MoaOroma 10
10
1Agimi anáŋ, ame e klo e gre eshri eso me ba moarehwi me a hwiŋ oshla! Ame e fa olu nzenze okyku mo. 2Ame e kpo e gbu ba ame e zgi egŋe e lu mi ma moa a bmi ta la Ahogbrẽ osheshye. Ambo ekplokyekyeŋ, moa a yi adlidzi zhezheŋ ayga a bmi ta la Ahogbrẽ mbo. 3Moa a yi ozhẽ ba Ahogbrẽ a la a shri opyapyaŋ a zga agʼbaha baŋ pa la moarehwi mbo. Moa a klo ozhẽ ba eshrishri emo ondundum, okyku eshi moa a sõ ozhẽ ba Ahogbrẽ a shri opyapyaŋ a zga agʼbaha baŋ pa la moarehwi mbo. 4E gno, Ekristi a sheŋ a da otum ba odaŋ o tspi bgu, okyku eka he, areyaŋ a mbo la a bmi ba adlidzi moa á shri opyapyaŋ á zga agʼbaha baŋ ta la Ahogbrẽ.
Oshla o wo okyku areyaŋ a mbo
5Omusa a ta akpa eshri oshri opyapyaŋ a zga agʼbaha moarehwi ta la Ahogbrẽ, ozhẽ okpaŋodaŋ. A ta a lu mi le, Are la a la a sko odaŋ a zga esĩ le, á hwiŋ eso okyku lo. 6Ambo moa a ta akpa eshri oshri opyapyaŋ o zga agʼbaha ba Ahogbrẽ pa la moarehwi ozhẽ obmi ba adlidzi, nga a lu mi le, Aŋo o zhĩ eŋo mbo o lu mi le, Ayi á ba a yi Ongyeŋ, okykujo da Ekristi a ba obiŋ hi? 7O mbo le aŋo o zhĩ mbo o lu mi le, Ayi á ba a yi ongybi eshyẽ nga á da Ekristi á ba a kso? 8Moa a lu mi le, Odlo ba Ahogbrẽ o wo osusku ka la gimi nga o wo anyu bimi ta la eso bimi. Odlo he lo a mi, o wo oshpa ba obmi ba adlidzi bimi e la e nyum he lo. 9O wo boŋ o zgi egŋe la anyu boŋ o lu ma Eyesu angyiŋ a wo Adigi, nga o wo boŋ o bmi ba adlidzi eso boŋ ba Ahogbrẽ a kso ŋa ongybi le, aŋo ó gro. 10Okyku eshi moa a shri opyapyaŋ a zga agʼbaha bi ta la Ahogbrẽ okyku bi e bmi ba adlidzi ka la ŋa eso bi angyiŋ, nga agi e hwiŋ oshla okyku bi e zgi egŋe la anyu bi. 11Odlo Ahogbrẽ o lu mi le, Areyaŋ a mbo la a bmi ba adlidzi ka la ŋa, á ba a gbu anzi mbo ku-ku. 12Ozhẽ he lo o hwile okyku areyaŋ a mbo angyiŋ. Ekplokyeŋ e wo ondundum okyku moaEyahuda, pa la moa la a wo moaEyahuda mbo, mbo. Ahogbrẽ a wo okyekyeŋ angyiŋ, Ahogbrẽ angyiŋ a wo Adigi mvye, nga a la a shri owlama nzenze a da areyaŋ a mbo la a vẽ ŋa. 13Odlo Ahogbrẽ o lu mi le, Areyaŋ a mbo la a bzi eshko ba Adigi-odne, á ba a gro.
14Ambo moa á kpo anyu á ba a ba okro baŋ, o wo ba moa a bmi ba adlidzi mbo? Nga moa á kpo anyu á ba a bmi ba adlidzi o wo ba moa a gno oshpa a ka ondakyeŋ mbo? Nga moa á sa a kpo anyu á ba a gno oshpa lo, o wo ba arekyeŋ a nyum oshpa a ygi mo mbo? 15Moa á nyum oshpa lo anyu, o wo ba moa a da moa la a nyum oshpa a gre mbo? Eka ba Odlo ba Ahogbrẽ o lu mi le, Oba-ba ba moa la a nyum oshpaodzadzi o wo ekplo ovye o gre eshri! 16Ambo moare pyeŋ angyiŋ a yga oshpaodzadzi mbo, okyku eshi Eshaya a mbo eshrishri eŋa a lu mi le, Adigi-odne, ayi angyiŋ a bmi ba adlidzi ta la oshpa bi e nyum? 17Okyku eka he, are a la a bmi ba adlidzi ambla baŋ a gno oshpa lo, nga á gno oshpa o wo ba moa la a nyum oshpa ba Ekristi a wo ma.
18Ambo ame é sa e zhĩ, o wo adlidzi angyiŋ, ba moa a gno oshpa mbo? Adlidzi, moa a sheŋ a gno oshpa lo, okyku eshi odlo Ahogbrẽ o tsa o lu mi le,
Enzi moa la a nyum oshpa e tsu e gre okroyaŋ a mbo obiŋ hi.
Odlo lo o tsu o gre eygi ba obiŋ hi lo.
19Nga ame e sa e zhĩ nganga. O dzu eka ba moarehwi ba Esrayila a yi mbo ku-ku angyiŋ? Omusa ababgo baŋ a shri otnoma a shri a ba oriori, a tno ma a lu mi le,
Ame é da gimi é kpo efpu pa la moarehwi la a wo okyekyeŋ ka la gimi mbo.
Ame é da olom o kpo gimi pa la moarehwi la a wo eka moadro.
20Eshaya a zga eso gble nga a lu mi le,
Moa la a klo me mbo ayga, a sa a hwiŋ me,
Nga ame e ra e tspa egi ayi moa la a klo me mbo.
21A lu odlo eshri moaEsrayila a lu mi le, Ame e ndba abgo me ma-me o tsa ba olum o gbu egi ayi moarehwi la a shye eshri, nga a fa eso.
Currently Selected:
MoaOroma 10: EGONT74
Highlight
Copy
Compare
Share
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
