MoaOroma 9
9
Ahogbrẽ pa la moarehwi baŋ a sla
1Ekplo ba ame e lu he lo e wo adlidzi. Ame e wo arehwĩ ba Ekristi angyiŋ. Ame e sheŋ akpro mbo. Enzi ba eso me, ba Ogbgaodzi o ri ekʼpo eshri lo a mbo, e lu e da me ba ame e sheŋ akpro angyiŋ mbo. 2Eso e tpi me ayi e gre eshri okyku moarehwi ba embre me, nga alo o ka ó khwo me eso ondakyeŋ ku-ku mbo, okyku eshi moa a wo egʼba me ta la amanzhli me angyiŋ! 3Okyku mo sha, ame e klo, o wo ba alo ó kpo ó gbu, Ahogbrẽ a hre anyu a ygi me, nga a ngʼba me a sku Ekristi. 4Moa a wo moarehwi ba Ahogbrẽ a sla angyiŋ. A da mo a dzu moanwye baŋ, nga a da mo a hwiŋ ogʼba ba ekʼpo baŋ. A hwim pa la mo a khwo nga a shri odaŋ a shri a da mo. Moa a yi ozhẽ adlidzi ba o lu Ahogbrẽ ma, nga moa a yi ohwihwim ba Ahogbrẽ a hwim pa la mo. 5Moa a zgi ogu moadimo ba ogbyi. Ekristi nga, moa a mbre ŋa ogu mo angyiŋ. Agi e hlu Ahogbrẽ la a ri ekʼpo eshri ekployaŋ a mbo eshko gbagbu-amo! Amin.
6E ka, ame e lu mi ma ohwihwim ba Ahogbrẽ o tsu o gbu angyiŋ mbo! O ba alo o wo eka he a mbo, Ahogbrẽ a sla moarehwi ba Esrayila mvye angyiŋ mbo. 7Moanwye ba Ebrahim mvye angyiŋ a wo moanwye Ahogbrẽ mbo. Okyku eshi Ahogbrẽ a nyuŋ Ebrahim a lu mi le, Moanwye ba Eshaku sha angyiŋ moa á ba a bzi mo moanwye boŋ. 8Okyku eshi alo o dzu, moanwye ba moa a mbre mvye angyiŋ a wo moanwye ba Ahogbrẽ mbo. Ambo moanwye ba moa a mbre mo ozhẽ ohwihwim ba Ahogbrẽ, moa a sko moahi lo a zga eka moanwye ba Ebrahim ba adlidzi. 9Okyku eshi Ahogbrẽ a hwim a lu mi le, Omba ó kpo bgu le, ame é bla é ba nga Asaratu á mbre anwyealom.
10Ohe lo sha angyiŋ mbo, okyku eshi moanwye ba Erifkatu aha moa a pu ada, aŋa a wo adigi Eshaku. 11-12Ambo Ahogbrẽ a tsa ŋa, ba aŋa angyiŋ a sla anwye akyeŋ he lo okyku o bli ekplo baŋ a sheŋ a zga. Okyku eka he a nyuŋ Erifkatu a lu mi le, Andakʼpo á dzu eka anwye-odne ba andetse. Aŋa a lu ayga moa a mbre mo, aŋa a lu ohe lo ayga moa a kpo ayakplo adzi, ta la ayakplobi. Okyku eka he, o wo zheŋ ba Ahogbrẽ a bzi mo okyku odlodzi mo angyiŋ mbo. 13Odlo Ahogbrẽ o lu mi le, Ame e klo Eyakubu, ambo ame e tla Esuwa.
14Agi nga e lu eshi eka he lo? Agi é lu mi ma Ahogbrẽ a la a klo eshri? O wo eka he angyiŋ mbo. 15Ahogbrẽ a nyuŋ Omusa a lu mi le, Ame é ka are ba ame e klo o ka ayi ekŋe baŋ, ayiekŋe, nga ame é kpo e ghwo are ba ame e klo o kpo o ghwo la ŋa. 16Okyku eka he, ekplokyeŋ ba Ahogbrẽ a la a kpo, e wo okyku ekplo ba arehwĩ a klo mbo, o mbo le okyku otum ba arehwĩ a la a kpo angyiŋ mbo, ambo o wo okyku okayiekŋe ba Ahogbrẽ sha angyiŋ. 17Odlo Ahogbrẽ o lu ta la Efirauna o lu mi le, Ame é doŋ o dzu anyuŋ-areŋ okyku o da me e kpo otum ka la ŋo nga e tsa moarehwi ekʼpo me, nga e da obiŋ mvye o yi eshko me. 18Okyku eka he o tsa zheŋ ba Ahogbrẽ a la a ka arehwĩ baŋ a klo ayi ekŋe, nga baŋ a la a da moakyeŋ a shye eshri.
