Marako 4

Lilim lo kaweyanit

(Köti Matayo 13.1-9; Luka 8.4-8)

1 # Luk 5.1-3 A Yesu köti suluje todiŋdyö nyona ko tör na Galilaya. A ŋutu jore parik momoruŋdye kanyit ni, ko ŋina kwe a nye kije i ki ’bo kata lo gwon i tör kata lo a si ’dakine kak, a ŋutu liŋ gwe i kijit. 2A nye todinikiŋdye se ŋo jore i lilimön.A na todiŋdye nye se nu, a nye kulyani adi, 3Yiŋge ta! Kaweyanit a tu i weja na nyomot. 4A gwe sona, na gwoŋdi nye i weja nu, a kulye nyomot ’do ’done nyona ko kiko, a kwen poŋdi po a kwökwöddi se. 5A kulye nyomot ’do ’done i kujöŋ nagon a röpökiŋdyö i lelya loki, a ’de ’de se pune pun kogwon kujöŋ ti gwon jore; 6a nagon kolor gwe ki nu, a se salani sala, a teteyone teteyon kogwon kokori kase a ko ’bekoddu kak. 7A kulye nyomot ’do ’done i kiden na kikwa, a kikwa iŋge ’duröddu ki a iŋge ’di se, a se tine toran. 8a kulye nyomot ’do ’done i kak na ’but a ’duruŋdye ki, a tore toran, kunie kusik ti ’bolot ko konyen merya musala, kunie ko merya buker, kunie ko mia geleŋ. 9A Yesu kulyani adi, ŋuto logon ko swö yiŋesi ti nye yiŋge kine kulya.

Kwe nagon Yesu jambu ko lilimön

(Koti Matayo 13.10-17; Luka 8.9-10)

10A nagon Yesu gwe geleŋ nu, a ŋutu logon gwon ko lepeŋ nyona se ko ŋutu kanyit kajujumuk puök wot murek kulo pije lepeŋ i kulya ti kilo lilimön. 11A nye waddi adi, Ta aje tiki i deŋdya na lwönö ti tumatyan na Ŋun, ama ŋo liŋ nagon jamaki ŋutu lo gwon kaŋo kulo jama a lilimön; 12#Yis 6.9, 10kweja adi se memet ama a se tine gwulu, se yiyiŋ ama a se tine kurun, kogwon ko se ködyö a kurun a se ködyö löpukuŋdye ko Ŋun ni a pitökine pitöki.

Yesu tökoŋu tokoret na lilim lo kaweyanit

(Köti Matayo 13.18-23; Luka 8.11-15)

13A kirut Yesu pije se adi, Ta a ko kurun lo lilim le? A kirut ta mo kurundyö lilimön liŋ ada? 14Kaweyanit weja kulyaet lo Ŋun. 15Kilo lo gwon i kiko kulo a ŋutu logon kulyaet a weki kase i töilyet, a na yiŋge se ŋilo kulyaet nu, a Satani poŋdi ’de ’de i joŋga na ŋilo kulyaet logon a weki kase i töilyet lo. 16Gwon sona köti i nyomot logon a weki a ’do ’done i kujöŋ nagon a röpökiŋdyö i lelya loki, kilo a ŋutu logon ko aje yiŋga ŋilo kulyaet a ’de ’de wuji nye ko lyöŋön; 17ama kogwon kokori kase a ko ’bekoddu kak, a se mönuŋdye diŋit a na ’dit, ama i diŋit nagon lepeŋat a yöyöŋö ko a sasanya kogwon kulya ti lo kulyaet nu, ’de ’de a se kukutörö bot. 18A kulye nyomot logon a weki a ’do ’done i kiden na kikwa kulo, kilo a ŋutu logon a yiŋga ŋilo kulyaet, 19ama a wiwinyesi ti na kak, ko nyaŋu na tukwörien, se ko kunie ’dekesi liŋ a lupö nyin, a ’dije ŋilo kulyaet, a nye gwe a pudi. 20Ama kulye nyomot lo weki i kujöŋ na ’but kulo a ŋutu logon a yiŋga ŋilo kulyaet a iŋge wu, a tore toran, kunie kusik ti ’bolot ko konyen merya musala, kunie ko merya buker, kunie ko mia geleŋ.

Lombo mumukö ko kupö?

