VYAVALEVI 16
16
Likumbi lyakulinga cakufwika haxili
1Yehova ahanjikile kuli Mose omu valingile vana VaAlone vavali hivanafu lyehi, omu vapandamine kumeso aYehova natufwa.
2Yehova ambile kuli Mose ngwenyi, Hanjika kuli yayove Alone ngwove, #Kulo. 30.10.kanda akengila makumbi osena muno mwajila mutulo yalihina lyakuvatasana, kulutwe lwacifwiko calikoji cili hacikaxako, kucina mwafwa, mwomwo nangulisolola mulivwi hacifwiko calikoji, xikaho.
3Alone akengile muno mwajila navava, nangombe wacikuji walivuvu kupwa wana wahaxili, nacizamba camukoko kupwa wana wakulumba.
4Akavwale #Kulo. 28.39, 42.cikuto calinyu cajila, akavwale putula yalinyu kumujimba wenyi, akalikase muhya walinyu mumbunda yenyi, akavwale lihina lyalinyu lyakujinga kumutwe. Vikiko vene vyuma vyakuvwala vyajila. Akasane meya mumujimba wenyi, numba avivwale.
5Kulizavu lyavana vaIsalele akatambuleko Vapembe vavizamba vavali kupwa wana wahaxili, nacizamba camukoko kupwa wana wakulumba.
6 #
Hepe. 5.3. Alone akapandamise ngombe wacikuji wawana wahaxili, ou wahali ivene, akalilingile ivene cakufwika xili navaze vakuzuvo yenyi nawa.
7Akambate vaze vapembe vavali, akavemike kumeso aYehova kucikolo cambalaka yakuliwanyina.
8Kaha Alone akalovole tutacikijilo hali vaze Vapembe vavali, katacikijilo kamwe kaYehova, katacikijilo kakwavo #16.8:Mokomoko ngwavo, Kahakusuwula.kahaAzazele.
9Owo pembe kana hanalovokela katacikijilo kaYehova, Alone akamupandamise, akamuhane kupwa wana wahaxili.
10Oloze pembe kana hanalovokela katacikijilo kahaAzazele, vakamwimike wamutonyi kumeso aYehova, mangana valingile cakufwika xili hali ikiye, vakamusuwule haAzazele mupambo.
11Alone akapandamise ngombe wacikuji wawana wahaxili, #Hepe. 7.27; 9.7.ou wahali ivene, akalilingile ivene cakufwika xili navaze vakuzuvo yenyi nawa. Akajihe ngombe wacikuji wawana wahaxili wahali ivene.
12Akambate ciloso cakulumbila vize vyakulumba vyalivumba lyamwaza cato namakala akakahya akulijiko lyakulumbila lili kumeso aYehova, namavoko enyi ato navize vyakulumba vyalivumba lyalupengopengo vyakutwa vyavilelu, akayinehe mutulo yalihina lyakuvatasana.
13Akahake vize vyakulumba vyalivumba lyamwaza hakakahya kumeso aYehova, mangana wixi wavize vyakulumba vyalivumba lyamwaza ufwike cifwiko calikoji cili haunjiho, kucina mwafwa.
14 #
Kulo. 30.34-38. Akambate kumanyinga ayauze ngombe wacikuji, akawasapwile namunwe wenyi hacifwiko calikoji kutala kumusamuko, nakulutwe lwacifwiko calikoji nawa akasapwileko manyingamwe namunwe wenyi katanu nakavali.
15Kaha akajihe pembe wawana wahaxili, ou wahali vatu, akanehe manyingenyi mutulo yalihina lyakuvatasana, akalinge namanyingenyi nganomu alinganga namanyinga angombe wacikuji, akawasapwile hacifwiko calikoji nakulutwe lwacifwiko calikoji.
16Ngoco mwalingila muno mwajila cakufwika xili, mwomwo hakupihya cavana vaIsalele cacivulu, namwomwo havilinga vyavo vyakuzomboka jiximbi, hamilonga yavo yaxili yosena vene. Ngoco nawa mumwakalinga hambalaka yakuliwanyina yatwama navo mukaci kakupihya cavo cacivulu.
