VYAVALEVI 13
13
Jiximbi jakuvuluka mbumba
1Yehova ahanjikile kuli Mose nakuli Alone ngwenyi,
2Mutu hakupwa nacijimbo, cipwe nalikako, cipwe nalipenga lyakutamuka, kucikova camujimba wenyi, omu naupwa musongo wambumba kucikova camujimba wenyi, vamunehe kuli kapilixitu Alone, cipwe kuli kapilixitu umwe mwanenyi.
3Kapilixitu atale musongo uze uli kucikova camujimba wenyi. Kaci nge mangona ali hamusongo analumuka kupwa atoma, kaci nge kuutala musongo unafuwuka mucikova camujimba wenyi, ukiko musongo wambumba. Kaha kapilixitu amutale, amuvuluke ngwenyi, wamupi.
4Kaci nge lipenga kana Nakutamuka linatomo kucikova camujimba wenyi, nge kulitala kalyafuwukile mucikovako, nge mangona aliko kawalumukile kupwa atomako, kaha kapilixitu amusoke muka-musongo makumbi atanu naavali.
5Kapilixitu akamutale halikumbi lyamucitanu naavali, kaha kaci nge mwamona musongo nge unemana, nge musongo kawatotowelele mucikovako, kaha kapilixitu akamusoke makumbi eka atanu naavali.
6Kapilixitu akamutale ceka halikumbi lyamucitanu naavali, kaha kaci nge musongo unafuvalala, nge musongo kawatotowelele mucikovako, kaha kapilixitu amuvuluke ngwenyi, natomo. Lukiko lukako. Akakose mahinenyi, numba atome.
7Oloze kaci nge lukako nalutotowela nakutanda mucikova omu nalilweze lyehi kuli kapilixitu mangana vamutomese, kaha alilweze ceka kuli kapilixitu.
8Kapilixitu atale, kaha kaci nge lukako lunatotowela mucikova, kapilixitu amuvuluke ngwenyi, wamupi. Ukiko musongo wambumba.
9Mutu hakupwa namusongo wambumba, vamunehe kuli kapilixitu.
10Kapilixitu atale, kaha kaci nge kucikova kuli cijimbo citoma, nge cinalumuna lyehi mangona kupwa atoma, kaci nge kucijimbo kana nakusoloka nyama yicila,
11ukiko musongo wamwaka wambumba kucikova camujimba wenyi, kaha kapilixitu amuvuluke ngwenyi, wamupi. Kanda amusokako, mwomwo napihi, xikaho.
12Kaci nge musongo wambumba unasoloka kucikova kweka, nge musongo wambumba hinaupwa kucikova camuka-musongo kwosena, kufumisa kumutwe wenyi mbwe nakumahinji enyi, kwosena vene mwamona kapilixitu,
13kapilixitu atale, kaha kaci nge musongo wambumba unahete lyehi kumujimba wenyi kwosena, amuvuluke muka-musongo ngwenyi, Natomo. Wosena unalumuka lyehi kupwa utoma, xikaho ikiye natomo.
14Oloze hexoho namukasoloka nyama yicila muli ikiye, mwapihya.
15Kapilixitu atale nyama yize yicila, amuvuluke ngwenyi, wamupi. Oyo nyama yicila yinapihi. Ukiko musongo wambumba.
16Mokomoko, kaci nge nyama yize yicila nayalumuka ceka nakupwa yitoma, kaha eze kuli kapilixitu.
17Kapilixitu amutale, kaha kaci nge musongo unalumuka lyehi kupwa utoma, kaha kapilixitu amuvuluke muka-musongo ngwenyi, natomo. Ikiye natomo.
18Omu uli mujimba wamutu nalihute kucikova cawo, omu hanakanguka lyehi,
19kahoku kwapwanga lihute kuli cijimbo citoma, cipwe lipenga lyakutamuka, likiko liciluluka litomonoka, kaha amulwezelyo kapilixitu.
20Kapilixitu atale, kaha kaci nge kutalako kunafuwuka mucikova, nge mangona aliko analumuka kupwa atoma, kaha kapilixitu amuvuluke ngwenyi, wamupi. Ukiko musongo wambumba, unalitumbukila kulihute.
21Oloze kaci nge kapilixitu mwatala, nge kakwexi mangona atomako, nge kawafuwukile mucikovako, oloze musongo unafuvalala, kapilixitu amusoke makumbi atanu naavali.
