1 Makabi 9
9
To ka Yuda
1Kakame Demeterio owinyo kede be Nikanori kede isirikalen mege oto i yi, en eko cwano Bakide kede Alikimu i lobo me Yudea tien me are kede dul me isirikalen mege. 2Gin kilubo egudo aoto Giligal, di kiko luko bomba me Mesalot atie Arebela, kiko mane di kiko neko jo atot. 3I duwe me agege me mwaka me tol acel kede ot kany kiwie are (152)#9.3 manono en mwaka me tol acel kede ot kanyape (160) di pwodi likame konywalo Kirisito. gin kiko gero kimere gi i dog bomba me Yerusalem. 4Kiko yai kikuno di kiko ot Berea kede isirikalen me tien tutumia ot are (20,000), kede isirikalen tutumia are (2,000) aringo kede asigiran.
5Yuda kede isirikalen mege abeco tutumia adek oko gero kimere gi Elasa. 6Kakame kineno kede twon ekodet me isirikalen kobedo jokwor, lworo atek oko mako gi di jo atot kikom gi oko lwi di kiko dong isirikalen tol kanyauni kenekene.
7Kakame Yuda oneno kede isirikalen mege tie doko nonok do di yi oyapuno cakere, cunye oko nyote, pien oudo eli kede kare me bobo coko gi. 8Cunye oko kwanyere, do en pwodi eko waco ne jo kodong be, “Oyaunu ootunu osurunu jokwor wa, cengemogo otwerunu bwono gi.” 9Do gin kiko tamo genge di kiwaco ne be, “Teko wa likame romo, pien ononok. Odokunu cen olakunu kuo wa, di okounu bino dwogo kede jo ace di ototunu okounu yi kede gi.”
10Do Yuda oko dwoko be, “Likame twerere ne wan ringo tenge ki yi. Kame kare wa otuno, otounu kede nwangcuny pi wade wa, di okounu weko nying atie kede wor.”
11Isirikalen me Siria oko wok ki kimere gi di kiko tere pi yi kede Iyudayan. Oudo kipoko isirikalen kame ringo kede asigiran tien are, di jo kame lwomo aporocet kede kame gweo imalia oko bedo i nyim isirikalen, bala kame jo yi atek dedede timo. 12Bakide oudo tie i bad tetu cam. Isirikalen me tien oko cako nyiko anyim, di isirikalen aringo kede asigiran tie i bad gi tuni tuni, di kiko kuto agwarai me yi. Isirikalen ka Yuda da oko kuto agwarai gi me yi. 13Kakame kiriamo kede, piny oko yangere pi woo me yi, di kiko bedo yi cako me odiko tuno otieno.
14Kakame Yuda oneno kede be Bakide kede isirikalen atek me Siria oudo tie i bad tetu cam, jo mege acuny gi nwang yi oko upere kede en, 15di kiko muducaro isirikalen atot me Siria koudo tie i bad tetu cam, di kiko wapo gi paka tuno i moru me Asotu. 16Kakame isirikalen me Siria koudo tie i bad tetu ngodal oneno kede be kotieko muducaro jo gi koudo tie i bad tetu cam, gin kiko lokere di kiko donyo lubo Yuda kede jo mege odie odie. 17Yi oko doko gwai, di jo atot ki bad are nogo oko to. 18Oko neko kiton Yuda da, di jo apat oko ringo. 19Di Jonasan kede Simoni oko tero kom omin gi Yuda di kiko yike i ates ka joakwari gi atie Modein, 20di kiko donyo koke. Jo dedede me Isirael oko bedo koke pi ceng atot. Gin oudo kikok di kiwaco be, 21“Benyo benyo kame kotwero neko kede ngayi atek, ngat kobedo lako Isirael?”
22Aso, gi ace kame Yuda otimo, yi mege, tim mege anyuto nwangcuny, kede gikame dongodongo kame etimo likame kowandiko pien oudo kitot twatwal.
