VYAVALEVI 11
11
Tunyama vamwaza navava vavapi
(Luxi. 14.3-21)
1Yehova ahanjikile kuli Mose nakuli Alone, avambile ngwenyi,
2Hanjikenu kuli vana vaIsalele ngwenu, Kuli tunyama vosena vali hamavu ava vakivo vaka-kuyoya vaze munahase kulya.
3Kuli tunyama, wexowo wakucangunuka jisende navilyacilo vyakupula, ou eji kuukulanga nakutafunya ceka, ikiye namuhasa kumulya.
4Oloze kuli vakuukula nakutafunya ceka, cipwe kuli vakucangunuka jisende, #Vili. 10.14.kanda mukalyavako, ngamela, mwomwo eji kuukulanga nakutafunya ceka, oloze kexi najisende jakucangunukako, xikaho ikiye wamupi kuli enu.
5Kaha naseji-mutumba nawa, mwomwo eji kuukulanga nakutafunya ceka, oloze kexi wakucangunuka jisendeko, xikaho ikiye wamupi kuli enu.
6Kaha nambwanda nawa, mwomwo eji kuukulanga nakutafunya ceka, oloze kexi wakucangunuka jisendeko, xikaho napu wamupi kuli enu.
7Kaha nangulu nawa, mwomwo ikiye wakucangunuka jisende navilyacilo vyakupula, oloze kexi kuukula nakutafunya cekako, xikaho ikiye napu wamupi kuli enu.
8Kunyama yavo kanda mukalyakoko, nahamijimba yavo yakufwa kanda mukakwatahoko. Vanapu vavapi kuli enu.
9Kuli vosena vali mumeya namuhasa kulyava, Wexowo ali navitendo namavanda mumeya mutulungalwiji namutulwiji, ikiye namuhasa kumulya.
10Kaha kuli vosenava veji kutambukanga mumeya, nakuli vaka-kuyoya vosena vali mumeya, vosena vazeneka vitendo namavanda mutulungalwiji namutulwiji vanapu vaunyengwe kuli enu,
11kaha vapwenga vaunyengwe kuli enu. Kunyama yavo kanda mukalyakoko, kaha mijimba yavo yakufwa mukayimona ngwenu, yaunyengwe.
12Wexowo wamumeya wakuzeneka vitendo cipwe mavanda, ikiye napu waunyengwe kuli enu.
13Kaha kuli tujila, ava vene mukavamona ngwenu, vaunyengwe, kanda mukavalyako, vanapu vaunyengwe, nangonga, nakumumu, nakwaze,
14nakakoji, natumbembe mwaya muyaci wavo,
15namakololo vosena mwaya miyaci yavo,
16nanyamalanda, natule, nakafulweji, naviselele mwaya muyaci wavo,
17nakapongesa, nakombwe, nacikungulu,
18nalikwika, nalimbondo, nalikuvi,
19nandalangimbu, namatokola mwaya muyaci wavo, napepetenu, nacinguzu.
20Vakweci mavava vosena vakutambuka hamahinji avo awana vanapu vaunyengwe kuli enu.
21Oloze kuli vakweci mavava vakutambuka hamahinji avo awana namuhasa kulyava vali namikono helu lyamahinji avo mangana vambotokese hamavu.
22Kuli vakivo namuhasa kulyava, mbimba-makumbi kumuyaci wenyi, nasamuyandulu kumuyaci wenyi, nakazeze kumuyaci wenyi, nalivongolo kumuyaci wenyi.
23Oloze vakweci mavava vosena vakweci mahinji awana vanapu vaunyengwe kuli enu.
24Kuli ava vene namupihya. Wexowo mwakwata hamijimba yavo yakufwa mwapihya palanga nahakulauka calikumbi.
25Kaha wose mwambata kamwe kakumijimba yavo yakufwa akakose mahinenyi, kaha mwapihya palanga nahakulauka calikumbi.
26Tunyama vakucangunuka jisende vosena, vaze vazeneka vilyacilo vyakupula navaze vazeneka kuukula nakutafunya ceka vanapu vavapi kuli enu. Wose mwakwata hali vakivo mwapihya.
27Kuli tunyama vosena vakutambuka hamahinji osena awana, vosena vakutambuka hamafumbo avo vanapu vavapi kuli enu. Wose mwakwata hamijimba yavo yakufwa mwapihya palanga nahakulauka calikumbi.
