VYAVALEVI 14
14
1Yehova ahanjikile kuli Mose ngwenyi,
2Elu lupwenga luximbi lwamukambumba halikumbi lyakumutomesa. #Mateu 8.4; Mako 1.44; Luka 5.14; 17.14.Vakamunehe kuli kapilixitu.
3Kapilixitu akalovoke kusali yacilombo, kaha kapilixitu akatale. Kaci nge musongo wambumba unakanguka lyehi muli uze muka-mbumba,
4kaha kapilixitu avalweze vambacile uze navatomesa tujila vavatonyi vavali vatoma, namuxitale, namangona amukoko acila, #14.4:Tala Kulovoka 12.22.nahusope.
5Kapilixitu avalweze ngwenyi, vajihile kajila umwe mundeho yauma helu lyameya amuta.
6Kahou kajila wamutonyi amumbate, namuxitale, namangona acila, nahusope, avitupike nakajila wamutonyi hamwe mumanyinga akajila uze vanajihila helu lyameya amuta.
7Amusapwile uze navatomesa kumbumba yenyi katanu nakavali hikumuvuluka ngwenyi, natomo. Kaha kajila wamutonyi amwece ayenga mucipapa mwamokomoko.
8Ou vanatomesa akose mahinenyi, atewule mangonenyi osena napoko yayembe, asane meya, kaha himwatoma. Hakukuminyina numbeze mucilombo, oloze atwamenga makumbi atanu naavali haweluka wambalaka yenyi.
9Kaha cikapwe, halikumbi lyamucitanu naavali, akatewule jikambu jenyi josena kumutwe wenyi, nawevu wenyi, navikenyikenyi vyenyi. Mangonenyi osena vene akawatewule. Akose mahinenyi, akasane meya mumujimba wenyi, kaha himwatoma.
10Halikumbi lyamucitanu naatatu akaye navana vamikoko vavilunga vakuzeneka katenga vavali, namwanamukoko wacipwevo wakuzeneka katenga wamwaka umwe, navimbwa vitatu vyakusokesa muvimbwa vyalifwa limwe likumi vyawunga wakusalulula, kupwa wana wakulya vanahingunwina lyehi maji, #14.10:Kafwe jipasa jajindende jivali.nalongo yamaji yimwe.
11Kapilixitu uze mwamutomesa akemike mutu uze navatomesa, navyuma vize nawa, kumeso aYehova kucikolo cambalaka yakuliwanyina.
12Kapilixitu akambate mwanamukoko wacilunga umwe akamuhane kupwa wana wahakuhingika, nalongo yamaji yize nawa, ukavihungise kupwa wana wakuhungisa kumeso aYehova.
13Akajihe uze mwanamukoko wacilunga oku veji kujihilanga mawana ahaxili namawana akulumba, oku kwajila. Mwomwo nge omu wapwa wana wahaxili ukiko wakapilixitu, ngoco nawana wahakuhingika nawa. Ukiko wajila cikuma.
14Kapilixitu akambate kumanyinga awana wahakuhingika, kaha kapilixitu akawakwite kusongo yalitwitwi lyayou navatomesa lyacilyo, nakumunwe waxina wakulivoko lyenyi lyacilyo, nakumunwe waxina wakulihinji lyenyi lyacilyo.
15Kapilixitu akambate kulongo yamaji yize, akawahingunwine mulivoko lyenyi lyacimoswe lyakutengeka.
16Kapilixitu akatupike munwe wenyi wacilyo mumaji aze ali mulivoko lyenyi lyacimoswe, akasapwile maji amwe katanu nakavali namunwe wenyi kumeso aYehova.
17Kaha kumaji aze anasaleho ali mulivoko lyenyi, kapilixitu akakwite kusongo yalitwitwi lyayou navatomesa lyacilyo, nakumunwe waxina wakulivoko lyenyi lyacilyo, nakumunwe waxina wakulihinji lyenyi lyacilyo, hamanyinga awana wahakuhingika.
18Kaha maji aze anasaleho ali mulivoko lyakapilixitu akawahake hamutwe wayou navatomesa. Ngoco kapilixitu mwamulingila cakufwika kupihya kumeso aYehova.
19Kapilixitu akahane wana wahaxili, kumulingilou navatomesa cakufwika kupihya, mwomwo hakupihya cenyi. Hakukuminyina, numba ajihe wana wakulumba.
20Kapilixitu akahanyine wana wakulumba nawana wakulya, halijiko lyakulumbila. Ngoco kapilixitu mwamulingila cakufwika kupihya, kaha mwatoma.
21Kaci nge nahutu, nge vikumba vyenyi kavyatamoko, kaha ayenga namwanamukoko wacilunga umwe kupwa wana wahakuhingika, vakauhungise, vakamulingile cakufwika kuhingika, kaha nacimbwa cimwe cakusokesa muvimbwa vyalifwa limwe likumi cawunga wakusalulula vanahingunwina lyehi maji, kupwa wana wakulya, nalongo yamaji,
22natutela vavali, mokomoko vana vamayembe vavali, nge omu mwahasa kuwana. Umwe akapwe wana wahaxili, mukwavo wana wakulumba.
23Halikumbi lyamucitanu naatatu akayinehe kuli kapilixitu kucikolo cambalaka yakuliwanyina kumeso aYehova, mangana vamutomese.
24Kapilixitu akatambule mwanamukoko wawana wahakuhingika, nalongo yamaji, kapilixitu ukavihungise kupwa wana wakuhungisa kumeso aYehova.