Jonasan Olunyo Kawang Yuda
23Ingei to ka Yuda, jo kalikame genere oko bobo wokun i kabedere dedede me Isirael; jo dedede atimo tim areco oko bobo neeno. 24I kare nono kec adwong oudo opoto i lobo nono, di jo dedede oko ribere kede jo atimo tim areco nogo. 25Bakide oko yero jo kalikame paro pi Rubanga di eko mino gi kibedo joloc me piny nono. 26Cuo nogo oko cako dwaro jowot Yuda di kiko tero gin dedede i nyim Bakide, di en eko timo onyanga i kom gi i yore me tidilo gi. 27Aso, peko adwong oko bedo tie i Isirael, kame epone mere likame pwodi oudo obedo tie cako i kare kame inabin ocako doko li kede i diere gi.
28Di adiereson ka Yuda oko ot but Jonasan di kiko waco ne be, 29“Cako i kare me to ka omini Yuda, likame wan obedo tie kede ngatamoro kame cal bala en, kame twero telo wa yi kede jokwor wa kede Bakide, kede kame twero aruno jo me ateker wa kame dagi wa. 30Nan wan tin oyeri pi lunyo kawange, pi bedo ngapug kede ngatel wa, kede pi yi pirwa.” 31Aso, Jonasan oko yei bedo ngatel kawang omin mere Yuda.
Yi ka Jonasan
32Kakame Bakide oko niang kede kop noni, en eko moko tam mere pi neko Jonasan. 33Do Jonasan kede omin mere Simoni kede jo dedede koudo gange oko winyo kop nono di kiko ringo i wi tim me Tekoa, di kiko gero kimere gi i nget atapar me Asapar. 34Bakide oko ngeno kop nono i ceng Sabato di en kede isirikalen mege kiko ngolo Yorodan. 35Jonasan oko cwano omin mere Yokana koudo tie ngat alo ekodet me isirikalen, pi ot kwano jo Nabatian, gin oudo kibedo jowote, pi yei negi kano jamini atot kame oudo kitie kede but gi. 36Do jo me diakal ka Jamburi me Medeba oko mako Yokana kede jamini dedede kame oudo etie kede kiko tere. 37Ingei kare moro kop oko tuno ne Jonasan kede omin mere Simoni be, “Jo me diakal ka Jamburi tie tedo ebaga apire tek me nyom, jo bino sirito kelo ateran ki bomba me Nadabat di isirikalen daro gi. Ateran nono obedo nyar ka icuo moro apire tek me Kanan.” 38Pi kite kame jo nogo oudo oneko kede omin gi Yokana, gin kiko yai kioto pwono i nget yongayo i bad moru. 39Gin kiko ngado ngut gi di kiko neno ekodet me jo kacelakino di kitie yeno jamini. Eteran kede jowote kede wade mege oudo tie ot pi riamo kede jo kame tie kelo ateran. Oudo kitie kede jamini atot me yi di kigoo jamini me goc kede bule. 40Iyudayan koudo opwono oko motar i kom gi di kiko cako yi kede gi, kiko neko jo atot di jo ace oko ringo i wi mori; Iyudayan nogo oko yeno jamini kame kimao kitero. 41Aso nyom oko lokere odoko iturur, kede dwan amit me jamini me goc oko lokere odoko were me koko jo oto. 42Ingei gin nyango omin gi, gin kiko dok i aladoi me dog ecilet me Yorodan.
43Bakide oko winyo kop nono di eko bino kede twon ekodet me isirikalen i dog ecilet me Yorodan i ceng Sabato. 44Jonasan oko waco ne jo koudo tie kede en be, “Nan oyaunu okounu yi pi kuo wa, tin manoni likame obedo gikame yot bala lem sek. 45Nenunu, jokwor tie i nyim wa kede cen ngei wa, ecilet tie i bad wa tetucel, aladoi kede yen okodo tie i bad tetu ocelu, likame tie kakame otwerunu lokere iye. 46Nan legunu but Rwot tetekeny elak wa ki cing jokwor wa.”
47Aso, yi oko cakere. Jonasan oko tamo neko Bakide, do eko bwot eringo cen ngei isirikalen mege. 48Di Jonasan kede isirikalen mege oko sosomo i pii me Yorodan di kiko isany kingolo loka tetuca, di jokwor likame oko ngolo nam ot suro gi. 49I ceng nono Bakide oko kei isirikalen mege aromo bala tutumia cel (1,000).
