1 Makabi 13
13
Simoni Odoko Ngatel me Iyudayan
1Simoni oko niang be Turipo oudo ocoko ekodet adwong me isirikalen pi ot suro Yudea kede dudubo en. 2En eko neno be kop noni oudo omio jo kom gi tie miel kede lworo atek, aso en eko ot Yerusalem di eko lwongo jo karacel, 3di eko tamo dino cuny gi di ewaco negi be, “Wun ingeunu jamini adongodongo kame imiegu na, ango, kede ot ka papa na obedo timo pir Iswil kede pi tempulo. Wun ingeunu da yi kame wan otimo kede peko kame wan obeo iye. 4Koneko imiegu na dedede di kitie yi pi Isirael, ango kena en kame nataman adong. 5Pi manono, nataman ango likame abino dagi jalo kuo na i kare me peko, pien ango likame aber kalamo imiegu na nogo. 6Do ango abino yi pi ateker na kede tempulo, kede pi mon wu kede idwe wu, pien atekerin dedede ocokere kimito muducaro wa pien kidagi wa.”
7Cuny jo oko dwogo kakame kiwinyo kede kope nogi, 8di kiko dwoko kop kede dwan amalo di kiwaco be, “In en ngatel wa kawang Yuda kede Jonasan. 9Yi yi amako wa, wan obino timo gi dedede kame in iwaco ne wa.” 10Aso Simoni oko coko jo yi dedede di kiko susunyo ot tieko gedo me apama koudo luko Yerusalem, di kiko mine ebedo tek i bada dedede. 11En eko cwano Jonasan wot ka Abisalom Jopa kede isirikalen atot; en eko riamo jo koudo tie i bomba nono di kiko dong bedo kunono.
Angalo kede Ngolo Rieko ka Turipo
12Di Turipo oko yai ki Potolemai kede twon isirikalen pi ot suro lobo me Yudea, di eko da tero Jonasan omin me Simoni di kodare adara. 13Simoni kede jo mege oko gero kimere gi Adida, kakame neeno kede ebar. 14Turipo oko ngeno be Simoni oudo olunyo kawang omin mere Jonasan, kede da be Simoni oudo otieko iikere pi yi kede en, aso en eko cwano jo bute pi waco ne be, 15“Ango amako omini tie buta, pien i kare kame oudo etie kede i apugan en oudo etie kede banya amakere kede dero kano lim me ka abaka. 16Pi manono nan in cwai nango kilo tutumia adek me siliba kede awobe mege are pi bedo gikame moko be, en likame doko ebino jemo ne wa, di ango ako bino gonye.”
17Simoni oudo ngeo be gin oudo kitie ngale, do en eko cwano jo ot omo sente kede awobe are nogo, piento en oudo likame emito mino Iyudayan dok ger. 18En oudo etamo be Iyudayan bino yamo be, “Koneko Jonasan pien Simoni odagi cwano sente kede awobe are kame Turipo openyo.” 19Aso en eko cwano sente kede awobe are nogo, do Turipo oko turo cikere mere di likame eko gonyo Jonasan.
20Ingei manono, Turipo oko bino pi suro lobo me Yudea kede pi dudubo en. Gin kiko manaro kiwok ki yongayo aoto Adora. Do Simoni kede isirikalen mege oko bedo ot dwoko nyim gi i bad dedede kame kimito wok kiye. 21Aso jokwor kame oudo tie i kabedo atek me bomba oko bedo cwano kop ne Turipo pi bino but gi di ewok ki yongayo me wi tim, kede pi cwano negi cam. 22Aso Turipo oko iiko isirikalen mege kame ringo kede asigiran pi ot Yerusalem, do iwor nono akako oko cwei di tot, di likame eko twero ot. En eko do ot i lobo me Gilead. 23Kakame enoko kede Basakama, en eko neko Jonasan, di oko yike kanono. 24Di Turipo oko lokere odok i lobo mere.
25Simoni oko omo kom omin mere Jonasan di eko yike i bomba me Modein, en bomba ka joakwari gi. 26Jo dedede me Isirael oko bedo kede koko atek pi Jonasan, di kiko koke pi ceng atot. 27Simoni oko gero cal i wi ates ka papa mere kede me imiegu mege; oudo ebedo cal abor malo kame neeno ki kakabor. Nyime kede cen ngee oudo komwono iye kide ameny. 28En bobo eko da gero kide kanyaare atie kede isondana adek, di wi gi owite di kiboco malo, pi mino wor but papa mere, toto mere, kede imiegu mege ongwon. 29En eko gero ipirin aboco i kom gi, di oko goro cal i kom gi. Cal nogo mogo oudo obedo me ibukui, pi bedo gi me iyutun abedo nakanaka; kede i nget ibukui nogo en eko goro iye cal me imerin, tetekeny jo dedede kame kwango name karuno nene. 30Ates kame en egero Modein nono tie cungo paka tin.