25Akajihe uze mwanamukoko wawana wahakuhingika, kaha kapilixitu akambate kumanyinga awana wahakuhingika, akawakwite kusongo yalitwitwi lyayou navatomesa lyacilyo, nakumunwe waxina wakulivoko lyenyi lyacilyo, nakumunwe waxina wakulihinji lyenyi lyacilyo.
26Kapilixitu akahingunwine maji amwe mulivoko lyenyi lyacimoswe lyakutengeka.
27Kaha kapilixitu akasapwile maji amwe aze ali mulivoko lyenyi lyacimoswe katanu nakavali namunwe wenyi wacilyo kumeso aYehova.
28Kaha kumaji aze ali mulivoko lyenyi kapilixitu akakwite kusongo yalitwitwi lyayou navatomesa lyacilyo, nakumunwe waxina wakulivoko lyenyi lyacilyo, nakumunwe waxina wakulihinji lyenyi lyacilyo, oho hali manyinga awana wahakuhingika.
29Maji aze anasaleho ali mulivoko lyakapilixitu akawahake hamutwe wayou navatomesa, akamulingile cakufwika kupihya kumeso aYehova.
30Kuli vaze tutela akahane umwe, mokomoko kuli vaze vana vamayembe umwe, nge omu mwahasa kuwana,
31nganomu mwahasa kuwana, umwe kupwa wana wahaxili, mukwavo kupwa wana wakulumba, nawana wakulya hamwe. Ngoco kapilixitu mwamulingilou navatomesa cakufwika kupihya kumeso aYehova.
32Elu lukiko luximbi lwayou ali namusongo wambumba, ou nahono kuwanovyo vyakumutomesa.
33Yehova ahanjikile kuli Mose nakuli Alone ngwenyi,
34Omu namukalinga munahete lyehi mulifuci lyaKanane, olyo vene nangumihana kupwa luheto lwenu, omu nangukahaka musongo wambumba muzuvo yimwe yamulifuci lyaluheto lwenu,
35mwenyazuvo yize akeze akamulweze kapilixitu ngwenyi, Ngunamono ngwami, muzuvo muli musongo.
36Kapilixitu akavalweze ngwenyi, valovole vyuma vyosena muzuvo ximbu kanda kapilixitu engilemo nakutala musongo, kucina navapihisa vyuma vyosena vili muzuvo. Hakukuminyina, numba kapilixitu akengilemo akatale zuvo.
37Akatale musongo, kaha kaci nge musongo uli kujimbango jazuvo namapenga akufuwuka, ausungwa, mokomoko aciluluka, nge kuutala nge kumbango kunafulika,
38kaha kapilixitu akalovoke kucikolo cazuvo, akasokemo muzuvo makumbi atanu naavali.
39Kapilixitu akeze ceka halikumbi lyamucitanu naavali, akatale, kaci nge musongo unatande kujimbango jazuvo,
40kaha kapilixitu akavalweze ngwenyi, vafumiseko malolwaze ali namusongo, vakawambile kuma kwakupi kusali yalimbo.
41Akavalingise mangana vakakonge zuvo mutulo mwosena, kahoyo ndambo kana navakakongaho vakayizukwile kusali yalimbo, kuma kwakupi.
42Kaha vakanehe malolweka, vakawaxixise mumalolwaze, kaha akanehe ndambo yeka akayisotolole zuvo.
43Kaci nge musongo naukeza ceka nakusangumuka muzuvo yize omu wakalinga hanafumisa lyehi malolwa, omu nakongo lyehi zuvo, nomu nayisotolola lyehi,
44kaha kapilixitu akengilemo akatale. Kaci nge musongo unatande muzuvo, yikiko mbumba yika-kwenyeka. Zuvo yinapihi.
45Akapuzule zuvo kana, namalolwayo, navitondo vyayo, nandambo yazuvo yosena. Akavitwale kusali yalimbo kuma kwakupi.
46Kaha ou mwakengila muzuvo yize makumbi osenaze vanasokomo mwapihya palanga nahakulauka calikumbi.
47Kahou mwakasavala muzuvo yize akakose mahinenyi. Kahou mwakalila muzuvo yize akakose mahinenyi.
48Kaci nge kapilixitu mwakengilamo nakutala, nge musongo kawatanjile muzuvoko omu navakalinga hivanayisotolola lyehi, kaha kapilixitu akayivuluke zuvo ngwenyi, yinatomo, mwomwo musongo unafumumo lyehi, xikaho.
49Akambate tujila vavali, namuxitale, namangona amukoko acila, nahusope, mangana akatomese zuvo.
50Akajihile kajila umwe mundeho yauma helu lyameya amuta.
51Akambate uze muxitale, nayize husope, naze mangona acila, nakajila uze wamutonyi, akavitupike mumanyinga akajila uze vanajihi lyehi, namumeya amuta, akasapwile katanu nakavali kuzuvo yize.
52Akayitomese zuvo namanyinga ayauze kajila, nameyaze amuta, nakajila uze wamutonyi, nauze muxitale, nayize husope, naze mangona acila.
53Oloze akamwece kajila wamutonyi kusali yalimbo mucipapa mwamokomoko. Ngoco mwayilingila zuvo cakufwika kupihya, kaha nayitoma.
54Elu lukiko luximbi lwahamisongo yambumba yosena, nahamukule,
55nahambumba yamulihina, nahazuvo,
56nahacijimbo, nahalukako, nahalipenga lyakutamuka,
57mangana kunangulomu cinapihi cuma nomu cinatomo. Elu lukiko luximbi lwamusongo wambumba.
Currently Selected:
VYAVALEVI 14: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
