1 Makabi 15
15
Antiokus me Kanyaare Okwao Simoni pi Konye
1Antiokus wot ka Abaka Demeterio, oko cwano baluwa ki culere me jo Gurik but Simoni, en ngasaseredoti kede ngapug me Iyudayan, kede ne ateker lung. 2En oudo esomere kaman:
“Baluwa kowok kibuta, ango Abaka Antiokus, but Simoni Ngatel me Josaseredoti kede ngapug, kede but ateker lung me Iyudayan, amoto wu. 3Bed bala jo mogo kame tie kede ikiteso areco omao ajakanut ka joakwari na, ango nan atie mito mane kibut gi di ako mine edok i dwongo mere kangoce sek. Nataman ango atieko pango isirikalen atot pi yi, doko atieko udo imerin atot. 4Nan atie kede iik me mito donyo i lobo nono di ako suro jo kodudubo piny wa di kiko rereto bomban atot i ajakanut na. 5Nan ango atie medo moko ne wu be, ango atieko kwanyo wu ki cul me esolo dedede kame abakai kame ango alubo oudo okwanyo wu kiye. 6Ango nataman atie mino wu akarunikin me cweno sente wu amako lobo wu. 7Yerusalem kede tempulo likame do bino donyo culo esolo. Jamini me yi kame itimunu, kede bomban atek kame ilukunu kede apamai di nan itienu bedo i yi gi bino dong megu. 8Banyi dedede kame itienu kede amakere kede dero me lim ka abaka, arabo kame ibinunu bedo tie kede i kare me anyim, wan obino jalo ne wu atwal. 9Cucuto kame ango atieko dwoko ajakanut na, abino mino wu, kede ateker wu, kede tempulo wu wor adwong, kame bino mino deyo me lobo wu nenere i wi lobo lung.”
10I mwaka me tol acel kede ot kayaare kiwie ongwon (174),#15.10 manoni en mwaka me tol acel kede ot adek kiwie kanyauni (138) di pwodi likame konywalo Kirisito. Antiokus oko donyo i lobo ka joakwari mege pi yi. Isirikalen atot oko lokere bute di Turipo oko dong kede isirikalen anonok. 11Antiokus oko donyo wapo Turipo, di Turipo oko ringo eoto i bomba me Dor koudo tie i dog nam, 12piento en oudo etieko ngeno be peko opoto ne, pien isirikalen mege oudo otieko weke. 13Aso Antiokus kede jo mege oko gero kimere gi kiluko bomba nono. En oudo etie kede jo yi tutumia tol acel kede ot are (120,000), kede tutumia kanyauni (8,000) kame ringo kede asigiran. 14En eko luko bomba nono di imerin da oko donyo i yi nono i bad me nam. En eko roikino bomba nono i bad me itela kede i bad me nam, di likame eko yei ne ngatamoro donyo iye arabo wok ooko.
Roma Okonyo Iyudayan
15 #
1 Makabi 12.16
Di Numeniu kede jowote oko wok ki Roma di kiko tuno Yerusalem kede baluwan kame kowandiko but abakai kede lobere apapat kaman:
16“Baluwa kowok kibuta ango Lukio, ngatic adwong me Roma, but Abaka Potolemi, amoti. 17Jo kame Iyudayan ocwao otuno but wa bala jowot wa kede bala jo kame wan otieko kodere kede gi, pi catuno isikan kangoce sek me awotin kede me kodere. Simoni Ngatel me Josaseredoti kede Iyudayan en kocwao gi, 18di kiko kelo giamia me ebuku me saabu kame pek mere tie kilo tol kany (500). 19Aso nan wan otie wandiko baluwa ne abakai kede ne pinye apapat di okwenyaro gi pi weko timo raco moroni ne Iyudayan, ne bomban gi, arabo ne piny gi iepone moroni. Likame kipoore yi kede Iyudayan arabo konyo jo kame bino suro gi. 20Wan oneno bala ebedo gikame ber pi wan gamo giamia me ebuku kibut gi. 21Pi manono, ka jo mogo me iponeso areco oudo oringino butu ki piny gin, dwokunu gi i cing Simoni Ngatel me Josaseredoti, tetekeny en emi gi alola di lubere kede iswil gin.”