17Omu mwakengilamo nakulinga cakufwika xili muno mwajila, mumbalaka yakuliwanyina kanda mukapwa mutu umweko, kuvanga mwakalovokamo, kuvangomu mwakapwa hanalingi lyehi cakufwika xili hali ivene nahali vaze vakuzuvo yenyi, nahaliwuka lyavaIsalele lyosena.
18Akalovokemo akaye kulijiko lyakulumbila lili kumeso aYehova, akalilingile cakufwika xili. Akambate kumanyinga angombe wacikuji nakumanyinga apembe, akawakwite kujimbinga jalijiko lyakulumbila jingulwixi.
19Akasapwileho kumanyingaze namunwe wenyi katanu nakavali, akalitomese, akalijilike kukupihya cavana vaIsalele cacivulu.
20Omu mwakalinga hanamanyisa lyehi kulingila muno mwajila cakufwika xili, nambalaka yakuliwanyina nawa nalijiko lyakulumbila, akamupandamise pembe wamutonyi.
21Alone akanangike mavoko enyi osena avali hamutwe wayauze pembe wamutonyi, aketavile vilinga vyavana vaIsalele vyakuhenga vyosena hali ikiye, navilinga vyavo vyakuzomboka jiximbi vyosena, milonga yavo yaxili yosena vene. Ngoco akavihake hamutwe wayauze pembe, akamusuwule mupambo halivoko lyamutu umwe vanatongola lyehi.
22Kaha uze pembe mwakambata vilinga vyavo vyakuhenga vyosena nakuvitwala kulifuci lyalikundu. Kaha akamwecele pembe mupambo.
23Alone akengile mumbalaka yakuliwanyina, akazule mahina alinyu aze avwalangomu engilanga muno mwajila, awasezemo.
24Akasane meya mumujimba wenyi kuma kwajila, akavwale mahinenyi, alovokemo akalumbe wana wenyi wakulumba nawana wavatu wakulumba, akalinge cakufwika xili hali ivene nahali vatu.
25Kaha maji awana wahaxili akawalumbile halijiko lyakulumbila.
26Uze mwakeca pembe wahaAzazele akakose mahinenyi, akasane meya mumujimba wenyi, kaha hakukuminyina numba akengile mucilombo.
27Ngombe wacikuji wawana wahaxili, napembe wawana wahaxili, #Hepe. 13.11.vaze vakweci manyingavo vengisanga nakulinga cakufwika xili muno mwajila, vakavatwale kusali yacilombo, vakavalumbilileko hakakahya, namalambu avo nanyama yavo natuji twavo.
28Kahou mwavalumba akose mahinenyi, asane meya mumujimba wenyi, kaha hakukuminyina numba akengile mucilombo.
29Cipwenga cilika kuli enu haya myaka yosena, hakakweji wamucitanu navavali, halikumbi lyakakweji lyakusokesa mulikumi mukaliyanjisa myono yenu. Kanda mukazataho milimo yimweko, cipwe ou nasemukila mulifuci cipwe ngeji nazuzumana muli enu.
30Mwomwo halikumbi eli navamilingila cakufwika xili, mangana vamitomese, xikaho. Namutoma kumilonga yenu yaxili yosena kumeso aYehova.
31Cinapu kunoka casambata yayilemu kuli enu, kaha mukaliyanjisa myono yenu. Cinapu cilika haya myaka yosena.
32Kapilixitu uze navakawavisa nakumuhandunwina kuupilixitu mukahela kaise, ikiye akalinge cakufwika kana, akavwale mahina alinyu, awa vene mahina ajila.
33Akalingile zuvo yajila cakufwika xili. Kaha akalingile mbalaka yakuliwanyina nalijiko lyakulumbila cakufwika xili. Akavalingile vapilixitu navatu vosena vaka-liwuka cakufwika xili.
34Eci cipwenga cilika haya myaka yosena kuli enu, #Hepe. 9.7; 10.1-3.kuvalingila vana vaIsalele cakufwika xili hamwaka kamwe hamwaka kamwe, hamilonga yavo yaxili yosena. Kaha alingile nge omu valwezele Mose kuli Yehova.
Currently Selected:
VYAVALEVI 16: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