22Kaci nge nautotowela kucikova, kapilixitu amuvuluke ngwenyi, wamupi. Ukiko musongo.
23Oloze kaci nge lipenga lyakutamuka lize nalimana kwalyo, nge kalyatotoweleleko, cikiko civevo calihute. Kaha kapilixitu amuvuluke ngwenyi, natomo.
24Mokomoko omu uli mujimba nahamwe hanatosoka nakakahya kucikova cawo, nge nyama yicila yize yili hakutosoka hinayalumuka kupwa lipenga lyakutamuka, likiko liciluluka litomonoka, mokomoko litoma,
25kaha kapilixitu alitale. Kaci nge mangonaze ali kulipenga kana lyakutamuka analumuka kupwa atoma, nge kulitala linafuwuka mucikova, ukiko musongo wambumba, unalitumbukiloho hakutosoka. Kapilixitu amuvuluke ngwenyi, wamupi. Ukiko musongo wambumba.
26Oloze kaci nge kapilixitu mwatalako, nge kulipenga lyakutamuka lize kakwexi mangona atomako, nge kalyafuwukile mucikovako, oloze linafuvalala, kaha kapilixitu amusoke makumbi atanu naavali.
27Halikumbi lyamucitanu naavali kapilixitu akamutale. Kaci nge musongo unatotowela kucikova, kapilixitu amuvuluke ngwenyi, wamupi. Ukiko musongo wambumba.
28Kaci nge lipenga lyakutamuka lize nalimana kwalyo, nge kalyatotowelele kucikovako, oloze linafuvalala, likiko cijimbo cahakutosoka, kaha kapilixitu amuvuluke ngwenyi, natomo, mwomwo cikiko civevo cahakutosoka, xikaho.
29Cipwe lunga, cipwe pwevo, omu ali namusongo kumutwe wenyi, cipwe kuwevu wenyi,
30kapilixitu atale musongo. Kaci nge kuutala unafuwuka mucikova, nge muli mangona amalelu aciluluka, kaha kapilixitu amuvuluke ngwenyi, wamupi. Ukiko mukule, ukiko musongo wambumba wakumutwe, cipwe wakuwevu.
31Kaci nge kapilixitu mwatala musongo wamukule, nge kuutala kawafuwukile mucikovako, nge kawexi namangona elavako, kapilixitu asoke uze muka-musongo wamukule makumbi atanu naavali.
32Halikumbi lyamucitanu naavali kapilixitu akatale hamusongo. Kaci nge musongo kawatotoweleleko, nge kakwexi mangona acilulukako, nge musongo wamukule kuutala kawafuwukile mucikovako,
33kaha vamutewule nayembe, oloze kumukulenyi kanda atewulakoko. Kapilixitu asoke uze muka-mukule makumbi eka atanu naavali.
34Halikumbi lyamucitanu naavali kapilixitu akatale hamukule. Kaci nge mukule kawatotowelele mucikovako, nge kuutala kawafuwukile mucikovako, kaha kapilixitu amuvuiuke ngwenyi, natomo. Akose mahinenyi, kaha himwatoma.
35Oloze kaci nge mukule nautotowela mucikova cenyi omu navalinga vanamutomesa lyehi,
36kaha kapilixitu amutale. Kaci nge mukule unatotowela mucikova, kapilixitu kanda atonda mangona acilulukako. Mutu kana napihi.
37Oloze kaci nge mwamona mukule ngwenyi, unemana kwawo, nge mangonelava anasokoko, kaha mukule unakanguka, ikiye natomo. Kapilixitu amuvuluke ngwenyi, Natomo.
38Cipwe lunga, cipwe pwevo, omu ali namapenga akutamuka kucikova camujimba wenyi, akiko mapenga akutamuka atoma,
39kaha kapilixitu atale. Mapengaze ali kucikova camujimba wenyi, kaci nge anatomonoka, ukiko musongo tuhu, unalitumbukila kumujimba wenyi. Ikiye natomo.
40Kaci nge jikambu jamutu jinamufumu kumutwe, naseve, oloze natomo.
41Kaha kaci nge jikambu jenyi najimufuma kuluholo lwenyi, naseve kuluholo, oloze natomo.
42Oloze kumutwe uze unaseve, cipwe kuluholo luze lunaseve, kaci nge kuli musongo uciluluka utomonoka ukiko musongo wambumba unalitumbukila kumutwe wenyi unaseve, cipwe kuluholo lwenyi lunaseve.
