VYAVALEVI 19
19
Jiximbi jakuvuluka kujila naciyulo
1Yehova ahanjikile kuli Mose ngwenyi,
2Hanjika kulizavu lyavana vaIsalele lyosena uvambulile ngwove, #Petu. 1, 1.16.Pwenunga mwajila, mwomwo Ami Yehova Kalunga kenu ngwajila, xikaho.
3Mutu himutu evwenga woma wanaye naise, kaha mulamenga jisambata jami. Ami yami Yehova Kalunga kenu.
4Kanda mukalumukila #19.4:Ngwavo, Kuvyuma vyauci. Tala Samu 96.5.kumakombeloko, kaha kanda mukalitengela tulunga vakuzuzululako. Ami yami Yehova Kalunga kenu.
5Omu namumuvatwila Yehova cimuna wakuvatula wamawana akulweza keke, mukamuvatule mangana amitavile.
6Vakamulye halikumbi lize namukamuvatula, nahakuca nawa. Kaha kaci nge nakusalaho kamwe nakulikumbi lyamucitatu nawa, vakakalumbe hakakahya.
7Kaci nge kulya navakamulya halikumbi lyamucitatu, wana kana unapu waunyengwe, kavexi kuwitavilako.
8Oloze wose mwamulya mwambata kuhenga cenyi, mwomwo najiluloco caYehova cajila, xikaho. Kaha mutu uze navakamuteta muli vatu vakwavo.
9Kahomu namukaha kulya kumawande enu, kanda mukacaha lukombo nakusembwa jamawande enuko, kaha kanda mukakungula vize vyakuhuhulula vyakukulya cenu namukahako.
10Kanda mukahuhulula kumawande enu amivinyoko, kaha kanda mukakungula mihako yakuliholokela kumawande enu amivinyoko. Mukavaselayo vaka-kuhutwa navaze vazuzumanako. Ami yami Yehova Kalunga kenu.
11Kanda mukevako, kaha kanda mukatangisako, cipwe kulyonga navakwenu.
12 #
Kulo. 20.7. Kanda mukalixinga lijina lyami mwakwonga nakujilula lijina lyaYehova Kalunga kenuko. Ami yami Yehova.
13Kanda mukalyapula vakwenuko, cipwe kuvapupa. Fweto yangamba wakufweta kanda yikatwama ufuku wosena kuli enu nahakucako.
14Kanda mukangula kajikamatwitwiko, kaha kanda mukahaka cimbunji kumeso akapuputako, oloze mungwivwangAmi Kalunga kenu woma. Ami yami Yehova.
15Kanda mukahengesa ciyuloko. Kanda mukakomoka meso amukakuhutwako, kaha kanda mukavumbika meso ayou wamulemuko. Oloze mukayula vakwenu mwakwoloka.
16Kanda mukakimbwojoka nasaki muli vatu vakwenuko, kaha kanda mukemanyina manyinga aminenuko. Ami yami Yehova.
17 #
Yowa. 1, 2.9-11; 3.15. Kanda mukahunga vandumbwenu mumicima yenuko. Mukahanjikila vakwenu cakuvahanjikila, kanda mukambacila mulonga waxili hali vakivoko.
18 #
Luxi. 32.35; Loma 12.19; Hepe. 10.30. Kanda mukalitendako, kaha kanda mukalama koko navana vavatu vakwenuko. #Mateu 19.19; Mako 12.31; Luka 10.27; Loma 13.9.Zangenunga vakwenu nganomu mwalizangilenu vavene. Ami yami Yehova.
19Lamenunga vilika vyami. Vimuna jenu kanda mukavetava kusema navava vambuto yekako. Kumawande enu kanda mukakuvako jimbuto jamiyaci yivaliko. Kanda mukavwala lihina lyawanda weka naweka wakucingasanako.
20Wexowo mwalimona napwevo wandungo ou vanahuhu lyehi kuli lunga, ou vazeneka kusokola cipwe kweca, vavazangamise. Kanda vavajihako, mwomwo uze pwevo kapwile mwanakacisemiko, xikaho.
21Uze lunga anehe wana wenyi wahakuhingika kuli Yehova kucikolo cambalaka yakuliwanyina, cizamba camukoko wawana wahakuhingika.
22Kapilixitu mwamulingila cakufwika xili kumeso aYehova nayauze cizamba wawana wahakuhingika, hamulonga wenyi waxili uze navulumuna. Kaha mulonga wenyi waxili uze navulumuna navamukonekelawo.
23Omu namukaheta mulifuci, omu namukalinga munatumbu lyehi mitondo yakulya yosena yeka nayeka, numba mukamone mihako yayo nge hiulima wayo. Mitondo mukayimonanga nge vilima myaka yitatu. Kanda mukalyakoko.
24Oloze hamwaka wamuciwana mihako yayo yosena yikapwe yajila yakwalisa Yehova.
25Kaha hamwaka wamucitanu mukalye mihako yayo, mangana yikamimine mihako yayivulu. Ami yami Yehova Kalunga kenu.
26Kanda mukalya nyama yimwe namanyingako. Kanda mukapandako, kaha kanda mukataha mangana akuswekako.
27Kanda mukatewula mavinji kumitwe yenuko, cipwe kwenyeka mavinji awevu wenuko.
28Kanda mukacata jicato kumijimba yenu hali vafuko, cipwe kulisoneka jisonako. Ami yami Yehova.
29Kanda mukajilula vana venu vamapwevo nakuvalingisa ujilako, kucina kulifuci nakukavula ujila, kucina lifuci nalikasula nakuzunguma.
30Lamenunga jisambata jami, mukomokenga zuvo yami yajila. Ami yami Yehova.
31Kanda mukalumukila kuli vaze navasanyika vaxipilitu vakutahisako, cipwe kuli vaka-kulyongela upolofweto. Kanda mukavatonda mangana mukalipihise navoko. Ami yami Yehova Kalunga kenu.
32Mukatuka kumeso aukweci jivwi, muvumbikenga meso amukulwane, kaha mumwivwanga Kalunga kenu woma. Ami yami Yehova.
33Kaci nge ngeji mwazuzumana nayenu kulifuci lyenu, kanda mukamulisa nacikelako.
34Ngeji uze nazuzumana nenu mumumonanga nge ou wakusemukila mulifuci ali muli enu. Kaha muzangenunga nganomu mwalizangilenu vavene. Mwomwo enu mwapwile muvaka-kuzuzumana mulifuci lyaEjipitu, xikaho. Ami yami Yehova Kalunga kenu.
35Kanda mukahengesa ciyuloko, cipwe kujiseteko jakweseka kusuhwa, cipwe jakweseka pezo, cipwe jakweseka kuvula.
36Twamenunga navipezaliso vyakuya mwakwoloka, namalolwa akupezalisa akuya mwakwoloka, nalifwa lyakuya mwakwoloka, nahine yakuya mwakwoloka. Ami yami Yehova Kalunga kenu, ngwamilowele mulifuci lyaEjipitu.
37Lamenunga vilika vyami vyosena namazu ami akuyula osena muvilingenga. Ami yami Yehova.
Currently Selected:
VYAVALEVI 19: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
