VYAVALEVI 22
22
Omu ajila mawana navahana
1Yehova ahanjikile kuli Mose ngwenyi,
2Hanjika kuli Alone nakuli vana venyi mangana valihandunune kuvyuma vyavana vaIsalele vyajila, ovyo veji kungujilikilanga, kanda vakajilula lijina lyami lyajilako. Ami yami Yehova.
3Vambulile ngwove, Wexowo muka-tanga yenu yosena mukusemunwina cenu cosena, ou mwapandama kuvyuma vyajila, evi veji kumujilikilanga Yehova kuli vana vaIsalele, nakupihya cenyi calambwe, mutu uze navakamuteta kumeso ami. Ami yami Yehova.
4Wexowo muka-tanga yaAlone, ou napu muka-mbumba, cipwe ali navimwe vili nakumuhita, kanda alya kuvyuma vyajilako, kuvangomu natomo. Kaha wexowo mwakwata hacuma hicuma cinapihi kuli mufu, cipwe hali lunga omu nayimufuma mbuto yenyi,
5mokomoko Wexowo mwakwata hali muka-kuhalala wakuhasa kumupihisa, cipwe hali mutu nahase kumupihisa, kukupihya cenyi cosena,
6mutu ou mwakwata hali ava vangacize mwapihya palanga nahakulauka calikumbi, kanda alya kuvyuma vyajilako, xina kuvanga nasane lyehi meya mumujimba wenyi.
7Omu nalilauka likumbi, numba atome, numba himwalya kuvyuma vyajila, mwomwo vikiko kulya cenyi, xikaho.
8Owo wakulifwila, cipwe ou vanatanye kuli visuma, kanda amulya nakulipihisa nenyiko. Ami yami Yehova.
9Xikaho valamengomu ngunavalweze, kucina, nge navajilulamo, navambacilamo mutonga nakufwilamo. Ami yami Yehova nguMuka-kuvajilika.
10Mutu weka kanda akalya kucuma cajilako. Ou wakuzuzumana nakapilixitu, cipwe ngamba wakufweta, kanda akalya kucuma cajilako.
11Oloze kaci nge kapilixitu mwalanda mutu, ndando yajimbongo jenyi, ikiye alyengako. Navaze vakusemukila kuzuvo yenyi nawa, vakivo valyenga kukulya cenyi.
12Kaci nge mwanakapilixitu wapwevo mwasomboka kuli muka-muyaci weka, kanda akalya kuwana wakuzundula wakuvyuma vyajilako.
13Oloze kaci nge mwanakapilixitu wapwevo napu tuliwe, mokomoko vamutumbika lyehi, nge kexi namwanako, nakinduluka ceka kuzuvo yaise nge haunyike wenyi, kaha ikiye alyenga kukulya caise. Oloze mutu weka kanda akalyakoko.
14Kaci nge mutu mwatamuka nakulya kucuma cajila, kaha ahakileko cimbwa cimwe cakusokesa muvimbwa vitanu, kaha cuma kana cajila acihane kuli kapilixitu.
15Kaha vyuma vyavana vaIsalele vyajila evi veji kuhananga kuli Yehova, kanda vakavijilulako
16nakuvambacisa kuhenga cakuvapayisa omu navalya vyuma vyavo vyajilako. Mwomwo Ami yami Yehova, nguMuka-kuvajilika, xikaho.
17Yehova ahanjikile kuli Mose ngwenyi,
18Hanjika kuli Alone nakuli vana venyi nakuli vana vaIsalele vosena, uvambulile ngwove, Kuzuvo yaIsalele, cipwe kuli ava vazuzumana muli vaIsalele, wexowo mwahana wana wenyi, cipwe ou wahavize vanaxiki, cipwe ou wahamawanavo akulyanukila, ou navahana kuli Yehova kupwa wana wakulumba,
19kulinga mangana vamitavile, muhana cilunga wakuzeneka katenga, cipwe wangombe, cipwe wamukoko, cipwe wapembe.
20Oloze wose ali nakatenga, kanda mukamuhanako, mwomwo kavexi kumwitavila hali enuko.
21Wose mwamuhana Yehova cimuna wakuvatula wamawana akulweza keke, mangana alinge nge mwanaxiki, mokomoko wakuhana cakulyanukila, wakuutanga wavangombe cipwe wakuutanga wavimuna vavandende, apwe wakuzeneka katenga numba vamwitavile. Kanda akapwa nakatengako.
22Wafwa-meso, cipwe wakuhokoka, cipwe citendele, cipwe nambandu, cipwe namukule, cipwe najikako, ava kanda mukavahana kuli Yehovako, cipwe kuvahana kupwa wana wakwoca hakakahya wakuhana kuli Yehova halijiko lyakulumbilako.
23Cipwe ngombe wacikuji, cipwe musamba, ou ali nacimwe cacisuku mokomoko nacimwe cacihi kumujimba wenyi, ikiye namuhasa kumuhana kupwa wana wakulyanukila tuhu. Oloze kumuhana hakuxika kavexi kumwitavilako.
24Ou ali najimbindu jenyi vanaxindakanya, mokomoko jakucikika, mokomoko vanalutula, mokomoko jakuteta, kanda mukamuhana kuli Yehovako, kaha kanda mukalinga ngoco mulifuci lyenuko.
25Cipwe kulivoko lyamuka-muyaci weka kanda mukahana kulya caKalunga kenu kuli ava vosenako, mwomwo kupihya cavo vali naco, xikaho. Vali nakatenga, kavexi kuvetavila hali enuko.
26Yehova ahanjikile kuli Mose ngwenyi,
27Omu mwasemuwa mwanangombe, cipwe mwanamukoko, cipwe mwanapembe, kaha atwamenga makumbi atanu naavali kuli naye. Kufumisa kulikumbi lyamucitanu naatatu navamwitavila kupwa wana wakwoca hakakahya wakuhana kuli Yehova.
28Cipwe napu ngombe wacitole, cipwe mukoko wacipwevo, kanda mukamujiha namwanenyi vosena vavali halikumbi limweko.
29Omu namuvatula cimuna wakusakwila wakuhana kuli Yehova, mumuvatula mangana vamitavile.
30Vakamulye halikumbi lize vene, kanda mukasezaho nahakucako. Ami yami Yehova.
31Xikaho lamenunga jiximbi jami, mujilingenga. Ami yami Yehova.
32Kanda mukajilula lijina lyami lyajilako, Oloze vangujililenga muli vana vaIsalele. Ami yami Yehova, nguMuka-kumijilika,
33ngwamilowele mulifuci lyaEjipitu mangana ngupwenga nguKalunga kenu. Ami yami Yehova.
Currently Selected:
VYAVALEVI 22: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
