1 Makabi 10
10
Alekesanda Epipane Ocibo Jonasan bedo Ngatel me Josaseredoti
1I mwaka me tol acel kede ot kanyape (160),#10.1 manono en mwaka me tol acel kede ot kany kiwie are (152) di pwodi likame konywalo Kirisito. Alekesanda Epipane, wot ka Antiokus me Ongwon oko ngolo nam tuno i bomba me Potolemai, eko make di eko donyo bedo iye. Jo me kunono oko game di eko cako pug. 2Di bin Abaka Demeterio owinyo kop nono, en eko coko twon ekodet me isirikalen di eko ot pi riamo kede en i yi. 3I kare nono Demeterio oko cwano ne Jonasan baluwa kede kope amit me mulem kede me wor. 4En oudo etie kede tam me mito dwoko Jonasan bute di pwodi Jonasan likame otimo isikan me kodere kede Alekesanda pi yi kede en. 5Demeterio oudo ngeo be Jonasan bino yutuno tim areco kame en bin etimo ne Jonasan kede imiegu mege, kede ne ateker lung me Iyudayan. 6Aso, Demeterio oko kodere kede Jonasan di eko mine akarunikin me gamo jo anyen pi bedo isirikalen, di eko gabo gi jamini me yi. En doko eko da mino cik be, jo kame komako kame kotie gwoko i kabedo atek me Yerusalem kopoore gonyo gi, di oko mino gi i cing Jonasan. 7Aso, Jonasan oko ot Yerusalem di eko somo baluwa nono ne jo dedede, ribo kiton ne jo koudo tie i kabedo atek. 8Baluwa nono oko cobo cuny jo twatwal kakame kiwinyo kede be, abaka oudo otieko mino Jonasan akarunikin me gamo isirikalen anyen. 9Do jo kame oudo daro kabedo atek oko gonyo jo kame oudo komako di kiko mino gi i cing Jonasan, di Jonasan oko dwoko gi i cing jonywal gi.
10Jonasan oko donyo bedo Yerusalem, di eko cako iiko gero bomba kede mine dok i cal mere kasek. 11En eko waco ne jo koudo tie gedo pi tic kede kide kame kopao di rorom i bad dedede me gero apamai me bomba, kede me gero apama atek aluko Moru me Sion. Gin kiko timo kamanono. 12Jokumbor kame oudo tie i kabedere atek kame Bakide oudo ogero oko ringo; 13gin dedede kiweko kabedere gi di ngat acelacel oko dok i lobo me turgi. 14Do Iyudayan mogo koudo oweko lubo Iswil kede cik mege oudo pwodi oko dong Betesur, di manono oko bedo negi bala kabedo me ringo ot gwokere.
15Abaka Alekesanda oko winyo cikere dedede kame Demeterio otimo but Jonasan; doko da eko winyo kop amako yi kame Jonasan kede imiegu mege obedo timo, kede tim me nwangcuny kame kibedo timo, kede da peko kame kibedo kanyakino. 16En eko waco be, “Benyo, otwero udo icuo kame cal bala loni? Wek otimunu kede en adiereson di okounu kodere kede en.” 17En eko wandiko ne Jonasan baluwa kame somere kaman:
18“Baluwa kowok kibuta Abaka Alekesanda but omina Jonasan, amoti. 19Wan owinyo kop i komi, be in ibedo ngayi atek, manono omio ipoore bedo adieru wa. 20Aso i ceng atin wan oyeri pi bedo Ngatel me Josaseredoti me ateker wu, doko kobino donyo lwongi be ‘Ngawot Abaka.’ In miero ibed konyo wan di igwoko awotin ni kede wa.”
En eko da cwano ne ekanso akwakwar kede ocoro me pug. 21Jonasan oko cako ngapo igoen me Ngatel me Josaseredoti i duwe me kanyaare i mwaka me tol acel kede ot kanyape (160),#10.21 manono en mwaka me tol acel kede ot kany kiwie are (152) di pwodi likame konywalo Kirisito. i Ebaga me Kimere. En eko pwonyo isirikalen atot di eko mino gi jamini atot me yi.
