1 Makabi 14
14
Pi Pako Simoni
1I mwaka me tol acel kede ot kanyaare kiwie are (172),#14.1 manono en mwaka me tol acel kede ot ongwon (140) di pwodi likame konywalo Kirisito. Abaka Demeterio oko coko isirikalen mege di eko ot Mede pi kwano kony tetekeny etwer yi kede Turipo. 2Kakame Abaka Arasaces me Pasia kede Mede owinyo kede be Demeterio oudo odonyo i lobo mere, en eko cwano ngadwong me isirikalen acel kede isirikalen mogo pi mako Demeterio di kiko tere di ekuo. 3Gin kiko ot di kiko bwono isirikalen ka Demeterio, di kiko make di kiko tere but Arasaces, di en eko rwake i jera.
4Lobo me Yudea bin oko bedo kede anapakin i kare me loc ka Simoni. En ebedo timo gikame ber ne ateker mere; apugan mere oudo yomo cuny jo, omio gin kiko nyuto wor bute i kare me kuo mere lung. 5En emedo wor i kome kakame emako kede edoket me Jopa, di eko yabo yongayo aoto i culere me jo Gurik. 6En enyao ikor me lobo mere di eko bedo kede loc koromo i lobo nono dedede. 7En ecoko di eko dwoko jo atot kame oudo komako bala mabus, do eko mako bomba me Geser, Betesur kede kateko kame tie Yerusalem. En eko lonyo kabedo atek nono, di likame ngatamoro oko piem kede en.
8Jo oko donyo puro lobo gi kede mulem, lobo oudo ceko cam, doko da yen oudo nyak. 9Idongia oudo bedo i dog yote me bomba di kiyamo kop i kom jamini abeco kotimere, di ipongai oudo mamano kago kago di kingapo igoen gi kacil me isirikalen. 10En oudo ebedo cwano cam i bomban, doko da eko mino gi jamini me gwoko mulem. Nyinge bin oko bedo iruo i wi lobo lung. 11En emio mulem obedo tie Isirael di jo oko lelo kede twon yomcuny. 12Jo dedede ngat acelacel oudo bedo i dud yat me olok kede me epigi mere abongo ngatamoro kame mio gi lworo. 13I kare nono gin oudo kitieko bwono abakai kobedo jokwor, di do likame tie dano moro oko dong i lobo nono koudo mito yi kede gi. 14En bin ebedo mino kony but jocan i diere me jo mege; en ebedo lubo Iswil ka Musa, di eko rwenyo jo areco kalikame lubo Iswil. 15En emio jamini kame kotio kede gi i tempulo di eko medo deyo me tempulo.
16Kakame kop me to ka Jonasan otuno kede Roma kede Siparata, jo me kugonogo oko bedo kede cwercuny adwong pire. 17Kakame kiko winyo kede be omin mere Simoni olunyo wange bala Ngatel me Josaseredoti, kede da be en oudo etie pugo lobo nono kede bomban mege, 18#1 Makabi 8.22gin kiko giro ne en baluwa i kom kide abatal me nyonyo buronsi, pi catuno isikan me awotin kame gin oudo kitimo kede imiegu mege, Yuda kede Jonasan. 19Oko bin somo kope nogo i nyim jo kocokere Yerusalem. 20Baluwa kame bin owok ki Siparata nono somere kaman:
“Baluwa kowok kibut jopug kede jo me bomba me Siparata, but Simoni Ngatel me Josaseredoti, kede but joadongo kede josaseredoti kede Iyudayan ace, imiegu wa, omoto wu. 21Jo kame wun oudo icwaunu but jo wa owaco ne wa kop i kom deyo wu kede ekite kame koworo wu kede. Wan olelo twatwal pi weno gi. 22Wan oko wandiko kope kame gin kiwaco i itabu me kope me lobo wa kaman: ‘Numeniu wot ka Antiokus kede Antipata wot ka Yasoni, jo kame Iyudayan ooro, obino but wa pi catuno awotin gi kede wan. 23Jo wa cuny gi oko bedo yom pi gamo jo nogi kede wor, di kiko keto baluwa ace kame cal bala mergi i ot me kano itabun kacon, tetekeny jo me Siparata bed tie kede iwandik nono. Baluwa ace kame cal bala manono wan otieko cwano ne Simoni Ngatel me Josaseredoti.’ ”
24Ingei manoni Simoni oko cwano Numeniu Roma kede giamia me ebuku me saabu kame peko mere tie kilo tol kany (500), pi moko kodere me Iyudayan kede jo Roma.
25Kakame jo me Isirael owinyo kede kope nogi dedede, gin kiko penyere ken gi be, “Epone mene kame wan otwero nyuto kede pwoc but Simoni kede awobe mege? 26Piento en kede imiegu mege kede jo dedede me ot ka papa mere kicungo di kitek; gin kiyi di kiko dwoko wi jokwor me Isirael, di kiko mino lobo wa obedo di ogonyere.”