50Ingei Bakide dok Yerusalem, en eko gero apamai atek luko bomban me Jeriko, Emaus, Bet Koron, Betel, Timina, Paraton, kede Tepon, di eko cibo irutei gi kede lilime me cego gi. 51En eko cibo isirikalen i buli bomba nogi pi titimo Iyudayan. 52En eko da luko kede apama atek bomban me Betesur, Geser kede kabedo atek atie i bomba me Yerusalem, di eko keto isirikalen i yi gi, di eko donyo coko cam kagonogo. 53En eko mako awobe me jo adongodongo me lobo nono di eko mino isirikalen odong daro gi i kabedo atek me Yerusalem.
54I mwaka me tol acel kede ot kany kiwie adek (153),#9.54 manono en mwaka me tol acel kede ot kany kiwie kanyangon (159) di pwodi likame konywalo Kirisito. i duwe me are, Alikimu oko golo cik be tur apama aluko diakal me yie me tempulo; manono oudo oyaro dudubo gikame inabin ocane iye. 55Do di pwodi tic me turo apama nono tie cakere acaka, tuwo oko make di oko neko kome lung likame etwero akadi ngamo doge yamo, akadi mino kop mere me ajikini amako epone kame ture pore dong kede. 56Alikimu di oko to kede can alit. 57Kakame Bakide oneno kede be Alikimu oudo otieko to, en eko dwogo but Abaka Demeterio, di lobo me Yudea oko bedo kede anapakin pi mwakini are.
58Di Iyudayan koudo tie kede iponeso areco oko waco be, “Nenunu, Jonasan kede jo mege tie bedo kede mulem abongo lworo moro. Ka wan odwokunu Bakide, en ebino mako gin dedede iwor acel kenekene.” 59Gin kiko ot poro kop nono kede Bakide, 60di en eko cako bino kede twon ekodet me isirikalen, di eko cwano baluwan i mung but jo agange atie Yudea, di ewaco negi pi mako Jonasan kede jo mege. Do likame kiko twero mako gi pien iik nono oudo ongere. 61Jonasan kede jo mege oko mako jotel ot kany kalikame genere me lobo nono, gin jo kame oudo tie timo iik me mako gi, di eko neko gi. 62Di Jonasan, Simoni, kede isirikalen gi oko ot i bomba me Betebasi i wi tim. Gin iiko yiko gero kabedere mege kame oudo kotuturo, di kiko gero apama atek oluke. 63Kakame Bakide oniang kede kop noni, en eko coko isirikalen mege di eko cwano cik but jo mege atie Yudea. 64En eko ot di eko luko bomba me Betebasi di eko cicibo jamini me yi, di kiko bedo yi pi kare alac. 65Do Jonasan oko lwidar eweko omin mere Simoni telo isirikalen atie i bomba nono, di en eko yai kede isirikalen mogo anonok kiko ot i calo me piny nono. 66Jonasan oko yi kede Odomera kede wade mege eko bwono gi, di doko eko da suro kede bwono jo me Parison i kimere gi. 67Di isirikalen kodong mege oko ribere i kom Jonasan di kiko yai ot yi kede Bakide. Simoni kede jo mege oko wokun ooko ki bomba di kiko cwinyo jamini me yi kame Bakide oudo ocicibo me turo apama me bomba. 68Gin kiko dudungo Bakide i ka yi, di iik mege dedede me yi kony gi oko doko li, di kiko bwone. 69En cunye oko wang twatwal kede Iyudayan atie kede ikiteso areco, gin jo koudo olwonge pi dwogo i piny nono, eko neko atot kikom gi.
Bakide oko moko tam mere pi dok i lobo mere. 70Do kakame Jonasan oniang kede kop nono, en eko cwano jo but Bakide pi poro kede en kop amako mulem, kede gonyo Iyudayan kame oudo emako. 71Bakide oko yei timo gikame Jonasan oudo openyo, di eko cikere be en likame bobo ebino timo ne Jonasan gimoro arac i kare lung me kuo mere. 72Bakide oko gonyo jo kame oudo bin emako ki Yudea, di en eko dok i lobo mere di likame doko eko nyono lobo me Iyudayan. 73Manono en epone kame yi oko jik kede i Isirael. Jonasan oko donyo bedo Mikimas di eko donyo pugo jo. En eko muducaro Iyudayan kalikame paro pi Rubanga i Isirael.
Currently Selected:
1 Makabi 9: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.