Olom ta la okayiekŋe ba Ahogbrẽ
19O dzu mbo akyeŋ eshki bimi á kso á zhĩ me a lu mi le, O wo eka he angyiŋ le, okyku eshi Ahogbrẽ a la a klo odlo ta la arehwĩ? Arekyeŋ a kpo a gbu baŋ a tla ekplo ba Ahogbrẽ a zga eso ba o kpo-kpo? 20Akyemeazba, aŋo o ri ayi boŋ o zhĩ Ahogbrẽ ekplo baŋ a zga eso ba o kpo-kpo? Eshyẽ ba ongyim e la e zhĩ are la a tra ŋa a lu mi le, Okyku eshi aŋo o tra me eka he, mbo. 21Are la a tra eshyẽ, a kpo a gbu baŋ a kpo otum ta la ongyim lo eka baŋ a klo. A kpo a gbu baŋ a tra eshyẽ edgu eha ta la agbro ongyim akyekyeŋ. Aŋa a kpo a gbu baŋ a tra eshyẽ la e wo egbmo nzenze, nga aŋa a kpo a gbu baŋ a tra eshyẽ la e wo ofa.
22Ekplo ba Ahogbrẽ a kpo e wo ekakahelo angyiŋ. A klo o tsa olom baŋ nga o da moare a yi ekʼpo baŋ. Okyku eka he nga, aŋa a kpo ble-ble okyku baŋ a la a kpo heheŋ pa la moa ba eso e tpi ŋa ayi pa la mo. E mbi ekplo la e ra, e ra ba moa a jygi mo sha a mo. 23Nga aŋa a sa a klo o da gi e yi ekekʼpo baŋ a zhiŋ a ygi okyku gi okyku okayiekŋe baŋ. Agi angyiŋ aŋa a nyuŋ a kpo okyku o da gi e hwiŋ ekʼpo baŋ. 24Agi angyiŋ aŋa a sla gi. A sla moare eshki moaEyahuda sha mbo, ambo a sla moare eshki moa la a wo moaEyahuda mbo a mbo. 25A lu akpa ba Osiya a lu mi le,
Moarehwi la a wo moarehwi me mbo, ame é bzi mo moarehwi me.
Moarehwi ba ame e mbi e klo mbo, ame é da mo a dzu moarehwi ba eso me.
26Nga okro moa a nyuŋ mo a lu mi le,
Agimi e wo moarehwi me mbo,
Okro lo angyiŋ, moa á ba a bzi mo moanwye ba Ahogbrẽ la a wo la eso ma.
27Eshaya a lu odlo eshri moaEsrayila a lu mi le, O wo moarehwi ba Esrayila a wo nzenze eka endase ba anyuŋ-ondzu a mbo, moa ple sha angyiŋ á ba a gro. 28Ahogbrẽ nga a nyuŋ ekployaŋ a mbo a kpo shoshoŋ pa la moarehwi ba obiŋ hi mvye. 29O wo eka ba Eshaya a lu ayga a lu mi le, Adigi-odne la a wo ekʼpo ma a dzu moa ba ogu bi a zga ma ple mbo e mbi, agi é ba e dzu eka ba Osodom ta la Ogomora.
MoaEsrayila ta la Oshpaodzadzi
30Agi nga e lu la eshi a mo? Agi é lu mi ma, moa la a wo moaEyahuda mbo la a zga eso e mbi ba o da mo a shri opyapyaŋ a zga agʼbaha mo ta la Ahogbrẽ mbo, omba moa a bmi ba adlidzi nga, moa a shri opyapyaŋ a zga agʼbaha mo. 31Ambo moarehwi ba Ahogbrẽ a sla mo, moa a klo o da okpaŋodaŋ angyiŋ o shri opyapyaŋ o zga agʼbaha mo ta la Ahogbrẽ, ambo moa a hwiŋ lo mbo. 32Okyku eshi moa a hwiŋ lo mbo? Okyku ba moa a sko ekployaŋ a mbo a zga obmi ba adlidzi mbo, ambo moa a sko ekployaŋ a mbo a zga otum sha. Moa a sheŋ evgo ezhim 33ba odlo ba Ahogbrẽ o lu eshri lo o lu mi le,
Agimi e ka, ame e shri ezhim ba moare á ba a sheŋ evgo ma angyiŋ é shri é zga osku ba Ezayoŋ.
Moa á sheŋ evgo ezhim he lo.
Nga moare la a bmi ba adlidzi ka la ŋa le, moa á gbu anzi mbo.
Currently Selected:
MoaOroma 9: EGONT74
Highlight
Share
Compare
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
