Matayo 25
25
Lilim lo kö ’disi puök
1 #
Luk 12.35
I ŋinu diŋit Tumatyan na Kimo gwon gwoso kö ’disi puök nagon a ’dumuŋdya lombojin kase a iti i dodogga na kayemanit. 2A mukanat kase gwe a na ’böŋ, a mukanat gwe a nakoŋ. 3a na ’dumuŋdye kö ’disi na ’böŋ kune lombojin kase nu, a segwe a ko baraddu welet; 4ama a nakoŋ kune baraddi welet i lulurön ko lombojin kase kune i pirit na geleŋ.
5A na karakiŋdye kayemanit diŋit a najo nu, a se liŋ lure lur a dotoni doto.
6Ama i tukwaje kiden, a woŋon gwe kata adi, Kayemanit malu! Iti ta i dodogga ria lepeŋ. 7Nyena a kö ’disi kune liŋ ŋine ki, a teteŋdi lombojin kase kune. 8a kirut kö ’disi na ’böŋ kune kwaddi kö ’disi nakoŋ kune adi, Tiŋdi ta yi nene welet nasu, kogwon lombojin kaŋ kune twatwaara. 9Ama a nakoŋ kune renyani adi, ’Bayin, kode welet ti jukin yi ko ta. Kölumbö iti ta i dukan, ko gwörökiŋdye ta ’börik nene welet. 10A na tiri se i gwörö nu, a kayemanit lo lo ’dure, a se na gwon ajo kune lupöni lukata ko lepeŋ i pirit na geleŋ i budu yemet, a kötumit kinuni kinu. 11#Luk 13.25A i mukok, a kunie kö ’disi kune na ’dure, a luŋgi adi, Lutu likaŋ, lutu likaŋ, ŋaki yi kötumit. 12Ama a nye waddi adi, ’Diri nan takiŋdya ta adi, nan a ko den ta. 13Nyena ti konyen kasu gwe ŋa, kogwon ta ti den ŋilu lor kode ŋinu diŋit.
Lilim lo gurut nagon temuŋdya a talentajin
(Köti Luka 19.11-27)
14 #
Luk 19.11-27
Köti Tumatyan na Ki mo gwon gwoso nagon lele ŋuto ’dek tu i lele jur, a nye luŋgi köliŋönök kanyit a sarakiŋdye se i meddya na tito kanyit.
15A nye tiŋdi lele jurakan mukanat ti gurut, lele ko jurakan murek, lele ko jurak geleŋ, ŋutu liŋ wuju gwoso na bulöri se na. A kirut ŋilo ŋuto jölöni jölö. 16A nye lo wuju jurakan mukanat ti gurut lo rumara rumara a tujaŋi ko se, a iŋge ryeŋdu kulye jurakan mukanat ti gurut. 17Nyena köti a nye lo wuju jurakan murek ti gurut lo iŋge tujarundya kulye jurakan murek. 18Ama a nye lo wuju jurak geleŋ lo gurut lo iti tu a ’boggi dili, a yikökiŋdye gurut ti duma lonyit kak. 19Nyena i mukök na diŋit a najo, a duma lo köliŋönök lo yitwene yitwe a keŋdi gurut ko se i pirit na geleŋ. 20a köliŋönit lo wuju jurakan mukanat ti gurut lo poŋdi po, joŋdya kulye jurakan mukanat, a kulyani adi, Duma liŋ, do köju a sarakiŋdya nan jurakan mukanat ti gurut. Mete, nan aje tujaruŋdya kulye jurakan mukanat. 21a duma lonyit kulyani ko lepeŋ adi, A na ’but parik, köliŋönit lo ’but lo yiyiniki! Do yiyiniki i ŋo ku ’dik; nan mo sarakiŋdya do i meddya na ŋo jore. Poŋdi, paruŋdye lyöŋön nio na duma ilot. 22Köti a nye logon a tiki jurakan murek ti gurut lo poŋdi po, a kulyani adi, Duma liŋ, do köju a sarakiŋdya nan jurakan murek ti gurut. Mete, nan aje tujaruŋdya kulye jurakan murek. 23a duma lonyit kulyani ko lepeŋ adi, A na ’but, köliŋönit lo ’but lo yiyiniki! Do yiyiniki i ŋo ku ’dik, nan mo sarakiŋdya do i meddya na ŋo jore. Poŋdi, paruŋdye lyoŋön nio na duma ilot. 24Ama a nye lo wuju jurak geleŋ lo gurut lo köti poŋdi po, a kulyani adi, Duma liŋ, nan a den adi do a ŋuto kaŋa, do ŋeŋepa ŋo nagon do a ko weja, a do tutuŋdye i pirit na geleŋ ŋo nagon do a ko torekiŋdya kunu. 25Nyena a nan kujönöni kujönö a iti tu, a yikökiŋdye jurak ilot lo gurut kak. Maŋilo ŋo ilot. 26A duma lonyit pije lepeŋ adi, Do köliŋönit loron ko a yoke! Do ŋona a den adi nan ŋepa ŋo nagon nan a ko weja kune, a nan tutunuŋdye ŋo nagon nan a ko torekiŋdya kune? 27A do ködyö aje ’delakin gurut kwe i baŋki, a i yitwe nio a nan ködyö wuji ŋo kwe ko ’yalet. 28Nyena ’dumara ta jurak lo gurut kaŋo ko lepeŋ i könin, ko tiki ta köliŋönit logon ko jurakan puök ti gurut lo. 29#Mat 13.12; Mar 4.25; Luk 8.18Kogwon ŋutu liŋ geleŋ geleŋ logon ko ŋo kulo mo ’ya ’yalaki kunie, a se mo gwe ko ŋo jore, ama ŋuto logon ’bak nene ŋo lo, ma ’di ŋo na gwon ko lepeŋ na mo ’du ’dumaji kaŋo kanyit. 30#Mat 8.12; 22.13; Luk 13.28Gubara ta köliŋönit logon ’bak ’bulit lo kaŋo i mudwe. A ŋutu mo gwine gwien a mo pije kala nyu.