Jonasan Okonyo Alekesanda Epipane
22Kakame Demeterio owinyo kede kop noni cunye oko wang di eko waco be, 23“Benyo benyo kame wan oweko kede Alekesanda olanyo wa di eko timo adiereson kede Iyudayan di nan eko doko tek? 24Ango da abino wandiko negi baluwa di aciko mino gi kabedere me wor kede giamia, tetekeny kikony ada.” 25Aso en eko wandiko negi baluwa kaman:
Baluwa kowok kibuta Demeterio but ateker me Iyudayan, amoto wu. 26Wan otie kede yomcuny pien wun igwokunu cikere wu kede wa, di ikounu meede bedo adiereson kede wa, di likame ikounu ribere kede jokwor wa. 27Aso ka wun imeedenu bedo jo kame genere but wa, wan obino mino wu gikaber pi gikame itienu timo ne wa. 28Obino weko wu likame iculunu esolo atot apapat, doko da obino mino wu giamia atot. 29Ango nan atieko kwanyo Iyudayan ki culo esolo kame koculo kare i kare, kede ki culo esolo me munyo, kede ki culo esolo me abaka. 30#1 Makabi 11.34Do medo i wi manono, cako tin ot anyim ango atieko kwanyo wu ki culo acel i kom adek me alos, kede dul me anyakini angweda kame ango oudo apore gamo. Ango likame doko abino gamo gi ki lobo me Yudea, arabo ki adulion adek me Samaria kede Galilaya kame komedo i kom Yudea. 31Yerusalem kede adulion koluke kobino tero be kabedo kacil, likame abino penyo esolo moro kiye. 32Ango nan akwanyo akarunikin kame oudo atie kede i kabedo atek me Yerusalem, di ako mine i cing Ngatel me Josaseredoti, tetekeny en ecib iye jo kame cunye mito pi dare. 33Nan ango agonyo abongo cul moro Iyudayan dedede kame oudo komako ki yi di oko tero gi i kabedere apapat me ajakanut na. Jotel pore geng esolo kame kipoore culo akadi pi doke gi da. 34Likame kobino raro esolo moroni kibut Iyudayan kame tie i ajakanut na i ceng Sabato, i Ebaga me Por Duwe, kede i ceng adongo ace apat. Doko da likame kobino raro esolo moro ceng adek cen arabo anyim me ceng adongo. 35Likame tie ngatamoro kame bino bedo tie kede akarunikin me raro esolo arabo me lolo jo pi kop moroni i ceng nogo.
36“Abino gamo Iyudayan tutumia ot adek (30,000) bedo isirikalen na, di ako bino mino gi cul arom aroma kede me isirikalen na icegun me ka abaka. 37Mogo kikom gi kobino keto i kabedere kame koluko di tek me ka abaka, ace kobino mino tice amalo i ajakanut na. Jotel gi kede jodongo gi bino bedo Iyudayan wad gi, doko da kobino yei negi lubo iswilia gi kede itok gi, bala kame ango abaka atieko ciko kede i Yudea.
38“Adulion adek me Samaria kame koribo i kom Yudea kobino ribo atwal atwala i kom Yudea tetekeny kibed kede ngapug acel kenekene, en Ngatel me Josaseredoti. 39Esolo dedede kame koraro ki bomba me Potolemai kede lobo aluke ango abino mino bala giamia me gwoko garama me tempulo atie Yerusalem. 40Doko da acikere pi bedo mino buli mwaka acelacel siliba akaya tutumia tomon kiwie kany (15,000), di akwanye ki lim me ka abaka kame wok ki adulion kame ango apugo. 41Sente kame jotic me apugan likame obedo kwanyo bala kame oudo kibedo kwanyo i kare kokato cen, cako nan kibino kwanyo di sente nono ko ot i timo tic me tempulo. 42I kare kokato oudo ibedunu kwanyo buli mwaka siliba akaya tutumia kany (5,000) bala esolo pi sente kame koraro i tempulo, manoni da nan bino jik, pien manono obedo sente kame poore konyo josaseredoti kame tio kunono. 43Ka tie jo mogo koudo oringo ot gwokere i tempulo atie Yerusalem, arabo kabedo moroni amake, be pien oudo kitie kede banya but abaka arabo but jo ace, nan kopoore weko gi di oko dwoko negi jamini gi kame oudo komako i ajakanut na. 44Sente me iiko kede temuno gero tempulo bino wok ki dero kano lim me ka abaka. 45Doko da sente me iiko gedo me Yerusalem, kede me gero apama atek luke, kede sente me gero apamai luko bomban ace i Yudea, manono dedede bino wok ki dero kano lim ka abaka.”