31Turipo oko ngolo rieko ne Abaka Antiokus di eko neke, en oudo ebedo abaka apwodi titidi. 32En eko gamo loc mere di eko doko ngapug me Siria, di eko kelo peko adwong i lobo nono.
33Simoni oko medo gero bomban atek Yudea kame tie kede gedo aboco malo me kino piny, di eko luko gi kede apamai atek kame tie kede irutei kame kocego, di eko coko i yi gi cam atot. 34En eko yero jo di eko cwano gi but Abaka Demeterio me Are pi kwane kwanyo gi tenge ki culo esolo, pien likame tie gimoro aber kame Turipo oudo otimo kwanyo yako lobo gi kenekene. 35Abaka Demeterio oko dwoko ne kop aber amakere kede kwac mere nono i baluwa kame ewandiko kaman,
36“Baluwa kowok kibut Abaka Demeterio, but Simoni Ngatel me Josaseredoti, en ngawot abakai, kede but joadongo kede ateker dedede me Isirael, amoto wu. 37Ango atieko udo ocoro me saabu kede jang tugo kame kotimo kede saabu kame wun icwaunu buta. Nan wan otieko iikere pi timo kede wu isikan amako mulem, kede pi ciko jotel wa kame raro esolo pi kwanyo wu tenge ki culo esolo. 38Ango abino meede mino wu gi dedede kame oudo tie i isikan wa kacon, doko da bomban atek kame wun igerunu bino dong megu. 39Ango asasiro wu ki tim moro arac kame amoto oudo ibedunu timo tuno tin, doko da agonyo wu ki banya me esolo amako abaka, kede ki culo esolo me egere dedede kame oudo kobedo coko ki Yerusalem. 40Ka tie jo mogo butu kame poore i tic me paco ka abaka, kokaruno gamo gi iye. Obedunu kede mulem i diere wa.”
41Aso i mwaka me tol acel kede ot kanyaare (170),#13.41 manono en mwaka me tol acel kede ot ongwon kiwie are (142) di pwodi likame konywalo Kirisito. oko bin kwanyo adiadia kame jo kalikame obedo Iyudayan oudo tie kede i kom Iyudayan. 42Jo oko cako wandiko baluwan kede elagano gi di kilubo kede mwaka nono be, “I mwaka me agege ka Simoni, Ngatel me Josaseredoti adwong, ngadwong me isirikalen kede ngatel me Iyudayan.”
43 #
2 Makabi 10.32-38
I kare nono Simoni kede isirikalen mege oko luko bomba me Geser. En eko gero nyonyere me turo apama, eko kele i bomba nono, eko turo apama di eko mako gedo acel abor malo. 44Jo kame oudo tie i kom nyonyere nogo oko sosomo piny kidonyo i yi bomba, di manono oko mino bomba orubere kitek. 45Cuo me bomba, mon gi kede idwe gi oko nyinyilo igoen ki kom gi pi cwercuny, di kiko yito malo i wi apama me bomba. Gin kiko donyo bako ne Simoni dog gi pi gin winyere kede en be, 46“Bed kede kisa i kom wa, kur iter wa kirac pi raco wa.”
47Aso, Simoni oko winyere kede gi di eko jiko yi kede gi. Do en eko riamo gi tenge ki bomba di eko lonyo ude kame caljwogi oudo tie iye. En kede jo mege kiko donyo Gesera di kiwero were me pak. 48En eko kwanyo gi dedede kame pwoke di eko donyo bedo iye kede jo kame oudo lubo Iswil ka Musa. En eko medo gero apama koluke di tek, di eko gero paco mere kanono.
49Jo kame oudo tie i kabedo atek i bomba me Yerusalem oudo do likame twero yai ot wilo amoto cato gimoro. Aso kec oudo oko dino gi di jo atot kikom gi oko to kec. 50Gin kiko kok but Simoni pi winyere kede gi i kom kop amako mulem, eda eko timo kamanono. Do en eko riamo gi tenge ki kabedo atek nono, di eko lonyo kanono. 51I ceng me ot are kiwie adek me duwe me are, i mwaka me tol acel kede ot kanyaare kiwie acel (171),#13.51 manono en mwaka me tol acel kede ot ongwon kiwie acel (141) di pwodi likame konywalo Kirisito. Iyudayan oko donyo iye di kiwero were me pak, kede di kimako jang tugere, di kigoo adungu, arigirigi, kede suanin abatal me goc, pien oudo kotieko bwono di oko kwanyo ngakwor adwong me Isirael. 52Simoni oko woto iswil be kopoore kwero ceng nono kede kilel. En eko gero di tek apama aluko emukura kame tempulo cungo iye, kakame neeno kede kabedo atek me bomba, di en kede jo mege kiko donyo bedo kanono. 53Simoni oko neno be wode anyinge Yokana oudo otieko doko dwong, en eko cibe ebedo ngadwong me isirikalen, di eko donyo bedo Geser.
Currently Selected:
1 Makabi 13: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.