28Ou mwambata mijimba yavo yakufwa akose mahinenyi, kaha mwapihya palanga nahakulauka calikumbi. Vanapu vavapi kuli enu.
29Kaha kuli vaka-kuhalala hamavu, ava vanapu vavapi kuli enu, mukenge, natumbi, nakapeza kumuyaci wenyi,
30nacikwa-camukala, namusevu, nacitombwe, namusulu, nanongwena.
31Kuli vaka-kuhalala vosena ava vanapu vavapi kuli enu. Wose mwavakwata omu vanafu lyehi mwapihya palanga nahakulauka calikumbi.
32Kaha hexoho nahaholokela umwe omu vanafu lyehi, nahapihya, cipwe cinapu cuma camutondo, cipwe cuma cakuvwala, cipwe cilambu, cipwe njeke, cipwe cuma hicuma veji kuzacisanga milimo, kuvanga vanacihake mumeya, kaha nacipihya palanga nahakulauka calikumbi, numba citome.
33Nacexoco cuma cauma, omu mwaholokelamo umwe, vyosena vilimo vinapihi, kaha cikiko ucijihe.
34Kulya cosenoco veji kulyanga kuli vatu, oco nahaheta meya nacipihya. Nakunwa cosenoco veji kunwanga kuli vatu cili muvyuma vyosena vyangacize nacipihya.
35Cexoco cuma nahaholokela kamwe kakumijimba yavo yakufwa nacipihya, cipwe fwolonyi, cipwe lijiko lyakuhaka jindeho, vavipuzule. Vinapihi, kaha vipwenga vyavipi kuli enu.
36Oloze kaselwoke, cipwe wina muli meya amavulu navitoma, xina meyaze anakwate hamijimba yavo yakufwa nawapihya.
37Kaci nge kamwe kakumijimba yavo yakufwa nakaholokela hambuto jize navakuva, kaha jinatomo.
38Oloze kaci nge navahaka meya mumbuto jize, nge kamwe kakumijimba yavo yakufwa nakaholokelaho, kaha jinapu jajipi kuli enu.
39Kanyama umwe uze munahase kulya, kaci nge mwalifwila, ou mwakwata hamujimba wenyi mwapihya palanga nahakulauka calikumbi.
40Kahou mwalya nyama yakumujimba wenyi akose mahinenyi, kaha mwapihya palanga nahakulauka calikumbi. Ou mwambata mujimba wenyi nawa, akose mahinenyi, kaha mwapihya palanga nahakulauka calikumbi.
41Kaha vaka-kuhalala vosenava veji kuhalalanga hamavu vanapu vaunyengwe. Kanda vakavalyako.
42Wexowo wakutambukila halijimo lyenyi, nawexowo wakutambuka hamahinji enyi awana, mokomoko Wexowo ukweci mahinji amavulu, vaka-kuhalala vosena vakuhalala hamavu, kanda mukavalyako, mwomwo vanapu vaunyengwe, xikaho.
43Kanda mukalilingisa kupwa muvaunyengwe namuka-kuhalala umwe wakuhalala hamavuko, kaha kanda mukalipihisa navo numba mupihye navoko.
44Mwomwo #Kulo. 6.7; 16.12; 23.25.Ami yami Yehova Kalunga kenu. Xikaho lijilikenu #Petu. 1, 1.16.mupwenga mwajila, mwomwo Ami ngwajila, xikaho. Kanda mukalipihisa namuka-kuhalala umwe wakutambuka hamavuko.
45Mwomwo Ami yami Yehova ngwamilowele mulifuci lyaEjipitu mangana ngupwenga nguKalunga kenu. Xikaho pwenunga mwajila, mwomwo Ami ngwajila.
46Elu lukiko luximbi lwatunyama, nalwelu lwatujila, nalwelu lwavakweci mwono wakuyoya vakutambuka mumeva vosena, nalwelu lwavakweci mwono vakuhalala nakukalakaxa hamavu vosena,
47mangana vahandunune ou wamupi nayou utoma, namuka-kuyoyou vanahase kulya namuka-kuyoyou cijila kulya.
Currently Selected:
VYAVALEVI 11: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
