VYAVALEVI 23
23
Viwanyino vyakutongola
(Kula. 28.16—29.40)
1Yehova ahanjikile kuli Mose ngwenyi,
2Hanjika kuli vana vaIsalele uvambulile ngwove, Viwanyino vyaYehova vyakutongola, evi namukavilika kupwa kulikungulula cajila, evi vikiko Viwanyino vyami vyakutongola.
3Vazatenga milimo makumbi atanu nalimwe. Oloze halikumbi lyamucitanu naavali hali kunoka casambata yayilemu, kulikungulula cajila. Kanda muzataho cipwe milimo yimweko. Yikiko sambata kuli Yehova kwexokwo munatwame.
4Evi vikiko viwanyino vyaYehova vyakutongola, kulikungulula cajila, evi namukavilika hamyaka yavyo yakutongola.
5Hakakweji wakulivanga, halikumbi lyakakweji lyakusokesa mulikumi naawana, hacingoloxi, hali paseka yaYehova.
6Kaha halikumbi lyakakweji kana lyakusokesa mulikumi naatanu hali ciwanyino cambolo yakuzeneka cimbalwila kuli Yehova. Makumbi atanu naavali mukalyanga mbolo yakuzeneka cimbalwila.
7Halikumbi lyakulivanga mukapwe nakulikungulula cajila, kanda mukazataho milimo yakukilikita yimweko.
8Oloze mukahananga wana wakwoca hakakahya wakuhana kuli Yehova makumbi atanu naavali. Halikumbi lyamucitanu naavali hakapwe kulikungulula cajila, kanda mukazataho milimo yimwe yakukilikitako.
9Yehova ahanjikile kuli Mose ngwenyi,
10Hanjika kuli vana vaIsalele uvambulile ngwove, Omu namukalinga himunengila lyehi mulifuci lize nangumihana, omu namukahako kulya, numba mukanehe mukuta wambuto jakulivanga kukulya cenu namukaha kuli kapilixitu.
11Ikiye akahungise mukuta kana kumeso aYehova, mangana awitavile hali enu. Kapilixitu akauhungise halikumbi lyakukava sambata.
12Kaha halikumbi lize namukahungisa mukuta kana, mukahana mwanamukoko wacilunga wakuzeneka katenga wamwaka umwe, kupwa wana wakulumba wakuhana kuli Yehova.
13Wana wawo wakulya ukapwe vimbwa vivali vyakusokesa muvimbwa vyalifwa likumi vyawunga wakusalulula vanahingunwina lyehi maji, kupwa wana wakwoca hakakahya wakuhana kuli Yehova, livumba lyalupengopengo. Wana wawo wakuhingununa ukapwe wavinyo, cimbwa cimwe cakusokesa muvimbwa vyahine viwana.
14Kanda mukalya mboloko, cipwe manona akwoca, cipwe mitwe yituta, kuvanga halikumbi lize, kuvangomu namukalinga himunanehe lyehi wana waKalunga kenu. Cinapu cilika haya myaka yosena mukusemunwina cenu cosena kwexokwo munatwame.
15Mukalava makumbi kufumisa kulikumbi lyakukava sambata, kufumisa kulikumbi lize mwanehele uze mukuta wawana wakuhungisa, mukahite jisambata jitanu najivali lukombo,
16palanga nakulikumbi lyakukava sambata yamucitanu najivali, mukalavilako makumbi makumi atanu. Kaha mukahana wana wakulya wauhya kuli Yehova.
17Kujizuvo jenu mukalovola jimbolo jakuhungisa jivali javimbwa vivali vyakusokesa muvimbwa vyalifwa limwe likumi. Jikapwe jawunga wakusalulula. Vakajoce nacimbalwila, kupwa mbuto jakulivanga jakuhana kuli Yehova.
18Hamwe najimbolo jize mukahane vana vamikoko vakuzeneka katenga vamwaka umwe vatanu navavali, nangombe wacikuji walivuvu, navizamba jamikoko vavali. Vakapwe wana wakulumba wakuhana kuli Yehova, nawana wavo wakulya hamwe, namawanavo akuhingununa. Ukiko wana wakwoca hakakahya, walivumba lyalupengopengo kuli Yehova.
19Kaha mukahana pembe wacizamba umwe kupwa wana wahaxili, navana vamikoko vavilunga vamwaka umwe vavali kupwa vimuna vakuvatula vamawana akulweza keke.
20Kapilixitu akavahungise najize jimbolo jajimbuto jakulivanga, kupwa wana wakuhungisa kumeso aYehova, navaze vana vamikoko vavali. Navakapwa vajilila Yehova, vakapilixitu.
21Mukavilika halikumbi lize, hakapwe kulikungulula cajila kuli enu. Kanda mukazataho milimo yakukilikita yimweko. Cinapu cilika haya myaka yosena kwexokwo munatwame mukusemunwina cenu cosena.
