Matayo 24

Yesu a jambu i kulya ti turö na Kadi na Ŋun kak asut

(Köti Marako 13.1-2; Luka 21.5-6)

1A Yesu kö ’yi Kadi na Ŋun, a nagon nye suluje tu nu, a ŋutu kanyit kajujumuk poŋdi po a kwekiŋdye lepeŋ kadijik ti Kadi na Ŋun. 2A nye waddi pija adi, Ta memet kine ŋo liŋ le? ’Diri nan takiŋdya ta adi, ŋurupit nene geleŋ molu ti kölöki ni i nene loki nagon mo ti gubaki kak.

Yöyöŋesi se ko sasanyesi

(Köti Marako 13.3-13; Luka 21.7-19)

3A na si ’dari Yesu i Mere lo Jeitun nu, a ŋutu kanyit kajujumuk poŋdi i pija na lepeŋ na gwoŋdi se ka ’de nu, adi. Taki yi diŋit nagon kine po mo kokonari, köti kweyet mo a nyo i po inot ko i ’dutet na na kak? 4A Yesu waddi lepeŋat adi, Kunyar ta, an lele ŋuto tugir ta. 5Kogwon ŋutu jore mo popo geleŋ geleŋ i karin kwe, a kulyani adi, Nan a Masia, a se mo tugiŋe ŋutu jore.

6A ta mo yiŋge kulya ti mörö, ko lodokon ti mörö; nyena meddi ta ’bura an ta ko kujöno ta. Kogwon kine po agu ködyö kokona, ama ’dutet nyuŋ ’bak.

7Kogwon jur mo mömöro ko lele jur, a tumatyan mo möröni ko nene tumatyan, a dyapan se ko rigirigilön mo gwe i piritön ka ’de ka ’de. 8Kine po liŋ a popesi suluesi.

9 # Mat 10.22 A ŋutu mo tiŋdi ta i topopa ko i tatua, a ŋutu ti jurön liŋ mo mane man ta kogwon karin kwe. 10A ŋutu jore mo kukutörö bot, a mo tupöki ko ’börik anyen tatatua, ko a tumane tuman ko ’börik. 11A nebijin ’burönök mo puku pukun a mo togiŋe ŋutu jore.

12A nyaŋu na ŋutu lojore mo worani pötö kogwon toronjin a ŋdi. 13#Mat 10.22Ama ŋuto logon a poŋga tojo ko ’dutet lo mo lwölwökö. 14A lo Loŋe Lo ’but lo Tumatyan mo totokuöjine i kak ’bukuluŋ anyen tokurukiŋdyö kine kulya i ŋutu liŋ ti jurön, a kirut ’dutet mo na poŋdi.

Po Ŋga duma parik

(Köti Marako 13.14-23; Luka 21.20-24; Daniele 11.31)

15 # Dan 9.27; 11.31; 12.11 Nyenagon ko ta a met po na mamana parik nagon köŋu keri, nagon nebi Daniele köju a jambu kulya kanyit, gwogwo ’dan i pirit nake na rurwan nu (ti ŋuto logon kekeŋdya lo kuru kurun),

16a kirut ti ŋutu lo gwon Yudaya kulo wöki i merya; 17#Luk 17.31ti ŋuto lo gwon i lo ’dek lo kadi lo gwe ti kiyuŋdya kak i ’dumaddu na po nagon kanyit kadi kune;

18ko ti ŋuto lo gwon i melesen lo gwe ti yitwe i ’dumaddu na boŋgo nanyit.

19Ama gwon a delya i ŋutu na gwon ko pelela, ko i se na tutunöggu i kilu perok! 20Momo ’yi ta anyen wökön nasu böŋö gwon ti gwon i diŋit na katirut kode i Sabata. 21#Dan 12.1; Kwe 7.14Kogwon mo gwon a poŋga duma parik, gwoso nagon ’beron a ko gwoŋdi na suluja i suluwa na kak tojo ko na diŋit, a molu tine pokin köti kwöŋ. 22a ko ködyö kilu perok a ko nyökwe kak, a ŋuto ködyö gwe ’bayin lo lwölwökö, ama kilu perok nyökwe kak kogwon kulya ti ŋutu kanyit lo wulwe. 23Nyena a ko lele ŋuto kulya ko ta i ŋinu diŋit adi, Meddi ta, Masia malo! kode adi, Nye malu! an ta ko yuŋ ta po na jam lepeŋ kine. 24Kogwon Masiajin ’burönök ko nebijin ’burönök mo pupukun, a mo kweji kweyesi temejik ko po sörösi, anyen tugiŋa ma ’di ŋutu lo wulwe, ko bubulö. 25Mete ta, nan aje tukökin ta a kokwe nagon kine po a ko nyuŋ pokin nu. 26#Luk 17.23, 24Nyenagon ko ŋutu mo kulya ko ta adi, Mete ta, lepeŋ lu mu ’diŋ, an ta ko tu ta kaŋo; a ko se mo kulya adi, Mete ta, lepeŋ lu i toŋkwet, an ta ko yuŋ ta. 27Kogwon gwoso na meme ’dekuŋdye kipya lo ki suluja i swöt lo ’yure a meme ’dekara i swöt lo tokotyaŋ nu, a po nio na Ŋuro lo ŋuto mo gwe sona. 28#Luk 17.37Ko ’burwo mo gwon ya, a logulusen mo momoraddi nyu.

