VYAVALEVI 20
20
Omu navakavazangamisava navakalinga vyavipi
1Yehova ahanjikile kuli Mose ngwenyi,
2Kaha Vambulile nawa vana vaIsalele ngwove, Kuli vana vaIsalele, mokomoko kuli vangeji vakuzuzumana muli vana vaIsalele, Wexowo mwakahana mwanenyi umwe kuli #20.2:Tala 18.21.Moleke, vakamujihe cakumujiha. Vatu vaka-lifuci vakamwase malolwa.
3KahAmi nawa nangukamutala mutu uze nautenu nakumuteta muli vatu vakwavo, mwomwo nahane mwanenyi kuli Moleke mangana apihise kwami kwajila, nakujilula lijina lyami lyajila, xikaho.
4Kaci nge vaka-lifuci navakamufwikila mutu uze meso avo omu mwakahana mwanenyi kuli Moleke, nge kavexi kumujihako,
5kahAmi nangukamutala mutu uze nautenu, nacisaka cenyi, kaha nangukamutetamo, navaze nawa navakalinga ujila nakumukava vosena, ava navakalinga ujila nakukava Moleke, nangukavateta muli vatu vakwavo.
6Mutu uze mwakalumukila kuli vaze navasanyika vaxipilitu vakutahisa, nakuli vaka-kulyongela upolofweto, mangana akalinge ujila nakuvakava, nangukamutala mutu kana nautenu, kaha nangukamuteta muli vatu vakwavo.
7Xikaho lijilikenu, #Petu. 1, 1.16.mupwenga mwajila, mwomwo Ami yami Yehova Kalunga kenu.
8Lamenunga vilika vyami muvilingenga. Ami yami Yehova nguMuka-kumijilika.
9Mwomwo wose mwangula ise cipwe naye, vamujihe cakumujiha. Ikiye nangula ise cipwe naye. Mulonga wamanyingenyi naupwa hali ivene.
10Lunga uze mwalinga ujila napwevo lyambala, ou vene mwalinga ujila napwevo lyamukwavo, nalunga uka-ujila napwevo muka-ujila vavajihe cakuvajiha.
11Kaha lunga uze mwasavala napwevo lyaise nawuwulula usonyi waise. Vavajihe vosena vavali cakuvajiha. Mulonga wamanyingavo naupwa hali vavene.
12Kaci nge lunga mwasavala napwevo lyamwanenyi, vavajihe vosena vavali cakuvajiha. Vanazate mwakuhingama cikuma, mulonga wamanyingavo naupwa hali vavene.
13Kaci nge lunga mwasavala nalunga nge napwevo, vosena vavali vanalingi mwaunyengwe. Vavajihe cakuvajiha. Mulonga wamanyingavo naupwa hali vavene.
14Kaci nge lunga mwambata pwevo nanaye, cinapu kuzunguma. Vavalumbe hakakahya, naikiye navakivo, mangana muli enu muzeneke kupwa kuhuka.
15Kaci nge lunga mwasavala nakanyama, vamujihe cakumujiha, kaha vajihe uze kanyama.
16Kaci nge pwevo mwapandama kuli kanyama mangana amusavaleko, jihenu pwevo nakanyama. Vavajihe cakuvajiha. Mulonga wamanyingavo naupwa hali vavene.
17Kaci nge lunga mwambata ndumbwenyi wapwevo, mwanaise, cipwe mwananaye, nge mwamona usonyi wenyi, napwevo nawa mwamona usonyi wenyi, cikiko cakwivwisa sonyi, kaha navakavateta kumeso avatu vakwavo. Nawuwulula usonyi wandumbwenyi, mwambata kuhenga cenyi.
18Kaci nge lunga mwasavala napwevo ali kusali, nakuwuwulula usonyi wenyi, nawuwulula kwakuhicila manyingenyi, kaha pwevo naliwuwulula kwakuhicila manyingenyi. Vosena vavali navakavateta muli vatu vakwavo.
19Kanda ukawuwulula usonyi wandumbwanokoko, cipwe waisopwevo, mwomwo ou wangana nawuwulula kausoko wenyi. Navambata kuhenga cavo.
20Kaci nge lunga mwasavala napwevo lyanatwenyi, nawuwulula usonyi wanatwenyi. Navambata mutonga wavo waxili, navakafwa cakuzeneka vana.
21Kaci nge mutu mwambata pwevo lyandumbwenyi cinapu kupihisa.
Nawuwulula usonyi wandumbwenyi. Navakazeneka vana.
22Xikaho lamenunga vilika vyami vyosena namazu ami akuyula osena, muvilingenga, mangana lifuci lize nguli nakumitwala mukatwamenga likazeneke kumisaza.
23Kanda mukatambukanga nganomu veji kulinganga vaka-lifuci kana nguli nakuhanga kumeso enu, mwomwo vakivo valingilenga vyosenevi, xikaho ngwavevwilile unyengwe.
24Oloze ngunamyambenu ngwami, Enu namukaswana lifuci lyavo, kaha nangukamihanalyo mukalihete, likiko lifuci lyakumbwambumuka mavele nawuci. Ami yami Yehova Kalunga kenu, ngunamihandununa kuli vatu veka.
25Xikaho handununenu mukaci kakanyama utoma nayou wamupi, mukaci kakajila wamupi nayou utoma, kaha kanda mukalingisa myono yenu kupwa yaunyengwe nakanyama, cipwe nakajila, cipwe nawose muka-kuhalala hamavu, ou ngunahandununa kuli enu ngwami, wamupiko.
26Kaha jililenunga kuli Ami, mwomwo Ami Yehova ngwajila, kaha ngunamihandununa kuli vatu veka mangana mupwenga muvami.
27Kaha lunga nawa, cipwe pwevo, ou ali naxipilitu wakutahisa, cipwe napu muka-kulyongela upolofweto, vavajihe cakuvajiha. Vavase malolwa. Mulonga wamanyingavo naupwa hali vavene.
Currently Selected:
VYAVALEVI 20: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
