ROM 14

Wat bishar ïa la u parabangeit

1Te phin shim lok ha lade ïa uta uba long tlot ha la ka jingngeit, hynrei, ym sha ka ban ïasaid pynrem ïa ki jingmut kyndiah jong u. 2Namar uwei u ngeit ba u bit ban bam ïa kiei kiei baroh; hynrei, uta u batlot u bam tang ïa ki jhur. 3#Kol. 2:16.Me uba bam, wat ñiewbeiñ noh ïa uta u bym bam; lymne me u bym bam, wat pynrem ïa uta uwei uba bam; namar U Blei u la pdiang ïa u. 4Te ma me, me long uei, ba me bishar ïa u shakri jong uwei pat? Ha la U Kynrad hi keiñ u ïeng, ne u kyllon. Hynrei, yn pynïeng ïa u keiñ; namar U Blei u long uba lah eh ban pynïeng skhem ïa u.

5 # Gal. 4:10. Uwei u kham ñiewkor ïa kawei ka sngi ban ïa kawei pat ka sngi; uwei pat te u ñiewkor ryngkat ïa ki sngi baroh. To long uwei uwei baroh ba la sngew-kut-nia skhem ha la ka jong ka jong ka jingmut hi. 6Uta uba ñiew ïa kata ka sngi, u ñiew keiñ ha U Trai. Kumjuh uta uba bam, u bam keiñ ha U Trai, namar u ainguh ha U Blei; bad uta u bym bam, um bam keiñ ha U Trai, kumjuh ruh u ainguh ha U Blei. 7#Gal. 2:20; 2 Kor. 5:15.Namar ym don uwei na ngi uba im kynti ïa lade, bad ym don uwei uba ïap kynti noh ïa lade. 8#Php. 1:20.Namar la ngi ïoh im te, ngi im keiñ ha U Trai; lane la ngi ïap ruh, ngi ïap keiñ ha U Trai; namar kata te, la ngi im ne la ngi ïap ruh, ngi long ki jong U Trai. 9Namar ïa kane khnang U Khrist u la ïap noh ruh, bad u la im pat, ba un ïoh long U Trai halor ki baïap bad ki ba-im ruh.

10 # 2 Kor. 5:10. Hynrei, me balei me bishar ïa la u parabangeit? lane balei ruh me ñiewbeiñ ma me ïa la u parabangeit? namar ngi baroh ngin ïeng ha khmat ka khet bishar ka jong U Blei. 11#Isa. 45:23; Php. 2:10-11.Namar la thoh:

“Katba nga im,” ong U Trai,

“ka khohsiew baroh

kan dem khrup ha nga,

bad u thylliej baroh

un phla ha U Blei.”

12Naba kumta te uwei pa uwei na ngi un ai jingkheiñ shaphang ïa lade hi ha U Blei.

Wat long ka daw ka jingjynthut

13 # Mat. 7:1; 1 Kor. 8:13. Namar kata, wat ai ba ngin bishar shuh paralok hi; hynrei, phin kham kut bishar ïa kane, ïa ka ban ym buh ïa ka jingjynthut ïa la u parabangeit, lane ïa ka daw ban kyllon. 14Nga tip biang, bad nga sngewskhem da U Jisu uba U Trai, ba ym don kaei kaei ruh ka basang na lade hi; tang ïa uta uba ñiew sang ïa kaei kaei ruh, ïa uta keiñ ka sang. 15#Rom. 14:20; 1 Kor. 8:11.Hynrei, lada la pynsngewsih ïa uta u parabangeit jong me na ka bynta i jingbam, mem ïaid shuh katba kum ka jingïa-ieit. Wat pynjot noh da ita i jingbam jong me ïa uta uba na ka bynta jong u, U Khrist u la ïap noh. 16#1 Kor. 10:30.Namar kata te, wat ai ba yn krenbeiñ ïa kata ka babha jong phi; 17namar ka hima ka jong U Blei kam long keiñ kaba bam bad kaba dih; hynrei, ka hok, bad ka jingïasuk, bad ka jingkmen ha U Mynsiem Bakhuid. 18Namar uta uba shakri ïa U Khrist ha kine kiei kiei ruh, u long uba la pynsngewbha eh ïa U Blei bad ba la pdiang hun da ki briew. 19#Mrk. 9:50; Rom. 12:18; 1 Thes. 5:11.Naba kumta te, ïa, ngin ïabeh brai ïa kita kiei kiei ruh ki jong kata ka jingïasuk, bad ïa kita kiei kiei ruh da kiba ngin ïatei paralok hi. 20#Rom. 14:15; 1 Kor. 8:9-12.Na ka bynta ka jingbam, to wat lied noh ïa ka jingleh ka jong U Blei. Kiei kiei baroh shisha ki long ki bakhuid; hynrei, ka long ka basniew keiñ ïa uta u briew uba da bam da ka jingsngewthut. 21#1 Kor. 8:13.Ka long ka babha keiñ ïa ka ban ym bam ïa ka doh, lane ban ym dih ïa ka Waiñ, lane ban ym leh ei ei ruh da kaba u parabangeit jong me u da thut, lane u da jynthut, lane u da sngewtlot. 22#Rom. 2:1.Me don ka jingngeit? to ri khop ïa ka ha lade ha khmat U Blei. Suk uta u bym pynrem ïa lade ha kata ïa kaba u mynjur. 23Hynrei, uta uba sngew-artatien, lada u bam, la pynrem ïa u, naba um shym bam na ka jingngeit: te kaei kaei baroh ka bymlong na ka jingngeit, ka long pop keiñ.

Currently Selected:

ROM 14: KHB

Highlight

Copy