Marako 1

Yoane Kabatisanit a tokujo Loŋe Lo ’but

(Koti Matayo 3.1-12; Luka 3.1-9, 15-17; Yoane 1.19-28)

1Loŋe lo ’but lo Yesu Kristo ŋuro lo ŋun a suluja sona.

2 # Mal 3.1 A wuro i buk na nebi Yisaya adi, Mete, nan soson luyökie lio konut ŋerot, logon mo tetenaddu kiko ilot.

3 # Yis 40.3 Gworo lo lele ŋuto wowoŋon i yobu adi, Yayaraki ta kiko lo MATAT jojo, rine ta gwokiot kanyit gwogwo. 4Nyena a Yoane Kabatisanit puku i yobu, a tokuje adi ti ŋutu ködyö löpuŋge toilyet ko ti batisani batisa, anyen toronjin kase pipitoki. 5A ŋutu liŋ ti jur lo Yudaya, se ko ŋutu lio ti Yerusalema iti ko lepeŋ yu, a lepeŋ iŋge batiddya se i kare Yardene, a se tuŋge toronjin kase.

6 # 2 Mor 1.8 A Yoane iŋge jupu boŋgo nagon tetena ko kupir ti kamilo, ko a duku-kiŋdyö kamba nagon a ’böriköt kanyit i mukok, a nye nyesi mayat ko siwatat na mu ’diŋ. 7A nye tokuje adi, Lele ŋuto ŋilo popo köyö i mukok logon riŋit nanyit a duma Iwolwoŋ nio, a nan tine jukin dulaki kak i laggu na patala ti kamuka kanyit. 8Nan aje batiddya ta ko pioŋ ama lepeŋ mo batiddya ta ko Mulökötyo Loke.

Batisa na Yesu

(Koti Matayo 3.13-17; Luka 3.21-22)

9A gwe sona i kilu perok, a Yesu poŋdi kaŋo i Najareta na Galilaya a Yoane batiddye lepeŋ i Yardene. 10A nagon Yesu nyuŋ po kaŋo i pioŋ kata nu, a ’de ’de lepeŋ meddi ki a ŋaju a Mulökötyo Loke poŋdi kak kanyit loki gwoso gure. 11#Sul 22.2; Sau 2.7; Yis 42.1; Mat 3.17; 12.18; Mar 9.7; Luk 3.22A gworo lo kuu ki yu adi, Do a pilili lio lo ŋuro lo nyanyara, nan a lyöŋön ko do parik.

Satani a temba Yesu

(Koti Matayo 4.1-11; Luka 4.1-13)

12’De ’de kijek a Mulökötyo Loke ri ’diaddi Yesu i yöbu nagon ŋutu ’bayin kata. 13A lepeŋ gwe nyu perok merya iŋwan Satani temba lepeŋ. A lepeŋ gwe i pirit na geleŋ ko kijakwa ti mu ’diŋ, a malaikajin kitakiŋdye lepeŋ.

Yesu a suluja kita nanyit Galilaya

(Köti Matayo 4.12-17; Luka 4.14-15)

14Nyena i mukok nagon Yoane aje moka nu, a Yesu poŋdi Galilaya i tokujö na lore lo ’but lo Ŋun, 15#Mat 3.2adi, diŋit aje temakiŋdya; Ŋun aje yepuŋdya i tumatyan; löpuŋge ta töilyet ko yubbe ta lore Lo ’but.

Yesu a lungu ŋutu iŋwan kalokak ti somot

(Köti Matayo 4.18-22; Luka 5.1-11)

16A na wöröjine Yesu i kijit na tor na Galilaya nu, a nye meddi Simona se ko Aŋöarea luŋaser Simona gubaddu ku ’yi i tor, kogwon se a ŋutu kalokak ti somot. 17A Yesu kulyani ko lepeŋat adi, Kipuŋdye ta nan, a nan mo tiŋdi ta i jikuŋdyo na ŋutu köyö ni gwoso ŋutu logon jikuŋdyo somot ko ku ’yi.

18A lepeŋat kö ’yi ku ’yilan kase adi wulek, a kepoddi lepeŋ.

19A na tirikin ŋerot diŋit a na ’dit nu, a nye meddi Yakobo ŋuro lo Jebedayo se ko Yoane luŋaser Yakobo, logon gwon kase i ki ’bo i ririgga na ku ’yilan. 20’De ’de a nye luŋgi lepeŋat, a se kölökiŋdye Jebedayo monye lose i ki ’bo se ko ŋutu lo ropaki i kita kulo, a se kepoddi lepeŋ.