22Lukio bin oko wandiko epone me baluwa acel nono da but Abaka Demeterio, Atalus, Arierate, kede but Arasaces, 23kede ne lobere dedede kame ribo: Samapsame, Siparata, Delos, Minados, Sikion, Caria, Samos, Pampilia, Lisia, Kalikanasus, Rodes, Paseli, Kos, Side, Aradus, Gorotina, Kinido, Saipuras, kede Sirene. 24Oko bin cwano baluwa kacal bala manono da ne Simoni Ngatel me Josaseredoti.
Antiokus me Kanyaare Ongoi ne Simoni
25Abaka Antiokus oko luko bomba me Dor tien me are di eko bedo sure nakanaka. En eko gero nyonyere me turo apama, di eko gengo Turipo kede jo mege likame kitwero wok ooko amoto donyo i yie. 26Simoni bin oko cwano ne Antiokus isirikalen abeco tutumia are (2,000) pi konye yi, karacel kede siliba kede saabu kede jamini atot me yi. 27Do Antiokus oko dagi gamo ginogo dedede, di eko turo isikan kame bin oudo etimo kede Simoni, di eko doko ngakwor mere. 28Antiokus oko cwano ngawote acel kame egeno anyinge Atenobiu pi yamo kede Simoni i kop nono. En ewaco ne Simoni be, “In itie bedo i bomba me Jopa, Geser, kede kabedo atek me Yerusalem, gin dedede kibedo bomban me ajakanut na. 29In idudubo adulion nogo adikinicel di iko kelo peko adwong i lobo. In itieko mako kabedere atot me ajakanut nango. 30Aso nan poore in idwok bomban kame oudo imao nogo, di iko mina esolo kame ibedo raro ki adulion kame in itie bedo iye ooko me Yudea. 31Ka cunyi likame tie mito timo kamanono, poore icula kilo tutumia tomon kiwie kanyaare (17,000) me siliba, pi gikame in itieko dudubo, kede bobo kilo tutumia tomon kiwie kanyaare (17,000) me siliba ace pi esolo kame wok ki bomban nogo. Aso ka li wan otie bino yi kedi.”
32Aso Atenobiu ngawot abaka oko bino Yerusalem. Kakame en eko neno kede cilo me paco ka Simoni, suanin me saabu kede me siliba kame tie i agola mere me cam, kede taitai me ture dedede, kome oko to. En eko mino Simoni kop kame abaka oudo ocwae kede, 33di Simoni oko dwoko be, “Wan likame omao lobo moro me obukui, doko da likame tie gimoro me obukui kame wan omao, do kenekene kwanyo jamini ka joakwari wa, kame i kare moro bin sek jokwor wa oudo otero tetek. 34Do kite kame nataman wan obedo tie kede winyo me dwoko gi, omio nataman wan olido baba jamini ka joakwari wa. 35Do i kom kop amako Jopa kede Geser, bomban nogo oudo tie kelo peko adwong ne jo me lobo wa; wan obino culo wu kilo tutumia adek kede tol ongwon (3,400) me siliba pirgi.”
Atenobiu likame oko dwoko kop moro akadi acel, 36do en eko dok but abaka kede wangcuny di eko waco ne kope nogo, kede da eko waco ne kop i kom angosibib me paco ka Simoni kede jamini dedede kame en eneno. Abaka oko bedo ger adikinicel.
Yokana Obwono Kendebeu
37Kakame manono oudo tie timere kede, Turipo oko donyo i emeri di eko lwi ot i bomba me Orotosia. 38Abaka Antiokus oko yero Kendebeu pi bedo ngadwong me isirikalen i adul me dog nam, di eko mine isirikalen me tien kede me asigiran. 39En eko cike pi ot suro Yudea di eko gero apama luko Kederon di eko cibo ne irutei atek, tetekeny etwer yi kede Iyudayan. Abaka kikome oko meede wapo Turipo. 40Aso, Kendebeu oko ot paka Jamania di eko cako wango cuny jo i yore me suro Yudea, mako jo kede tero gi ot neko gi. 41En eko gero Kederon di eko cibo isirikalen mogo me tien kede me asigiran kanono, tetekeny kisobolo timo asura kede yak i yongayo adwong aoto Yudea, bala kame abaka oudo ociko ne.
Currently Selected:
1 Makabi 15: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.