1 Makabi 12
12
Kodere kede Roma kede Siparata
1Di bin Jonasan oneno be jame dedede tie ot ne kiber, en eko yero jo mogo di eko cwano gi Roma pi moko kede pi mino doko nyen awotin gi kede jo me Roma. 2Eko cwano baluwan amako kop acel nono da Siparata kede kabedere ace apat. 3Aso gin kiko ot Roma di kiko donyo i ot me kansulo di kiko waco be, “Jonasan Ngatel me Josaseredoti kede ateker lung me Iyudayan ocwao wa pi mino doko nyen kodere kede adiereson wa kacon kede Roma.” 4Di jo Roma oko mino gi baluwan pi tero ne apugan me kabedere dedede kame gin oudo kiyaro beo kiye, pi konyo gi dok tuno Yudea kede mulem.
5Man en kope koudo tie i baluwa kame Jonasan owandiko but jo me Siparata:
6“Baluwa kowok kibuta ango Jonasan Ngatel me Josaseredoti, kede kibut kansulo adwong me jotel, kede kibut josaseredoti, kede kibut jo dedede me Yudea, but imiegu wa me Siparata, wan omoto wu. 7I kare kokato cen abaka wu Arius ocwao baluwa but Ngatel me Josaseredoti wa anyinge Onias, kame waco be wan otiekunu doko bala imiegu. Wan nan ocwao akodi baluwa nono karacel kede manoni. 8Onias oko gamo wele kame kocwao nogo kede wor, di eko gamo baluwa nono kame oudo nyuto kakaler mit me kodere kede me bedo adiereson. 9Aso, akadi bed bala nan wan likame omito akodi kodere nono, pien itabun kacil kame wan otie kede mio wan gen kede teko, 10do wan oparo pi cwano ne wu baluwa pi mino aribakin kede adiereson wa kede wu doko nyen. Likame omito bedo bala jo kame kwire, pien kare alac nataman okato cako wun wandiko baluwa but wa. 11Pi manono, wan obedo yutuno wu nakanaka i kare dedede, i kare me ibagai wa kede i ceng ace adongo ka wan otie mino giayala, kede ka otie ilega, pien ebedo gikame opoore pi yutuno imiegu. 12Wan olelo pi deyo kame itienu kede. 13Do wan obeo i atama kede yi atot; abakai kame kio kede wa obedo suro wa. 14I kare me yi nogo wan likame oudo omito lolo wu kede kop me yi, akadi lolo jo ace kame wan okodere kede gi arabo adiereson wa, 15pien wan otie kede kony kame wok kibut Rwot, en ngat oko bwono jokwor wa di eko lako wa. 16Aso wan nan oko yero Numeniu wot ka Antiokus kede Antipata wot ka Yasoni, di oko cwano gi Roma pi mino kodere wa kede adiereson wa acon kede jo me Roma bedo nyen. 17Wan ociko gi da pi bino butu kede amot wa, kede pi mino wu baluwa noni amako kop i kom mino arucakin wa bala imiegu doko nyen bobo. 18Aso nan okwao wu imiunu wa adwokini me baluwa noni.”
19“Akodi baluwa kame Abaka Arius oudo ocwao ne Onias sek oudo tie kaman:
20“ ‘Baluwa kowok kibuta, ango Abaka Arius me Siparata, but Onias Ngatel me Josaseredoti, amoti. 21Wan otieko udo iwandik amako jo Siparata kede Iyudayan, kame nyuto be gin kibedo wade, doko da gin dedede kiwok ki ekeko ka Aburaam. 22Bala kame nan wan otieko ngeno kede kop noni, akwai icwai ne wa kop amakere kede ekite kame kuo wu tie kede. 23Ango atie wandiko butu pi niango wu be, kibut wan, doke kede jamini wun obedo megwa, doko da jamini wada obedo megu. Wan ociko jo kame ocwao butu pi niango wu kop noni bala kame mitere.’ ”
Yi ace kame Jonasan kede Simoni Otimo
24Jonasan oko ngeno be jotel me isirikalen ka Demeterio odwogo pi sure kede isirikalen atot kalamo me agege. 25Jonasan oudo likame mito mino gi kare me donyo i adul mere, aso en eko yai ki Yerusalem eko ot pi riamo kede gi i adul me Kamat. 26En eko cwano ibegai i kimere me jokwor, di gin kiko dwoko ne kop be jokwor oudo tie kede iik me suro Iyudayan iwor. 27Aso kakame ceng otieko donyo kede, Jonasan oko ciko isirikalen mege dedede pi bedo di kiikere, di kitie kede jamini me yi i cing gi cuto pi daro asura kame twero timere iwor. En eko doko da cibo isirikalen jodar rimaro kimere gi. 28Kakame jokwor owinyo kede be Jonasan kede isirikalen mege oudo otieko iikere pi yi kede gi, lworo atek oko mako gi, di kiko cwinyo kimere gi di kiko yai dok. 29Jonasan kede isirikalen mege oko bedo paka tuno odiko di likame kingeo be jokwor gi oudo otieko yai, bed bala kineno di mac liel. 30Di Jonasan kede isirikalen oko donyo wapo gi, do likame kiko mako gi, pien oudo kitieko ngolo ecilet me Eupurate. 31Di Jonasan oko lokere suro imuarabun kame kolwongo be Sabadean. En eko bwono gi di eko yako jamini gi. 32En etuturo kimere gi di eko kato Damasiko, di eko lologo adul nono dedede.
