwavulumuna hakutamuka, nge mwalinga cuma cimwe cavyuma vyosena vize nakande Yehova ngwenyi, Kanda vakavilingako, nakupwa namulonga,
28kaci nge navamulumbunwina mutonga wenyi navulumuna, akanehe wana wenyi wapembe, cipwevo wakuzeneka katenga, hamulonga wenyi navulumuna.
29Akanangike livoko lyenyi hamutwe wawana wahaxili, akajihile wana wahaxili oku kwamawana akulumba.
30Kapilixitu akambate kumanyingenyi namunwe wenyi, akawakwite kujimbinga jalijiko lyakulumbila mawana akulumba. Kaha manyingenyi osena akawahingunwine kuxina yalijiko lyakulumbila.
31Maji enyi osena akawafumiseko, nganomu veji kufumisanga maji kucimuna wakuvatula wamawana akulweza keke. Kapilixitu akawalumbile halijiko lyakulumbila, kupwa livumba lyalupengopengo kuli Yehova. Ngoco kapilixitu mwamulingila cakufwika xili, kaha navamukonekela.
32Kaci nge mwaneha mwanamukoko kupwa wana wenyi wahaxili, akamunehe cipwevo wakuzeneka katenga.
33Akanangike livoko lyenyi hamutwe wawana wahaxili, akamujihile kupwa wana wahaxili oku veji kujihilanga mawana akulumba.
34Kapilixitu akambate kumanyinga awana wahaxili namunwe wenyi, akawakwite hajimbinga jalijiko lyakulumbila mawana akulumba. Kaha manyingenyi osena akawahingunwine kuxina yalijiko lyakulumbila.
35Maji enyi osena akawafumiseko, nganomu veji kufumisanga maji amwanamukoko kucimuna wakuvatula wamawana akulweza keke. Kapilixitu akawalumbile halijiko lyakulumbila, hamawana aYehova akwoca hakakahya. Ngoco kapilixitu mwamulingila cakufwika mutonga wenyi navulumuna, kaha navamukonekela.
Currently Selected:
VYAVALEVI 4: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
