VYAVALEVI 21
21
Omu vajila vapilixitu
1Yehova ambile kuli Mose ngwenyi, Hanjika kuli vapilixitu vana vaAlone uvambulile ngwove, Mutu kanda akalipihisa hali vafu muli vatu vakwavoko,
2xina hali kausoko wenyi wakucisaka cenyi, hali naye, nahali ise, nahali mwanenyi walunga, nahali mwanenyi wapwevo, nahali ndumbwenyi walunga,
3nahali ndumbwenyi wapwevo acili kanda alimone nalunga, ou wamujimo lyavo, ou azeneka lunga lyenyi, mwahasa kulipihisa hali ikiye.
4Kanda akalipihisa nakujilulukako, mwomwo ikiye mwata muli vatu vakwavo, xikaho.
5Kanda vakalisevesa kumitwe yavoko, kaha kanda vakatewula mavinji awevu wavoko, cipwe kucata jicato kumijimba yavoko.
6Vapwenga yajilila Kalunga kavo, kanda vakajilula lijina lyaKalunga kavoko, mwomwo veji kuhananga mawana aYehova akwoca hakakahya, kulya caKalunga kavo. Xikaho vapwenga vajila.
7Pwevo muka-ujila, cipwe ou vajilula lyehi, kanda vamumbatako. Kaha pwevou vanatumbika lyehi kuli lunga lyenyi kanda vamumbatako, mwomwo kapilixitu najilila Kalunga kenyi.
8Xikaho mumujilike, mwomwo eji kuhananga kulya caKalunga kenu. Apwenga wajila kuli enu, mwomwo Ami Yehova Muka-kumijilika ngwajila, xikaho.
9Kaha pwevo mwanakapilixitu, kaci nge mwalijilula nakulinga ujila, najilula ise. Vamulumbe hakakahya.
10Kapilixitu wakulitulaho muli vandumbwenyi, ou vanahingunwina maji akuwavisa hamutwe wenyi nakuhandunwina kuupilixitu mangana avwalenga vize vyakuvwala, kanda akatwama nalipupi kumutwe wenyiko, kaha kanda akapula mahinenyiko.
11Kanda akengila muli mujimba wamufuko, kanda akalipihisa hali iseko, cipwe hali naye.
12Kanda akalovoka muzuvo yajilako, kanda akajilula zuvo yaKalunga kenyi yajilako. Mwomwo mucama wamaji aKalunga kenyi akuwavisa uli hali ikiye, xikaho. Ami yami Yehova.
13Akambate pwevo acili kanda alimone nalunga.
14Pwevo watuliwe, cipwe ou vanatumbika, cipwe ou vanajilula, cipwe muka-ujila, kanda akamumbatako. Oloze akambate pwevo lyenyi wakuli vatu vakwavo uze acili kanda alimone nalunga.
15Kanda akajilula tanga yenyi muli vatu vakwavoko, mwomwo Ami yami Yehova nguMuka-kumujilika, xikaho.
16Yehova ahanjikile kuli Mose ngwenyi,
17Hanjika kuli Alone ngwove, Kutanga yove mukusemunwina cavo cosena, wexowo ali nakutenga kanda akapandama nakuhana kulya caKalunga kenyiko.
18Mwomwo mutu himutu ali nakatenga kanda akapandamako, cipwe kapuputa, cipwe muka-kumbilikita, cipwe ou wakufufumana muzulu, cipwe ou ali nacimwe cacisuku cikuma,
19cipwe ou wakutenguka kulihinji, cipwe ou wakutenguka kulivoko,
20cipwe ou ali nakunda, cipwe kaxeta, cipwe ou ali namutoyo haliso lyenyi, cipwe ou ali namukule, cipwe ou ali najikako, cipwe ou wakucikika jimbindu.
21Mutu himutu wakutanga yakapilixitu Alone, ou ali nakatenga kanda akapandama nakuhana mawana aYehova akwoca hakakahyako. Ali nakatenga, kanda akapandama nakuhana kulya caKalunga kenyiko.
22Alyenga kulya caKalunga kenyi, naceci cajila cikuma naceci cajila.
23Oloze kanda akengila nakulihina lyakuvatasanako, kaha kanda akapandama kulijiko lyakulumbilako, mwomwo ali nakatenga, xikaho. Kucina mwakajilula kwami kwajila, mwomwo Ami yami Yehova nguMuka-kuvajilika.
24Ngoco Mose ahanjikile kuli Alone nakuli vana venyi nakuli vana vaIsalele vosena.
Currently Selected:
VYAVALEVI 21: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
