VYAVALEVI 18
18
Navavakanda kulinga vyuma vyavipi
1Yehova ahanjikile kuli Mose ngwenyi,
2Hanjika kuli vana vaIsalele uvambulile ngwove, Ami yami Yehova Kalunga kenu.
3Muze veji kulinganga kulifuci lyaEjipitu mwatwaminenga kanda mukalingamoko. Kaha muze veji kulinganga kulifuci lyaKanane okwo nangumitwala kanda mukalingamoko. Kanda mukatambuka mwaya vilika vyavoko.
4Lingenunga mwaya mazu ami akuyula, mulamenga vilika vyami mutambukengamo. Ami yami Yehova Kalunga kenu.
5Xikaho lamenunga vilika vyami namazu ami akuyula, #Ngale. 3.12; Luka 10.28; Loma 10.5.vikiko, kaci nge mutu mwavilinganga, mwakayoyelaho. Ami yami Yehova.
6Minenu umwe kanda akapandama kuli kausoko wenyi umwe nakuwuwulula usonyi wenyiko. Ami yami Yehova.
7Usonyi waiso, ukiko vene usonyi wanoko, kanda ukauwuwululako. Ikiye noko, kanda ukawuwulula usonyi wenyiko.
8Usonyi wapwevo lyaiso kanda ukauwuwululako, ukiko vene usonyi waiso.
9Usonyi wandumbwove wapwevo, mwanaiso, cipwe mwananoko, cipwe wakusemukila kumahyove, cipwe wakusemukila kweka, usonyi wavo kanda ukauwuwululako.
10Usonyi wapwevo mwanamwanove walunga, cipwe mwanamwanove wapwevo, usonyi wavo kanda ukauwuwululako, mwomwo owo wavo ukiko usonyi wayove, xikaho.
11Usonyi wapwevo mwanapwevo lyaiso, ou wakusema kuli iso, ikiye ndumbwove, kanda ukawuwulula usonyi wenyiko.
12Kanda ukawuwulula usonyi waisopwevoko, mwomwo ikiye wakusemuka naiso, xikaho.
13Kanda ukawuwulula usonyi wandumbwanokoko, mwomwo ikiye wakusemuka nanoko, xikaho.
14Kanda ukawuwulula usonyi wandumbwaiso walungako, kanda ukapandama kuli pwevo lyenyiko, mwomwo ikiye noko, xikaho.
15Kanda ukawuwulula usonyi wanokowenuko, ikiye pwevo lyamwanove, kanda ukawuwulula usonyi wenyiko.
16Kanda ukawuwulula usonyi wapwevo lyandumbwoveko, mwomwo ukiko usonyi wandumbwove, xikaho.
17Kanda ukawuwulula usonyi wapwevo namwanenyi wapwevoko. Kanda ukambata mwanamwanenyi walungako, cipwe mwanamwanenyi wapwevo, nakuwuwulula usonyi wenyiko. Vakivo vausoko wenyi, kuvambata cinapu kuzunguma.
18Kanda ukahalikila pwevo nandumbwenyi, nakumwivwisa lisungu, nakuwuwulula usonyi wenyi namukwavo hamwe ximbu acili wamutonyiko.
19Kanda ukapandama kuli pwevo nakuwuwulula usonyi wenyi ximbu ali kusali nakupihya cenyiko.
20Kanda ukalimona napwevo lyamukwenu nakulipihisa nenyiko.
21Kanda ukahana mwanove umwe nakumuhicisa mukakahya kuli #18.21:Kalunga kavaka-mafuci eka wakuhumikiza.Molekeko, kaha kanda ukajilula lijina lyaKalunga koveko. Ami yami Yehova.
22Kanda ukasavala nalunga nge napwevoko. Cinapu caunyengwe.
23Kanda ukasavala nakanyama nakulipihisa nenyiko. Kaha pwevo kanda akemana kumeso akanyama mangana amusavaleko. Cinapu kuhingika cikuma.
24Kanda mukalipihisa navyuma vyoseneviko. Mwomwo kuvyuma vyosenevi vaka-mafuci vanalipihixilako, vaze nguli nakuhanga kumeso enu.
25Kaha lifuci linapihi, xikaho nguli nakulizangamisa hakuhenga calyo, kaha lifuci nalisaza vaze vatwamako.
26Xikaho enu lamenunga jiximbi jami namazu ami akuyula, kaha kanda mukalinga vyuma vyaunyengweviko, cipwe ou wakusemukila mulifuci, cipwe ngeji wakuzuzumana muli enu.
27(Mwomwo evi vyaunyengwe vyosena malunga vaka-lifuci lize vanayilingi, vaze valivangile kulutwe lwenu, kaha lifuci linapihi).
28Kucina lifuci nalikamisaza nayenu nawa, omu namukalipihisa, nge omu lyasajile vaka-lifuci vaze valivangile kulutwe lwenu.
29Mwomwo kuvyuma vyaunyengwevi Wexowo mwalinga cuma cimwe, vatu vaze navakavilinga navakavateta muli vatu vakwavo.
30Xikaho lamenunga lizu lyami ngunamilweze, mangana kuvilinga vyaunyengwevi mukanenga kulinga cimwe, evi valingilenga ximbu haze enu mwauciko, mangana mukanenga kulipihixilamo. Ami yami Yehova Kalunga kenu.
Currently Selected:
VYAVALEVI 18: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