Po na Ŋuro lo ŋuto

(Köti Marako 13.24-27; Luka 21.25-28)

29 # Yis 13.10; Yoe 2.10, 31; 3.15; Kwe 6.12; Yis 13.10; Ejk 32.7; Yoe 2.10; 3.15; Yis 34.4; Kwe 6.13 A ’de ’de i mukök na kilu perok popesi, a kolor mo musöni musö, a yapa mo tine pararaju, a kaser ki yu mo ’do ’done kak, a riŋitön ti ki mo yeyeti yeyeta. 30#Dan 7.13; Jak 12.10-14; Kwe 1.7A kirut kweyet nio na Ŋuro lo ŋuto mo na puku ki yu, a kötumitön liŋ ti kak mo gwine gwien jojogga kidoni kase, a se mo meddi nan Ŋuro lo ŋuto popo i ’dikolo ko riŋit se ko minyo duma parik. 31A nan mo soŋdi malaikajin kwe i kuddya na tore parik, a se mo momoruŋdye ŋutu kwe lo wulwe i swötön iŋwan ti kak, suluja i ’dutet na kak tojo i nene ’dutet.

Todinet i kulya ti ki ’bi

(Köti Marako 13.28-31; Luka 21.29-33)

32Denuŋdye ta lilim lo ködini lo ki ’bi adi, ’de ’de nagon kenia kanyit wile wilan a koropo nu, a ta dene den adi kiser gwe nyona. 33Nyena köti, na meddi ta kine ŋo liŋ nu, a ta deŋdi adi nan gwe nyona ko po, ’diri nan gwe i kötumit. 34’Diri nan takiŋdya ta adi, ŋutu ti na toberon mo ti ’duddyö tojo ko kine ŋo liŋ mo a kona. 35Ki ko kak mo ’du ’duddyö, ama kulyaesi kwe mo ti ’duddyö kwöŋ.

Ŋuto ti den ŋilu lor kode ŋinu diŋit

(Köti Marako 13.32-37; Luka 17.26-30, 34-36)

36Lele ŋuto ti den ŋilu lor ko ŋinu diŋit, ma ’di malaikajin ti ki a ko den, ma ’di nan Ŋuro a ko den, ama ka ’de Baba lo deŋdya. 37#Sul 6.5-8Nyena po nio na Ŋuro lo ŋuto mo gwon gwoso perok ti Noa köju kulu. 38Kogwon i kulu perok i ŋerot nagon bar a ko nyuŋ po nu, ŋutu nyenyesu ko mömoju, lepeŋat yeyemba ko yeyema, tojo ko lor logon Nija lupöri i ki ’bo kata lu, 39#Sul 7.6-24ama a lepeŋat gwe a ko den tojo bar a po a iŋge ’dokoro se liŋ, köti a po nio na Ŋuro lo ŋuto mo gwe sona. 40I ŋilu diŋit a ŋutu murek mo gwe i melesen; lele mo ’du ’dumaji, a lele mo kolökine kölöki. 41A ŋutu wate murek mo gwe i jijö i kijo; nene mo ’du ’dumaji, a nene mo kolökine kölöki. 42Nyenagon gwe ta ko konyen ŋa, kogwon ta ti den lor logon nan MATAT losu popori. 43#Luk 12.39, 40Ta deden ’bura adi, ko monye kadi ködyö a den i nan diŋit na tukwaje kolanit pöpö, a nye ködyö aje tiju, a nye ködyö tine kölökin kadi nanyit i turöji lukata.

44Nyenagön ta köti ködyö gwon ajo, kogwon nan Ŋuro lo ŋuto mo popo i diŋit nagon ta a ko yeŋdi nan i po nu.

Köliŋönit lo yiyiniki i kita ko logon ti yiniki

(Köti Luka 12.41-48)

45Taki ta nan, köliŋönit lo yiyiniki i kita ko a lokoŋ a ŋa, logon duma lonyit a sarakiŋdya i meddya na mede nanyit, i korakiŋdya na köliŋönök kinyo i diŋitan na ’but? 46Köliŋönit gwoso ŋilo a kalyoŋi, logon ko duma lonyit a ’dur a ko ryeji nye i koŋdya na kita nanyit.

47’Diri nan takiŋdya ta adi, nye mo sarakiŋdya lepeŋ i meddya na ŋo kanyit liŋ. 48Ama ko ŋilo köliŋönit loron a kulya kanyit i töili adi, Duma liŋ a karakin diŋit a najo, 49a nye suluje ’biddyö köliŋönök logön kita ko lepeŋ i pirit na geleŋ kulo, a nyesi nyesu, a möji möju i pirit na geleŋ ko kamerak, 50a duma lo ŋilu köliŋönit mo ’dure i lor logon nye a ko yinikin lepeŋ i po lu, ko i diŋit nagon nye a ko denun, 51a mo totoggi lepeŋ ka ’de ka ’de, a mo tiŋdi lepeŋ i parundya na pirit na ŋutu kamumulukak. A ŋutu mo gwine gwien a mo pije kala nyu.

Currently Selected:

Matayo 24: BBE

Highlight

Copy

Compare