46Kakame Jonasan kede jo owinyo kede kope kame Demeterio owandiko, gin likame kiko yei be kibedo kope me ateni, gin kiko dagi gamo gi, pien gin kiyutuno tim areco adongodongo kame Demeterio otimo Isirael kede epone kame en etero gi kede kirac. 47Gin kiko yero pi kodere kede Alekesanda, piento en oudo ebedo dano me agege me poro kede gin kop me mulem; gin kiko kodere kede en i kare lung me kuo mere.
48Abaka Alekesanda oko coko isirikalen atot di kiko ot kigero kimere gi i nyim kakame Demeterio oudo tie iye. 49Abakai are nogo oko riamo i yi, di isirikalen ka Demeterio oko ringo, di Alekesanda oko donyo wapo gi di eko bwono yi. 50Alekesanda oko cane yi kede teko dedede tuno ceng donyo, di oko neko Demeterio i ceng nono.
51Di Alekesanda oko cwano jo but Abaka Potolemi me Kanyape me Misiri kede kop kaman:
52“Ango nan adwogo i ajakanut na di ako bedo i kom me pug ka joakwari na, di nan ako doko ngapug, pien atieko muducaro Demeterio. 53Wan oriamo kede en i yi di wan oko neke kede isirikalen mege, nan ango agamo kom me pug me ajakanut mere. 54Nan ango amito be otim adiereson; nan miango anyom nyari, di ango ako doko bala wodi, di ango ako bino mino wu giamia kame poore ne abaka kede nyare.”
55Abaka Potolemi oko dwoko be, “Oudo ebedo ceng me yomcuny, en ceng kame idwogo kede i lobo ka joakwari ni di iko bedo i kom me ajakanut gi. 56Nan ango abino timo gikame iwaco, do ber kong oriam Potolemai tetekeny ongere, di ango ako bino doko ori bala kame iwaco.”
57Aso i mwaka me tol acel kede ot kanyape kiwie are (162)#10.57 manono en mwaka me tol acel kede ot kany (150) di pwodi likame konywalo Kirisito. Potolemi kede nyare Keleopatura oko yai ki Misiri kioto Potolemai. 58Abaka Alekesanda oko riamo kede gi, di Potolemi oko mine nyare pi nyomo. Di oko timo ebaga me nyom nono Potolemai kede twon angosibib bala kame abakai timo.
59Abaka Alekesanda oko wandiko ne Jonasan baluwa kame lwonge riamo kede en. 60Aso Jonasan oko ot Potolemai kede angosibib pi riamo kede abakai are nogo; en eko mino gi kede jowot gi giamia me siliba, saabu, kede giamia atot apat. Gin cuny gi oko bedo yom i kome. 61Ekodet me jo kalikame cuny gi yom i kome, kede jo kalikame genere kowok ki Isirael oko cokere pi pide, do abaka Alekesanda likame oko keto tam mere i kom gi. 62Abaka oko mino cik be kopoore ngapo ne Jonasan igoen akwakwar me angosibib, di oko timo kamanono. 63Abaka oko mine ebedo i ngete. En eko waco ne jotic mege adongo pi tero Jonasan i dier bomba di kiko kwenyaro jo be likame tie dano moro kame poore pido Jonasan pi tien kop moroni, doko da likame ngatamoro poore wango cunye pi tien kop moroni. 64Kakame jokwor mege oneno kede wor kame komie, kede da kop kame kowaco i kome, di kiko neno di kongapo ne igoen akwakwar me angosibib, gin dedede kiko ringo tenge. 65Abaka oko doko medo mino Jonasan wor i yore me mine bedo dano acel kikom Jowot Abaka me madala amalo, di eko cibe bedo ngadwong me isirikalen kede ngapug me adul mere. 66Jonasan oko dok Yerusalem kede mulem kede yomcuny.
