1 Makabi 8
8
Winyere kede Jo Roma
1Yuda oko winyo iruo me nying jo Roma kede teko gi me yi, kede epone kame kigamo kede jo kame mito kodere kede gin, kede da be gin kisumuno bedo awotino kede jo kame bino but gi. 2Jo oudo owaco ne kop i kom yi me nwangcuny kame jo Roma oyi kede jo Gaul di kiko bwono gi, di kiko dino gi culo esolo but gi. 3Oudo kowaco ne da gikame gin kitimo i lobo me Sipein di kiko mano kabedere kame kokunyo kiye siliba kede saabu. 4Pi iik aber kede dire gi, gin oudo kiko twero keto lobo nono dedede i twer gi, bed bala oudo etie kakabor kede Roma. Gin oudo kibwono abakai me lobere aboco kosurere kede gi; gin kibwono gi kirac adikinicel, di jo kodong mege oko donyo culo negi esolo. 5Gin ki yi di kiko bwono Pilipo, Abaka Pereseu me Makedonia, kede ace apat da kongangar yi kede gi. 6Gin oudo kibwono da Antiokus Adwong, abaka me Esia kame bin ooto kede liecin tol acel kede ot are (120) pi yi kede gi, di etie da kede isirikalen aringo kede asigiran kede cabalan kede twon ekodet me isirikalen. Gin kibwone 7di kiko make kiko tere di ekuo, di kiko dine, en kede abakai ace kame oudo bino lunyo wange, pi culo esolo alac kede mino joe gi atot i cing gin jo Roma, kede pi jalo ne gi adulion mogo abeco, kame ribo 8India, Mede, kede Lidia. Gin kigamo magonogi kibute di kiko mino but Abaka Eumene. 9Di bin jo Gurik otimo iik me mito suro gi kede muducaro gi, 10jo Roma oko ngeno iik nono di kiko cwano ngadwong me isirikalen pi ot yi kede gi. Jo Roma oko neko jo atot kikom gi di kiko mamako mon kede idwe gi kitero; kiyako da jamini gi kiko donyo bedo i lobo nono; kituturo kabedere gi me teko di kiko tero gi bedo ipasoi tuno tin. 11Gin kiko muducaro da jo me ajakanuto kede culere ace koudo tie guro negi, ace kiko mino obedo ipasoi. 12Do kiko dong awotino kede jo ace koudo okodere kede gi kede koudo gengere gwokere but gi. Gin kiko dino piny abakai me kabedere aboco kede kiyapi, di jo dedede kame oudo winyo iruo me nying gi oko bedo kede lworo. 13Jo kame cuny gi oudo mito be bed abakai, gin oudo kimio doko abakai, doko abakai kame cuny gi oudo mito kwanyo gin oudo kikwanyo; gin oudo kidoko jo me aura. 14Do akadi bed bala kamanono da, likame tie ngapug moro me Roma kongapo ocoro me pug arabo kongapo igoen akwar me angosibib bala gianyuta me ewaka. 15Do akaka manono gin kigero ot me cokere kame jo tol adek kede ot are (320) me kansulo oudo riamo iye pi poro kope amako jo kede epone me pugo gi kiber. 16Buli mwaka gin oudo kiyero dano acel pugo gi kede pi bedo ngaloc me lobo gi; gin dedede oudo kiwinyo dano nono, likame oudo kitie kede nyeko moro i diere gi.
17 #
2 Makabi 4.11
Yuda oko yero Eupolemu wot ka Yokana akwar Akos, kede Yasoni wot ka Eleasa di eko cwano gi Roma pi ot moko kop me bedo adiereson kede kop me kodere, 18kede pi lako jo ki ayoko kame kotie keto i ngut gi, pien gin oudo kineno be ajakanut me Guris tie mino jo me Isirael doko ipasoi atwal atwala. 19Gin kiko yai kioto Roma, sapali abor adikinicel, di kiko donyo i ot me cokere di kiko yamo be, 20“Yuda Makabi, imiegu mege, kede Iyudayan dedede ocwao wa pi moko kop me kodere kede me anapakin kede wu, tetekeny ebed i iwandik be wan otiekunu doko jo kokodere, doko da otiekunu doko adiereson.”
21Jo Roma oko gamo tam nono 22#1 Makabi 14.18di kiko wandiko baluwa kobedo kide abatal me nyonyo buronsi kame kogoro iye iwandik, di kiko cwano baluwa nono Yerusalem pi dong kunono bala iwandik amoko kop me mulem kede kodere gi kaman:
23Okwao be gi dedede bed kiber ne jo Roma kede ne ateker me Iyudayan atie i nam adwong kede i lobo kakatek nakanaka. Okwao be yi kede kwor bed bor kede gi. 24Do ka me agege yi opoto Roma arabo i kom lobo moro ace kame en epugo, 25ateker me Iyudayan bino bino mino kony kede cuny gi dedede, bala kame mitere. 26But jokwor nogo gin likame kibino mino gimoro bala cam, jamini me yi, sente, amoto imerin, bala kame kotieko moko i Roma. Gin kibino gwoko ekatala gi me isikan abongo geno ud moro kiye.
27“Iepone acel nono da, ka me agege yi opoto ne ateker me Isirael, bala jo kame kikodere kede gi, jo Roma bino konyo gi kede mit dedede me cuny gi bala kame bino mitere. 28Likame kibino mino jokwor nogo gimoro bala cam, jamini me yi, sente, amoto imerin bala kame kotieko moko i Roma. Gin kibino gwoko isikan gi noni abongo angalo moro.
29“Magonogi en obedo kope me isikan kame jo Roma otimo kede Iyudayan. 30Do ka kotieko keto kope nogi i tic, di waru gin ikodeta are nogi kiko yei kwanyo kiye gimoro amoto medo iye gimoro, alokaloka kame gin kibino timo bino tic.
31“Aso, i kom kop amako tim areco kame Abaka Demeterio tie timo ne Iyudayan, wan otieko wandiko ne baluwa kaman, ‘Pinyo komio itie mino Iyudayan yeno ayoko apek, gin jo kame kibedo jowot wa kede jo kokodere kede wa? 32Ka gin nan kiko kwano wa pi konyo gi, wan obino konyo gi gwoko twero gi di oko bino yi kede wu i yi nam kede i wi lobo kakatek.’ ”
Currently Selected:
1 Makabi 8: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.