VYAVALEVI 17
17
Kwakuvatwila vimuna kumwe kaha
1Yehova ahanjikile kuli Mose ngwenyi,
2Hanjika kuli Alone nakuli vana venyi nakuli vana vaIsalele vosena, uvambulile ngwove, Eci cikiko cuma natulweze Yehova ngwenyi,
3Mutu himutu wakuzuvo yaIsalele ou mwajihila ngombe cipwe mukoko cipwe pembe kucilombo, cipwe kumujihila kusali yacilombo,
4cakuzeneka kumuneha kucikolo cambalaka yakuliwanyina mangana amupandamise kupwa wana wakupandamisa kuli Yehova kulutwe #17.4:Tala 8.10.lwatavanaku yaYehova, mutu kana navamuvulukila mulonga wamanyinga. Namwange manyinga, kaha mutu kana navakamuteta muli vatu vakwavo.
5Mangana vana vaIsalele vanehenga vimuna javo vakuvatula vaze veji kuvatwilanga muvipapa mwamokomoko, mangana vavanehenga kuli Yehova kucikolo cambalaka yakuliwanyina kuli kapilixitu, avavatwilevo kupwa vimuna vakuvatula vamawana akulweza keke akuhana kuli Yehova.
6Kapilixitu asapwile manyingayo kulijiko lyaYehova lyakulumbila kucikolo cambalaka yakuliwanyina, alumbe maji kupwa livumba lyalupengopengo kuli Yehova.
7Kaha vimuna javo vakuvatula kanda vakavavatwilangavo vandemoneko, ava veji kukavanga nakulinga ujila. Eci cipwenga cilika kuli vakivo haya myaka yosena mukusemunwina cavo cosena.
8Kaha vambulile ngwove, Mutu himutu wakuzuvo yaIsalele, mokomoko wakuli vangeji vakuzuzumana muli vakivo, ou mwalumba wana wakulumba, cipwe cimuna wakuvatula,
9cakuzeneka kumuneha kucikolo cambalaka yakuliwanyina nakumuvatwilayo Yehova, mutu kana navakamuteta muli vatu vakwavo.
Navavakanda kulya manyinga
10Kaha mutu himutu wakuzuvo yaIsalele, mokomoko wakuli vangeji vakuzuzumana muli vakivo, ou mwalya manyinga akanyama hikanyama, nangumutala mutu uze mwalya manyinga nautenu, nangumuteta muli vatu vakwavo.
11Mwomwo mwono wamujimba uli kumanyinga, kaha ngunamihanewo halijiko lyakulumbila nakulingisa cakufwika hamyono yenu. Mwomwo manyinga, akiko vene aka-kulinga cakufwika xili, mwomwo hamwono uliko.
12Xikaho ngunambe kuli vana vaIsalele ngwami, Muli enu cipwe mutu umwe kanda akalya manyingako, cipwe ngeji umwe wakuzuzumana muli enu kanda akalya manyingako.
13Kuli vana vaIsalele, cipwe kuli vangeji vakuzuzumana muli vakivo, mutu himutu ou mwahanga nakwasa kanyama, cipwe kajila uze veji kulyanga, ahicise manyingenyi awafwike nalukungu.
14Mwomwo myono yavakweci mijimba vosena, manyingavo himyono yavo. Xikaho ngunambe kuli vana vaIsalele ngwami, Kanda mukalya manyinga atunyama vosenako. Mwomwo myono yavakweci mijimba vosena himanyingavo. Wexowo mwawalya navamutetamo.
15Mutu himutu mwalya nyama yayou wakulifwila, mokomoko yayou vanatanye kuli visuma, cipwe nasemukila mulifuci, cipwe napu ngeji wakuzuzumanamo, akose mahinenyi, asane meya mumujimba wenyi, kaha mwapihya palanga nahakulauka calikumbi, numba atome.
16Oloze kaci nge kexi kuwakosako, nge kexi kusana mumujimba wenyiko, kaha mwambata kuhenga cenyi.
Currently Selected:
VYAVALEVI 17: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