(Köti Luka 8.16-18)

21 # Mat 5.15; Luk 11.33 A Yesu köti pije se adi, ŋuto ŋona joŋdya lombo kadi anyen mumuk ko kupö? Kode anyen ’delakin i mukök na dotoet? Lombo ŋona ti jwe anyen togwi ’diki ki le? 22#Mat 10.26; Luk 12.2Kogwon ŋo liŋ nagon ’de ’dela ködyö kwekweya, a ŋo gwe ’bayin nagon a ’dela a lwön nagon ködyö tine jwe köke i parara anyen memeta. 23ŋuto logon ko swö yiŋesi ti nye yiŋge kine kulya.

24 # Mat 7.2; Luk 6.38 A köti nye kulyani ko lepeŋat adi, Meddi ta ’bura i ŋo na yiŋ ta kine; ŋo nagon ta tetemakiŋdye kulye ŋutu kine mo na temaki ’e ta köti, a kunie mo ’yalakine ta. 25#Mat 13.12; 25.29; Luk 19.26Kogwon ŋuto lo gwon ko ŋo lo mo ’ya ’yalaki kunie, ama ŋuto logon ’bak nene ŋo lo, ma ’di ŋo na gwon ko lepeŋ na mo ’du ’dumaji kaŋo kanyit.

Lilim lo nyomot lo ’du ’duŋo

26A Yesu kulyani adi, Tumatyan na Ŋun gwon gwoso ŋuto lo wekiŋdya nyomot kak, 27a nye dotoni doto i tukwaje, a purwene purwe i ko ’bure, a nyomot gwugwuŋge gwugwuggö a ’duŋe ’duŋö, ama nye ti den ko ’duruŋdyö ada. 28Kak ko mugun nanyit radan ludweki, a kokwe gwugwuggö, a kirut puri ’ye puri ’yö, a ’bolot tore toran.

29 # Yoe 3.13 Ama i diŋit nagon ’bolot aje yoŋe nu, a ŋuto ’dumuŋdye wale ŋeret a poki i ŋepa, kogwon diŋit ŋeret aje temakiŋdya.

Lilim lo nyomotti lo kiteta

(Köti Matayo 13.31-32; Luka 13.18-19)

30A Yesu pije adi, Ŋo a nyo nagon yi bubulö tojoju Tumatyan na Ŋun ko nye? Kode lon lilim logon yi ködyö tokoŋ nye? 31Nye gwon gwoso nyomotti lo kiteta, logon a lo ’dit parik lwölwöŋ nyomot liŋ ti kak i ’yutuki nanyit. 32Ama ko nye aje ’yutuki a nye ’duruŋdye ki a gwe a duma parik lwölwöŋ ’dötilön liŋ ti melesen, a kenia kanyit ririkörö kaŋo a najo, anyen kwen bubulö saka i tölimöt nanyit.

Yesu jambu i lilimön

(Köti Matayo 13.34-35)

33A Yesu iŋge jamakiŋdya kilo ŋutu kulyaet lo Ŋun ko lilimön jore gwoso kilo, gwoso nagon se jujukin i yiŋga na;

34a nye tine jambu ko lepeŋat ’bak lilim, ama a nye nyönyökökiŋdye ŋutu kanyit logon a kajujumuk kulo ŋo liŋ i diŋit nagon se gwon ka ’de nu.

Yesu a toyiŋaju köbuŋöt duma i tör

(Köti Matayo 8.23-27; Luka 8.22-25)

35A i ŋilu lor i ’doro na kolor, a Yesu takiŋdye lepeŋat adi, Ti yi laŋaddi ta i nu pele na tor. 36a se kö ’yi lodir lo ŋutu, a se joŋgi lepeŋ i ki ’bo logon lepeŋ si ’da kata lo, a kulye ki ’bojin gwe kata logon moraddu ko lepeŋ i pirit na geleŋ. 37a kobuŋot duma suluje wuggo, a yalajin ya ’yi ya ’yu i ki ’bo kata, nyena a ki ’bo jorene jore ko pioŋ.

38Ama a Yesu gwe i kotet na ki ’bo, dodoto a tiŋgo mugun; a se topuruŋdye lepeŋ a pije lepeŋ adi, Katodinönit, do ŋona ti yeyeju koyi a ’dirön le?

39A nye purwene purwe, a riŋge kobuŋot, a kulyani ko tör adi, Gwe taliŋ! Gwo ’de taliŋ! A kobuŋot kö ’yi wuggo, a ŋo liŋ gwe taliŋ adi lii. 40a nye pipije lepeŋat adi, Nyo ta kukujönö? Yupet nasu ’bayin le? 41a lepeŋat iŋge kujönö parik a totopine ko ’borik adi, Ŋilo ŋuto a ŋa logon ma ’di köbuŋöt se ko tör yiyiŋ lepeŋ?

Currently Selected:

Marako 4: BBE

Highlight

Copy

Compare