22Omu namukaha kulya cakulifuci lyenu, kanda mukaha nakumanyisa kwosena kusembwa jamawande enuko, kaha kanda mukakongola vize vyakuhuhulula kukulya cenu namukahako. Mukavaseiavyo vaka-kuhutwa navaze vazuzumanako. Ami yami Yehova Kalunga kenu.
23Yehova ahanjikile kuli Mose ngwenyi,
24Hanjika kuli vana vaIsalele ngwove, Hakakweji wamucitanu navavali, halikumbi lyakakweji lyakulivanga, hakapwe kunoka casambata yayilemu kuli enu, cakwanukilaho nakwimba jineta, kulikungulula cajila.
25Kanda mukazataho milimo yakukilikita yimweko, kaha mukahana wana wakwoca hakakahya wakuhana kuli Yehova.
26Yehova ahanjikile kuli Mose ngwenyi,
27Oloze halikumbi lyakakweji kana wamucitanu navavali lyakupwisa likumi hali likumbi lyakulinga cakufwika xili. Cikapwe kulikungulula cajila kuli enu, kaha mukaliyanjisa myono yenu, mukahane wana wakwoca hakakahya wakuhana kuli Yehova.
28Halikumbi lize kanda mukazata milimo yimweko, mwomwo likiko likumbi lyakulinga cakufwika xili, lyakumilingila cakufwika xili kumeso aYehova Kalunga kenu, xikaho.
29Mwomwo wose mutu wakukana kuliyanjisa halikumbi lize, navakamuteta muli vatu vakwavo.
30Kaha wose mutu mwakazata milimo halikumbi lize, mutu uze nangukamunongesa muli vatu vakwavo.
31Kanda mukazataho milimo yimweko. Cinapu cilika haya myaka yosena mukusemunwina cenu cosena kwexokwo munatwame.
32Cikapwe kunoka casambata yayilemu kuli enu, kaha mukaliyanjisa myono yenu. Mukalama sambata yenu halikumbi lyakakweji kana lyamucitanu naawana hacingoloxi, kufumisa kucingoloxi nakuheta kucingoloxi.
33Yehova ahanjikile kuli Mose ngwenyi,
34Hanjika kuli vana vaIsalele ngwove, Halikumbi lyayou kakweji wamucitanu navavali lyakusokesa mulikumi naatanu hali ciwanyino cavisakila kuli Yehova makumbi atanu naavali.
35Halikumbi lyakulivanga hakapwe kulikungulula cajila. Kanda mukazataho milimo yakukilikita cipwe yimweko.
36Makumbi atanu naavali mukahanenga wana wakwoca hakakahya wakuhana kuli Yehova. Halikumbi lyamucitanu naatatu hakapwe kulikungulula cajila kuli enu, kaha mukahana wana wakwoca hakakahya wakuhana kuli Yehova. Cikiko kuwunga cacilemu. Kanda mukazataho milimo yakukilikita cipwe yimweko.
37Evi vikiko viwanyino vyaYehova vyakutongola, evi namukavilika kupwa kulikungulula cajila, mangana mukahane wana wakwoca hakakahya wakuhana kuli Yehova, nawana wakulumba, nawana wakulya, nacimuna wakuvatula, namawana akuhingununa, ou halikumbi lyawo ou halikumbi lyawo.
38Kaha kuli jisambata jaYehova nawa, namawanenu nawa, navyenu vyosena vize munaxiki nawa, namawanenu akuhana akulyanukila osena, awa namuhana kuli Yehova.
39Oloze halikumbi lyayou kakweji wamucitanu navavali lyakusokesa mulikumi naatanu, omu namukalinga himunakungula lyehi jimbuto jakwima kulifuci, mukalamenga ciwanyino caYehova makumbi atanu naavali. Halikumbi jakulivanga hakapwe sambata yayilemu, kaha halikumbi lyamucitanu naatatu hakapwe sambata yayilemu.
40Halikumbi jakulivanga mukalimbacila mihako yamitondo yamwaza, namitango yamikoma, namitango yamitondo yakujika mafo, namisombo yakukalwiji. Kaha mukawahililenga makumbi atanu naavali kumeso aYehova Kalunga kenu.
41Mukacilamenga kupwa ciwanyino kuli Yehova makumbi atanu naavali hamwaka hamwaka. Cinapu cilika haya myaka yosena mukusemunwina cenu cosena. Mukacilamenga hakakweji wamucitanu navavali.
42Mukatwamanga muvisakila makumbi atanu naavali, enu muvosena munasemukila mulifuci muli vaIsalele mukatwamenga muvisakila.
43Mangana vana venu navakasemuwa vakatacikize omu ngwatwamixilenga vana vaIsalele muvisakila hakuvalovola mulifuci lyaEjipitu. Ami yami Yehova Kalunga kenu.
44Kaha Mose avambulilile vana vaIsalele Viwanyino vyaYehova vyakutongola.
Currently Selected:
VYAVALEVI 23: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