Jonasan Obwono Apoloniasi
67I mwaka me tol acel kede ot kanyape kiwie kany (165)#10.67 manono rom kede mwaka me tol acel kede ot ongwon kiwie kanyaare (147) di pwodi likame konywalo Kirisito. Demeterio me Are wot ka Demeterio oko yai ki Kurete bino i lobo ka joakwari mege. 68Kakame Abaka Alekesanda owinyo kede kop nono, kop nono oko ramo cunye twatwal di eko dok Antiokia. 69Demeterio oko yero Apoloniasi pi bedo ngapug me adul me Koelesiria, di eko coko ekodet adwong me isirikalen di kiko ot gero kimere gi i nget Jamania, di eko cwano kop but Jonasan Ngatel me Josaseredoti kame waco kaman:
70“In en ngat acel kenekene kame tie yi kede wan, doko itieko mino jo tie nyera. Pinyo komio itie meede kede tim me jemo ne wa i piny kobedo imukuran imukuran kano? 71Ka in itie kede gen i kom isirikalen ni, wokunu piny i ebar kan oriamunu di okounu ningo teko wa. Ibino ngeno be jo me bomban tie ganga. 72Kong pepenyo iko bino ngeno be ango abedo ngai, kede da jo akonyo wa obedo alu. Gin kibino waco ni be in likame itwero yi kede wan, pien bin komio joakwari ni oringo tien are ki lobo gi amako gi. 73Aso, nan in likame ibino sobolo yi kede isirikalen nango aringo kede asigiran, kede apat mege me tien i ebar kan, kakame kidi moro kame itwero pwono ingee likame tie, doko da kakame itwero ringo iye li.”
74Kakame Jonasan owinyo kede kop ka Apoloniasi cunye oko wang. En eko kwanyo isirikalen tutumia tomon (10,000) di eko yai ki Yerusalem, di omin mere Simoni da oko riamo kede pi konye. 75Gin kiko gero kimere gi i erute me bomba me Jopa, do jo me bomba nono oko cego negi erute me bomba, pien Apoloniasi oudo tie kede isirikalen mege mogo kunono. 76Do gin kiko suro bomba nono, di lworo oko mako jo me bomba di kiko yabo irutei mege, di Jonasan oko mako bomba nono. 77Kakame Apoloniasi owinyo kede kop nono, en eko kwanyo isirikalen aringo kede asigiran tutumia adek (3,000), kede ace atot me tien di eko ngalo dok cen Asotu, di ineno bala emito medo kato. Do akadi kamanono da, kite kame en oudo egeno kede isirikalen mege aringo kede asigiran, en eko ot i ebar kede dul adwong me isirikalen mege. 78Aso Jonasan oko wapo Apoloniasi paka Asotu di yi oko cakere. 79Do Apoloniasi oudo okwaale weko isirikalen tutumia acel aringo kede asigiran cen ngei gi. 80Jonasan oko niang be jokwor ace oudo opwono ne cen ngee, pien gin kiluko isirikalen mege di kiko bedo gweno imalia i kom gi cako me odiko tuno ceng lokere.
81Do jo ka Jonasan oko guro di kitek, bala kame en oudo eciko negi, di asigiran me jokwor oko ol. 82Di do kakame isirikalen aringo kede asigiran oudo otieko ol kede, Simoni oko bino kede isirikalen ace di kiko suro kede bwono jokwor kobedo isirikalen me tien, di jokwor oko ringo. 83Isirikalen aringo kede asigiran oko sasarun i ebar, kiko ringo Asotu di kiko ot gwokere i tempulo me rubanga gi anyinge Dagon. 84Do Jonasan oko wango bomba me Asotu kede tempulo ka rubanga Dagon, ribo kiton jo koudo oringo ot gwokere i tempulo kanono. En eko da wango bomban ace me ngete di eko yako gin dedede. 85Jokwor kame koneko kede kame kowango kede mac oudo tie tutumia kanyauni (8,000). 86Jonasan oko yai kikuno di kiko ot gero kimere gi Asikelon, di jo me bomba oko wok pi riamo kede en kede wor. 87Jonasan kede jo mege oko dok Yerusalem kede jamini atot kame kiyako.
88Kakame Abaka Alekesanda owinyo kede gikame Jonasan otimo, en eko medo mino Jonasan wor adwong, 89di eko cwano ne gikame korwao i epepet kame kotimo kede saabu, kame oudo jo kame koworo twatwal kobedo wade ka abaka en angapo. En eko da mine bomba me Ekuron kede kabedere koluke pi bedo mege.
Currently Selected:
1 Makabi 10: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.