Aso gin kiko giro gikame Simoni otimo i kom kide abatal me buronsi, di kiko cibo gi i kor ipirin i wi moru me Sion. 27Gikame kiwandiko somere kaman:
“I ceng me tomon kiwie kanyauni me duwe me Elul#14.27 manono en duwe me kanyape kibut Iyudayan. i mwaka me tol acel kede ot kanyaare kiwie are (172)#14.27 manono en mwaka me tol acel kede ot ongwon (140) di pwodi likame konywalo Kirisito. manono en mwaka me adek me Simoni bedo Ngatel me Josaseredoti, 28i kacokere adwong me josaseredoti, kede jopiny, kede jotel kede joadongo me lobo wa, bin oko mino wa ngeno kope gi be: 29Nakanaka kame yi oudo opoto i lobo wa, Simoni wot ka Matatia, en ngasaseredoti me ot ka Yekoyarib, en kede imiegu mege oudo kijalo kuo gi di kiko bwono jokwor, pi gwoko tempulo kede Iswil wa. Gin kikelo ne ateker wa deyo adwong. 30Jonasan oribakino jo wa di eko doko Ngatel me Josaseredoti di pwodi likame eto. 31Jokwor me Iyudayan oko bedo kede iik me suro lobo di kiko munao tempulo, 32do Simoni oko wokun di eko yi pi ateker mere. En etio kede sente mere atot me wilo jamini me yi kede me culo isirikalen mege. 33En eko gero apama atek luko bomban atie Yudea, twatwal mere Betesur kame tie i ikor kakame jokwor oudo bin gwoko iye jamini gi me yi, di eko cibo isirikalen me Iyudayan kanono. 34En eko da luko bomba me Jopa kame tie i dog nam kede apama atek, kede da Geser kame tie i ikor me Asidod, kame isirikalen jokwor oudo kong bin bedo iye. En eko cibo Iyudayan odonyo bedo kanono di eko mino bomban nogo gi dedede kame oudo mitere negi me catuno. 35Kakame jo oko neno kede epone kame Simoni maro kede lobo mere, kede epone kame oudo emito kelo kede deyo i ateker mere, gin kiko mine edoko ngatel gi kede Ngatel me Josaseredoti. Gin kitimo manoni piento en oudo etimo ginogi dedede, kede pi tim atie kakare kede pi genere mere but ateker mere.
36“I kare me tel mere jamini dedede oko bedo kiber, bin oko riamo jo kalikame obedo Iyudayan ki lobo wa. Oko da bin riamo tenge isirikalen jokwor ki bad malo me tempulo kakame oudo kigero iye kabedo atek, kakame gin oudo kiyai kiye di kioto munao tempulo. 37Simoni oko cibo Iyudayan bedo kanono di eko luke kede apama atek pi kelo mulem i lobo nono lung kede i bomba, di eko da ropo wi apama aluko Yerusalem. 38Pi manono Abaka Demeterio oko moke pi bedo Ngatel me Josaseredoti, 39di eko mine ebedo ngat acel kikom Jowote, di eko mine wor adwong. 40Demeterio bin otimo manoni piento en oudo ewinyo be jo Roma oudo tie lwongo Iyudayan be jowot gi, jo kodere gi, kede imiegu gi, kede da be jo Roma bin ogamo jo kame Simoni oudo ocwao kede wor adwong.
41“Pi manono, Iyudayan kede josaseredoti gi oko yei be, Simoni kede ikwae mege poore bedo jotel gi kede Jodongo me Josaseredoti tuno kame enabi me ateni obino. 42Simoni bino pugo lobo gi, ebino bedo ngat alo tempulo, kede da ebino bedo ngadwong me Isirikalen gi. En ebino da lono kope amakere kede jamini me yi, kede gero kagwokere atek. 43Jo poore wore i gi dedede. Elagano dedede me apugan kopoore wandiko kede nyinge. Ebino donyo ngapo igoen akwakwar me angosibib kede irikoi me saabu.
44“Likame tie ngatamoro arabo ngasaseredoti moro kame bino bedo tie kede twero me jiko kop moro kikom magonogi, arabo kame bino dagi lubo gikame Simoni owaco, arabo kame bino lwongo cokere moroni abongo udo twero kibute, arabo kame bino ngapo igoen akwakwar me angosibib, amoto kame bino ngapo irikoi me saabu. 45Ngat kame bino timo gi kalikame upere kede kope nogi, arabo kame bino dagi kop moro kikom magonogi kobino mine alola.”
46Jo bin oko yei pi mino Simoni twero me cako tic kede kope kame gin kimoko nogo. 47Simoni bin oko yei bedo Ngatel me Josaseredoti, ngadwong me isirikalen, ngapug me jo kede me josaseredoti, kede ngat agwoko gin dedede. 48Jo bin oko yei pi giro kope kame gin kimoko nogi i kom kide abatal me nyonyo buronsi di oko cibo gi kabedo kidelelei me tempulo, 49kede da pi keto iwandik apat mege kacal bala manono i agola me kano jamini atie i tempulo, tetekeny Simoni kede awobe mege bed tie kede gi.
Currently Selected:
1 Makabi 14: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.