1 Makabi 16
16
1Yokana wot ka Simoni oko yai ki Geser di eko ot waco ne papa mere gikame Kendebeu otimo. 2Simoni oko lwongo awobe mege are adongo, Yuda kede Yokana, di eko waco negi be, “Ango kede imiegu na kede jo me ot ka papa na wan obedo yi tien atot pi Isirael, cako di pwodi otino tuno tin, di oko twero lako Isirael tien atot. 3Do nan ango atieko ti, do wun, pi kisa ka Rubanga, itiekunu cato. Nan lunyunu kawanga kede kawang omina di ikounu ot yi pi ateker wa. Akwao Rubanga ekonyu.”
4Aso Yokana oko yero jo me Isirael tutumia ot are (20,000), pi bedo jo yi me tien kede kame ringo kede asigiran. Gin kiko ot pi yi kede Kandebeu, di kiko buto Modein. 5Odiko sek gin kiko yai ot i ebar, kakame ekodet adwong me isirikalen me tien kede me asigiran oko bino pi riamo kede gi iye; ecilet oudo tie kopoko ikodeta are kobedo jokwor nogo. 6Yokana kede isirikalen mege oko tere pi yi kakame pimere i nyim jokwor. Do kakame Yokana oko neno kede be isirikalen mege oudo tie kede lworo me ngolo ecilet, en eko telo negi anyim ngolo nam, di isirikalen mege da oko lube kakame kinene engolo kede loka. 7En eko poko isirikalen mege, di eko cibo isirikalen me asigiran i diere me isirikalen me tien, pien jokwor gi oudo tie kede isirikalen atot me asigiran. 8Gin kiko kuto agwarai me cako yi di Kendebeu kede isirikalen mege oko ringo; oko neko jo mogo kikom gi do mogo oko bwot oringo ot gwokere i bomba kame koluko kede apama atek me Kederon. 9Oudo oko bin wanakino Yuda omin me Yokana i yi nono, do Yokana oko bedo wapo jokwor paka Kederon, en bomba kame Kendebeu oudo ogero. 10Jokwor oko bobo da ringo i gedo aboco malo atie i poti me Asotu, di Yokana oko wango bomba nono. I ceng nono bin kiko neko jokwor aromo tutumia are di Yokana oko dok Yudea kede mulem.
Neko Simoni kede Awobe mege Are
11Simoni bin oudo oyero Potolemi wot ka Abubu pi bedo ngapug me ebar me Jeriko. En oudo etie kede abar adwong me siliba kede saabu, 12piento en oudo enyomo nyar ka Ngatel me Josaseredoti. 13Aso, en cunye oko tingere di eko mito gamo loc me piny nono, di eko timo iik arac me mito neko Simoni kede awobe mege. 14Kakame Simoni oudo tie mamano kede bomban me lobo, mere pi mito neno rem kame kitie kede, en eko ot Jeriko kede awobe mege are, Matatia kede Yuda, i mwaka me tol acel kede ot kanyaare kiwie kanyaare (177)#16.14 manono en mwaka me tol acel kede ot adek kiwie ongwon (134) di pwodi likame konywalo Kirisito. i duwe me tomon kiwie acel, en duwe me Sebat. 15Wot ka Abubu oko cuko gamo gi di eko tero gi kagwokere atek di etitidi kame en oudo egero, kame oudo kolwongo be Dok. En eko tedo negi ebaga adwong i kanono, do oudo etieko mino jo mege opwono kanono. 16Kakame Simoni kede awobe mege oudo otieko mer kede, Potolemi kede jo mege oko wokun di kiko kwanyo jamini gi me yi di kiko onyaro i kom Simoni i ot me camo ebaga, di kiko neke, en kede awobe mege are, ribo kiton jotic mege mogo. 17Aso en eko timo tim arac noni kalikame nyuto genere, di eko culo bero kede raco.
Yokana Olunyo Kawang Simoni
18Di Potolemi oko wandiko kop i kom gikame en etimo di eko cwano ne abaka, di ekwae pi cwano ne isirikalen pi konye kede pi mino i cinge piny nono kede bomban mege. 19Eko wandiko ne jotel me isirikalen baluwan kame lwongo gi pi bino bute me wek emi gi siliba kede saabu kede giamia. En eko cwano jo mege mogo Geser pi ot neko Yokana, 20kede mogo eko cwano gi ot mako Yerusalem kede emukura kame tempulo cungo i wie. 21Do ngatamoro oko ringo anyim paka Geser di eko waco ne Yokana be oudo kotieko neko papa mere kede imiegu mege, kede da be Potolemi oudo ocwao jo tie bino neke. 22Kakame ewinyo kede kop nono kome oko to, do pi kite kame oudo kotieko kwenyaro en kede sek, omio en eko twero mako di eko neko jo koudo obino pi neke.
23Gi ace kame Yokana otimo, yi kame eyi, tice mege anyuto nwangcuny, medo gero apamai aluko bomban kame en etimo, kede gi abeco dedede kame eko timo, 24kowandiko gi itabu me yutuno tice mege bala Ngatel me Josaseredoti, cako i kare kame en elunyo kede kawang papa mere bala Ngatel me Josaseredoti.
Currently Selected:
1 Makabi 16: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.