33Kakame manono oudo tie timere kede, Simoni da oudo oyai kede isirikalen mege di kiko ot paka tuno Asikelon, kede bomban ace me kio kame oudo koluko kede apamai atek. En eko parao ot Jopa di eko ngeso mano bomba nono, 34piento en oudo ewinyo be jo me kanono oudo oikere pi mino bomba atek me Jopa but isirikalen kame Demeterio oudo ocwao. En eko cibo isirikalen mogo kanono pi dare.
35Kakame Jonasan odwogo kede, en eko lwongo cokere me joadongo di eko iiko kede gin pi gero apamai atek luko bomban me Yudea, 36kede pi medo ropo apamai koluko Yerusalem doko bor malo, kede pi gero apama apoko kabedo atek me bomba kede kabedere ace me bomba, tetekeny jokwor kur twer timo cat amoto wil ki bomba. 37Aso gin kiko cokere pi iiko gero bomba; apama koudo tie i aditot i bad tetu kide kagamogo oudo opopoto, di en eko temuno gero adul me apama kame oudo kolwongo be Kapenata. 38Simoni doko da oko medo gero bomba me Adida kame oudo tie i bad imukuran. En eluke kede apama atek di eko keto ne irutei kame kocego.
Turipo Omako Jonasan
39Turipo oudo mito doko abaka me Esia, aso en eko bedo kede iik arac i kom Abaka Antiokus. 40En oudo etie kede lworo be Jonasan likame bino yei ne timo kamanono, be cengemogo ebino cako yi kede en pi genge timo kamanono. Aso en eko yai kede isirikalen mege di kiko ot Bet San pi mito mako Jonasan kede neke. 41Jonasan oko yai kede isirikalen abeco tutumia ot ongwon (40,000) pi ot riamo kede en i Bet San. 42Kakame Turipo oneno kede be Jonasan oudo obino kede isirikalen atot, lworo oko make yi kede gi. 43Aso en eko lokere game kede wor i kimere gin di eko donyo yamo kope abeco i kome i nyim jowote dedede, di eko mine giamia di eko ciko jowote kede isirikalen mege pi winyo kop ka Jonasan bala kame koto kiwinyo kede meren. 44En eko waco ne Jonasan be, “Pinyo komio in imio twon jogo dedede bedo kede peko do di wan likame otie yi da? 45Twar gin kidoki i miere gi, di iko yero jo mogo anonok dong kede in, di iko upere keda ot Potolemai. Ango abino mine i cingi, karacel kede bomban ace kame koluko kede apamai atek, kede isirikalen kodong, kede jotic adongo, di ango ako bino lokere ako dok paco. Kop nono en komio nataman ango atie kan.”
46Jonasan oko bedo kede gen bute di eko timo bala kame ewaco; en ecwao isirikalen mege odok i lobo me Yudea. 47En eko dong kede cuo tutumia adek; kikom gi eweko tutumia are (2,000) odong Galilaya, di tutumia acel (1,000) oko upere kede en. 48Do kakame Jonasan odonyo kede i bomba me Potolemai, jo me kunono oko cecego irutei me bomba di kiko make, di kiko neko jo dedede koudo oupere kede en.
49Di Turipo oko cwano isirikalen me tien kede me asigiran ot Galilaya kede i Aditot Adwong, pi ot neneko isirikalen ace ka Jonasan. 50Do kakame isirikalen ka Jonasan owinyo kede be oudo komako Jonasan di oko neke karacel kede isirikalen ace koudo oupere kede en, gin kiko bedo dino cuny ngat acelacel di kiko sirito karacel di kitieko iikere pi yi. 51Kakame isirikalen jokwor oneno kede be Iyudayan oudo otieko iikere pi yi pi kuo gi, gin kiko lokere kidok. 52Di isirikalen Iyudayan oko dok otuno Yudea kede mulem, do oudo kitie kede lworo adwong. Di ateker lung oko koko kitek pi Jonasan kede isirikalen kame koneko karacel kede en. 53Atekerin ace koluko gi oko tamakino pi muducaro gi, pien kiwaco be, “Gin kili kede ngatel arabo ngat kame konyo gi. Omuducarunu gi pitipit di wi jo ko bino wil kede gi atwal atwala.”
Currently Selected:
1 Makabi 12: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.