Ŋulu liŋ ti jurön ’duŋoki putet
31 #
Mat 16.27;
Mat 19.28
A na poŋdi nan Ŋuro lo ŋuto ko minyo liŋ se ko malaikajin liŋ i pirit na geleŋ ko nan nu, a nan mo si ’dakine köyö i si ’daet na minyo. 32A ŋutu liŋ ti jurön mo momoreni köyö i komor, a nan mo ge ’yi lepeŋat liŋ geleŋ geleŋ, gwoso na ge ’yi kayukunit köbilu ko melon na. 33a nan mo tiŋdi köbilu köyö i swöt lutaten, a melon gwe köyö i swöt kadoŋe. 34a kirut nan Mor mo kulyani ko se lo gwon köyö i swöt lo lutaten kulo adi, Po ta, ta logon Baba aje ’boroja kilo, wuji ta kido anyen ta gwon a ŋutu ti Tumatyan nagon aje tetenaki ta köju ’beron suluja i gweya na kak; 35kogwon nan gwon ko magor, a ta tiŋdi nan kinyo; nan a moka kure, a ta tiŋdi nan i möju; nan a lwakatyo, a ta wuyuŋdye nan kasu i midijik; 36nan gwon a limu kana, a ta tojubbi nan; nan a gilö, a ta iŋge po i ’yö ’yu na nan. Nan gwon i kadi rereket, a ta ’yö ’yi nan. 37a ŋutu ti löti lo rigwo mo pije lepeŋ adi. MATAT, yi a met do nanu ko magor, a tunyeji do? kode ko kure, a tiŋdi do i möju? 38Yi a met do a lwakatyo nanu, a wuyuŋdye do kayaŋ i midijik? kode a limu kana, a tojubbi do? 39Yi a met do i gilö nanu, kode i kadi rereket, a ’yö ’yi do? 40A nan Mor mo waddi adi, ’Diri nan takiŋdya ta adi, gwoso nagon ta a konakiŋdye ma ’di lele geleŋ lo ’dit lo kilo luŋasirik kwe, kweja adi ta a konakiŋdya nan. 41a kirut nan mo kulyani ko se lo gwon köyo i swöt lo kadoŋe kilo adi, Wuddye ta wuddya köyö i komor, ta ŋutu logon a senya. Iti ta i kimap na ti pepa, nagon aje tetenaki kapöönit se ko malaikajin kanyit nu; 42kogwon nan gwon ko magor, ama a ta tine tiŋdu nan kinyo; nan gwon ko kure, ama a ta tine tiŋdu nan i möju; 43nan a lwakatyo, ama a ta tine wuyuddu nan kasu i midijik; nan a limu kana, ama a ta tine tojubbu nan; nan a gilö, a gwe i kadi rereket, ama a ta tine ’yö ’yu nan.
44Nyena a se köti mo pije adi, MATAT, yi a met do ko magor nanu, kode ko kure, kode a lwakatyo, kode a limu kana, kode a gilö, kode i kadi rereket, a yi gwe a ko parakiŋdya do? 45A nan mo waddi se adi, ’Diri nan takiŋdya ta adi, gwoso nagon ta a ko konakiŋdya ma ’di lele lo ’dit lo kilo ŋutu, kweja adi ta a ko konakiŋdya nan. 46#Dan 12.2Nyena a lepeŋat mo iti i ripet na ti ’duddyö, ama ŋutu ti löti lo rigwo mo tu i ru na yeŋ nyin.
Currently Selected:
Matayo 25: BBE
Highlight
Copy
Compare
Share
Want to have your highlights saved across all your devices? Sign up or sign in
Bari Bible © United Bible Societies, 1979.
