Marako 3
3
ŋuto logon könin a lokworok
(Köti Matayo 12.9-14; Luka 6.6-11)
1A Yesu köti lupöni i kadi momoret, a lele ŋuto gwe nyu logon könin a lokworok. 2a kulye ŋutu diŋe Yesu, a meddi kode nye ŋona totoke ŋilo ŋuto i Sabata, anyen se bubulö tuggö adi nye a koŋdya toron.
3A nye takiŋdye ŋuto logon könin a lokworok lo adi, Ŋine ki ko ŋutu kiden. 4A kirut Yesu pije se adi, Nan nagon saret a ruk adi ti konani kona i Sabata? Ŋo na ’but, kode ŋo naron? I lwöggu na ŋutu kode i tatuja na se? Ama a lepeŋat yiŋani taliŋ. 5a nye boŋgi lepeŋat ko woran a iŋge delya kogwon töilyet kase a iŋgo, a nye takiŋdye ŋuto lo adi, Riörö könin ilot. A lepeŋ riöddi riöddu, a könin lo lepeŋ gwe a lo ’but. 6A Parusijin lupuŋdye kaŋo i kadi momoret, a momori ’de ’de ko ŋutu lo juŋdyö Erode kilo i pirit na geleŋ, a suluje yeyeet nagon mwönyörikin Yesu, ko lepeŋ tatua ada.
Lodir lo ŋutu i kijit na tor
7A Yesu se ko ŋutu kanyit kajujumuk kulo kö ’yi ŋinu pirit a iti i tor na Galilaya, a ŋutu jore kepoddi lepeŋ, logon a po Galilaya ko Yudaya, 8ko Yerusalema, ko i kak na Idumea, ko i nu pele na Yardene, se ko ŋutu ti jur lo Turo ko Sidona. Kilo ŋutu jore parik a tu ko lepeŋ yu kogwon se a yiŋ liŋio ti ŋo liŋ nagon lepeŋ aje kon kune.
9 #
Mar 4.1; Luk 5.1-3 A nye takiŋdye ŋutu kanyit logon a kajujumuk kulo anyen ki ’bo lo ’dit möŋdu kanyit nyona kogwon ŋutu jore parik, an lepeŋat ködyö ri ’dija nye;
10kogwon lepeŋ aje toke ’ya ŋutu jore, nyena a ŋutu liŋ lo gwon ko twana ri ’diaddi ’börik ko lepeŋ yu i ’bo ’yu na lepeŋ. 11A na meddi mulökö lorok lepeŋ nu, a se ’do ’done kak ko lepeŋ i komor, a woŋe adi, Do a Ŋuro lo Ŋun. 12A nye kukuji se parik adi an se ködyö tin nye i dena.
Yesu a wuluŋdyö luyökie puök wot murek
(Köti Matayo 10.1-4; Luka 6.12-16)
13A kirut Yesu kiyaddi i merya a luŋukiŋdye mugun ŋutu logon nye ’de ’dekan kulo; a se iti ko lepeŋ yu.
14A nye wuluŋdye ŋutu puök wot murek anyen gwon ko lepeŋ, ko anyen yökiöji i tokuöddu na Loŋe Lo ’but,
15ko anyen wuju kido nagon riköddi mulokö lorok kaŋo. 16Nyena a karin kase gwe a ko Simona logon nye a gwijö a Petero; 17ko Yakobo Ŋuro lo Jebedayo se ko Yoane luŋaser Yakobo, logon nye a gwijö se a Boanerege, logon nyönyökö adi rörö ’yu gwoso kipya lo ki; 18ko Aŋöarea, ko Pilipo, ko Bartolomayo, ko Matayo, ko Toma, ko Yakobo Ŋuro lo Alapayo, ko Tadayo, ko Simona Kawelonit, 19ko Yuda Isikariota lo tiŋdu lepeŋ i tatua lo.
Yesu a nöki adi lepeŋ gwon komulökötyo Joron logon a Belejebula
(Köti Matayo 12.22-32; Luka 11.14-23; 12.10)
A kirut Yesu iti mede. 20A ŋutu jore köti momoruŋdye i pirit na geleŋ, nyena a Yesu ko ŋutu kanyit tine bulö nyesu. 21A na yiŋge karu kanyit kine kulya nu, a se lupuŋdye kaŋo i morga na lepeŋ, kogwon se kulya adi, Lepeŋ a mamala.
22 #
Mat 9.34; 10.25 A katodinök ti Saresi ti Mose logon po Yerusalema yu köti kulyani adi, Lepeŋ gwon ko Belejebula, a nye riköddi mulökö lorok kaŋo ko riŋit na duma lo mulökö. 23a Yesu lupundye ŋutu kulo kanyit ni, a pije lepeŋat i lilim adi, Satani bubulö riköddu Satani kaŋo ada? 24Ko ködyö tumatyan a koŋa mugun, ŋina tumatyan ti bulö yeŋon a tumatyan. 25a ko ködyö mede a koŋa mugun, ŋina mede ti bulö yeŋon a mede. 26A ko Satani ködyö a ŋien ki i mörö ko mugun nanyit, a iŋge koŋa, a nye tine bulö yeŋon, a ŋina gwe a ’dutet nanyit.
27Ama ŋuto ’bayin logon bubulö lupö ko ŋuto lo riŋit kadi i ryaggu na tito kanyit, a kokwe kiyaŋ lepeŋ totor ŋuto lo riŋit lo; a kirut a nye ’diri bulöni bulö ryaggu kadi nanyit.
28’Diri nan takiŋdya ta adi, ŋutu bubulö pitöki i toronjin kase liŋ ma ’di laesi liŋ nagon se lalauŋdye kine;
29 #
Luk 12.10
ama ŋuto logon lauŋdya Mulökötyo Loke lo ti bulö pitöki kwöŋ, ama lepeŋ gwon ko toron nagon ti ’baka.
30Yesu jambu kine kulya kogwon lepeŋat a kulya adi nye gwon ko mulökötyo loron.
Ŋote Yesu se ko luŋasirik ti Yesu a po
(Köti Matayo 12.46-50; Luka 8.19-21)
31A kirut ŋote Yesu se ko luŋasirik kanyit lo ’dure; a se gwo ’de kaŋo, a se soŋdi ŋuto i dogga na lepeŋ. 32a ŋutu jore iŋge si ’daki ko Yesu nyona, a se takiŋdye lepeŋ adi, Ŋuti ko luŋösurök kulu kaŋo pija do. 33a Yesu pije adi, Ŋa nagon a yaŋgo? Ko ŋa logon a luŋasirik kwe? 34a nye boŋgi ŋutu logon si ’da kanyit nyona kulo, a nye kulyani adi, Kulo ŋutu a yaŋgo ko a luŋasirik kwe! 35ŋuto logon kökon ŋo nagon Ŋun ’de ’dekan na, nye lo gwon a luŋaser lio, ko a kiaser nio, ko a yaŋgo.
Currently Selected:
Marako 3: BBE
Highlight
Copy
Compare
Share
Want to have your highlights saved across all your devices? Sign up or sign in
Bari Bible © United Bible Societies, 1979.