43Kapilixitu amutale, kaha kaci nge cijimbo camusongo cinapu ciciluluka citomonoka kumutwe wenyi unaseve, cipwe kuluholo lwenyi lunaseve, nge kuutala nge musongo wambumba kucikova camujimba wenyi,
44ikiye muka-mbumba, ikiye napihi. Kapilixitu amuvuluke vene ngwenyi, wamupi. Musongo wenyi uli kumutwe wenyi.
45Muka-mbumba uze ali namusongo, mahinenyi apwenga akupula, atwamenga nalipupi kumutwe wenyi, awuve hamuvumbo wenyi wahelu, atambakanenga ngwenyi, Ngumupi, ngumupi.
46Mwapihya makumbi osena ximbu ali namusongo. Napihi, atwamenga uka wenyi. Kwenyi kwakutwama kupwenga kusali yacilombo.
47Nalihina lyakuvwala nawa muli musongo wambumba, cipwe lihina Namangona amikoko, cipwe lihina lyalinyu,
48cipwe uli kuwanda wakuya muusuku, cipwe kuwanda wakuya muwihi, cipwe walinyu, cipwe wamangona amikoko, cipwe kulilambu, cipwe kucuma hicuma cakulinga nalilambu,
49kaci nge musongo unapu wausungwa, cipwe uciluluka, kulihina lyakuvwala, cipwe kulilambu, cipwe kuwanda wakuya muusuku, cipwe kuwanda wakuya muwihi, cipwe kucuma hicuma calilambu, kaha ukiko musongo wambumba. Vaulweze kuli kapilixitu.
50Kapilixitu atale musongo, kahoco cili namusongo acisoke makumbi atanu naavali.
51Halikumbi lyamucitanu naavali akautale musongo. Kaci nge musongo unatande mulihina lyakuvwala lize, cipwe muwanda wakuya muusuku, cipwe muwanda wakuya muwihi, cipwe mulilambu, yexoyo milimo navazacisa lilambu, kaha musongo unapu mbumba yika-kwenyeka, cuma kana cinapihi.
52Oce lihina kana, cipwe wanda wakuya muusuku, cipwe wanda wakuya muwihi, cipwe wamangona amikoko, cipwe walinyu, cipwe cuma hicuma calilambu, mukiko muli musongo. Mwomwo yikiko mbumba yika-kwenyeka, xikaho. Vacoce hakakahya.
53Kaha kaci nge kapilixitu mwatela, nge musongo kawatanjile mulihinako, cipwe kuwanda wakuya muusuku, cipwe kuwanda wakuya muwihi, cipwe kucuma hicuma calilambu,
54kaha kapilixitu avalweze ngwenyi, vakose cuma kana muli musongo, kaha acisoke makumbi eka atanu naavali.
55Kapilixitu akatale omu navakalinga vanakoso lyehi musongo, kaha kaci nge musongo kawalumukile kupwa ulombo wekako, nge musongo kawatanjileko, kaha cuma kana cinapihi. Mucoce hakakahya. Kunaliwa, cipwe cinahulika mutulo, cipwe kusali.
56Kaci nge kapilixitu mwatala, nge musongo unafuvalala omu navalinga vanaukoso lyehi, kaha aupule kulihina, cipwe kulilambu, cipwe kuwanda wakuya muusuku, cipwe kuwanda wakuya muwihi.
57Kaci nge naukasoloka ceka kulihina, cipwe kuwanda wakuya muusuku, cipwe kuwanda wakuya muwihi, cipwe kucuma hicuma calilambu, uli nakutanda. Cuma kana muli musongo mucoce hakakahya.
58Lihina lyakuvwala lize naukosa, cipwe wanda wakuya muusuku, cipwe wanda wakuya muwihi, cipwe cuma hicuma calilambu, kaci nge musongo unafumuko, kaha acikose kamucivali, hinacitoma.
59Elu lukiko luximbi lwamusongo wambumba kulihina lyakuvwala lyamangona amikoko, cipwe eli lyalinyu, cipwe kuwanda wakuya muusuku, cipwe kuwanda wakuya muwihi, cipwe kucuma hicuma calilambu, mangana vacivuluke ngwavo, cinatomo, mokomoko vacivuluke ngwavo, cinapihi.
Currently Selected:
VYAVALEVI 13: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