ŋuto lo gwon ko mulökötyo loron

(Köti Luka 4.31-37)

21A lepeŋat iti Kaperanauma. ’De ’de kijek i ŋilu lor lo Sabata a Yesu luponi i kadi momoret i todiŋdyo. 22#Mat 7.28, 29a ŋutu iŋge söŋu ko todiŋdyö nanyit, kogwon lepeŋ todiŋdyö se gwoso ŋuto logon ko kido ko ti gwon gwoso katodinök ti Saresi ti Mose. 23I ŋinu diŋit gwak a lele ŋuto gwe kata logon ko mulökotyo loron kase i kadi momoret. 24a lepeŋ woŋoro ki adi, Yesu lo Najareta, do ’dek nyo kayaŋ? Do yöŋö tukaŋu yi? Nan a den ko do a ŋa, do a Loke lo Ŋun. 25Ama a Yesu riŋge lepeŋ, a kulyani adi, Yiŋani taliŋ, poŋdi kaŋo ko ŋilo ŋuto i mugun. 26a mulökotyo loron kiki iŋge lepeŋ, a woŋe parik ko gworo lobot, a poŋdi kaŋo ko lepeŋ i mugun. 27A ŋutu liŋ iŋge söŋu, nyena a se totopine ko ’börik adi, Kine kulya a nyo? Todinesi kanyit gwon ka ’de! Lepeŋ jambu ko kido, a saŋi ma ’di mulöko lorok a yiŋge lepeŋ. 28’De ’de a kulya kanyit kuorö i turon liŋ ti Galilaya lo didiŋö.

Yesu a toke ’ya ŋutu jore

(Köti Matayo 8.14-17; Luka 4.38-41)

29A nagon se aje kö ’yu kadi momoret nu, a se iti gwo i ’baŋ na Simona ko na Aŋöarea; a Yakobo se ko Yoane moraddi ko se. 30A moken na Simona roggi kak kogwon mugun nanyit sa ’yu pape. ’De ’de kijek a se takiŋdye Yesu kulya ti ŋina ŋuto. 31a nye iti ko lepeŋ yu a morgi lepeŋ ko könin a ’biluŋdye lepeŋ ki, a sa ’yu na mugun kö ’yi lepeŋ, a lepeŋ parakiŋdye se.

32A i ŋilu koriri i ’doro na kolor, a ŋutu joŋdi ko Yesu ni ŋutu kase Liŋ logon a gigilötu se ko logon a moka mulöko lorok. 33a ŋutu liŋ ti köji momoruŋdye i pirit na geleŋ nyona ko kötumit na kadi. 34a nye iŋge toke ’ya ŋutu jore lo gwon ko twana ka ’de ka ’de, a iŋge rikörö mulökö lorok jore kaŋo, a nye tine rukokin mulökö lorok i jambu, kogwon se aje den ko nye a ŋa.

Yesu a wörö totokuöddu Loŋe Lo ’but i Galilaya liŋ

(Köti Luka 4.42-44)

35A i ko ’bure nagon kak a ko nyuŋ waran nu, a-Yesu ŋine ŋien a dikara i pirit nagon ŋutu ’bayin kata kwoŋ, a nye poki i kwakwaddu i ŋinu pirit.

36A Simona se ko ŋutu logon gwon ko lepeŋ kulo galaddi Yesu, 37a se ryeji lepeŋ, a takiŋdye lepeŋ adi, ŋutu liŋ ga ’yu do. 38a nye kulyani ko lepeŋat adi, Ti yi Iwoŋöddi ta i kulye turön dumalak, anyen nan köti böŋö tokujö nyu, kogwon nan a po kak ni kogwon kine kulya. 39#Mat 4.23; 9.35A nye wöröni i Galilaya liŋ, totokuöddu i kadijik kase momoresi a riköddi mulökö lorok kaŋo.

Yesu a toke ’ya ŋuto lo rimajin

(Köti Matayo 8.1-4; Luka 5.12-16)

40A ŋuto lo rimajin poŋdi ko Yesu ni, a rugwuŋökine kak a mamaŋdi lepeŋ adi, Ko do nyanyar, do bubulo toke ’ya nan. 41a Yesu wone konyen ko lepeŋ, a nye riöddi könin lonyit a ’bo ’yi lepeŋ, a kulyani ko lepeŋ adi, Iŋkoi, nan nyanyar; ti do kele kelan.

42’De ’de a rimajin kö ’yi lepeŋ, a mugun nanyit iŋge po a na ’but. 43A Yesu sonyoddi lepeŋ, kukuju lepeŋ parik, 44#Lew 14.1-32adi, Meddi ’bura, an do ko jamakin lele ŋuto kine kulya; ama iti, kweki mugun ko koane ko wukiŋdye rubaŋga a tokelet ilot gwoso na sarakiŋdye Mose nu, anyen ŋutu deden adi do aje tokela. 45Ama a ŋilo ŋuto iti tu, a suluje jamaddu kine kulya abur, nyena a Yesu tine bulo lupö i nene köji memetaji ama a si ’dani i yöbu nagon ŋutu ’bayin kata, ma ’di sona a ŋutu ti turön liŋ yeŋe tu ko lepeŋ yu.

Currently Selected:

Marako 1: BBE

Highlight

Copy

Compare