PROBERB 3
3
Ka jingkyntu ïa ka jingkohnguh
1Ko khun, wat klet ïa ka aiñ
jong nga;
hynrei, ka dohnud jong me
to kan sumar ïa ki hukum
jong nga:
2naba ïa ka jingslem ki sngi,
bad ki snem ka jingim,
bad ka jingsuk, kin pynlang
ha me.
3Wat ai ba ka jingisynei
bad ka jingshisha
kin iehnoh noh ïa me:
to teh ïa ki ha ka ryndang
jong me;
to thoh ïa ki
ha u maw lyngkniap
ka dohnud jong me:
4 #
Luk. 2:52; Rom. 12:17; 2 Kor. 8:21. kumta, men shem
ïa ka jingsngewbha
bad ïa ka jingshemphang
ka babha ha khmat U Blei
bad ki briew.
5To ngeit ha U Trai
da la ka dohnud baroh,
bad wat shaniah ha la ka jong
ka jingshemphang.
6Ha la ki lynti baroh
to phla ïa u,
te un pynbeit ïa ki lynti ïaid
jong me.
7 #
Rom. 12:16. Wat long u bastad
ha la ka jong ka jingñiew;
to sheptieng ïa U Trai,
bad to kiar na ka basniew:
8kata kan long ka jingkoit
ïa u sohpet jong me,
bad ka khleiñ ïa ki shyieng
jong me.
9To burom ïa U Trai
da la ka spah,
bad da ki soh nyngkong
ka jingmih jong me baroh:
10kumta, ïa ki thiar jong me
yn pyndap da ka jingkyrhai,
bad ki kor tylliat jong me
kin shlei da ka Waiñ thymmai.
11 #
Job. 5:17; Heb. 12:5,6. Ko khun, wat ñiewbeiñ
ïa ka jingsneng sympat
U Trai;
lymne wat sngewsatia
ïa ka jingsneng jong u;
12 #
Jpw. 3:19. naba ïa uba U Trai u ieit,
u sneng;
kumba u kpa ruh ïa u khun
uba u ieit.
13Suk uta u briew uba shem
ïa ka jingstad,
bad uta u briew uba ïoh
ïa ka jingshemphang.
14Namar ka jingkhaïi jong ka,
ka kham bha
ïa ka jingkhaïi rupa,
bad ka jingpynmyntoi jong ka
ban ïa ka ksiar nylla.
15Ka kham kordor
ban ïa ki Rubi:
bad na kita kiei kiei
kiba me lah ban ikwah
ym don ki ban ïanujor bad ka.
16Ka jingslem ki sngi
ka don ha ka kti kamon
jong ka;
ha ka kti kadiang jong ka
ki don ki spah bad ka burom.
17Ki lynti jong ka ki long
ki lynti ka jingsngewtynnad,
bad ki lynti ïaid jong ka baroh
ki long ka jingsuk.
18Ka long u dieng ka jingim
ïa kita kiba shim bat ïa ka:
bad suk uwei uwei baroh
uba bat ri ïa ka.
19U Trai da ka jingstad
u la seng nongrim
ïa ka khyndew;
da ka jingshemphang
u la pynskhem ïa ki bneng.
20Da ka jingtip jong u,
ïa ki jingjylliew la pynpait,
bad ki bneng ki pynjaw
ka umjer.
21Ko khun, wat ai ba kin leit noh
na ki khmat jong me;
to bat ïa ka jingstad kaba shisha
bad ka jingsian;
22kumta, kin long ka jingim
ïa ka mynsiem jong me,
bad ka jingitynnad
ïa ka ryndang jong me.
23Ynda kumta, men ïoh ïaid
ha la ka lynti ha kaba suk,
bad ka kjat jong me
kan ym jynthut.
24Haba me thiah,
men ym sheptieng:
men thiah ruh,
bad ka jingïohthiah jong me
kan long kaba bang.
25Wat sheptieng
ïa ka jingsheptieng
kaba kyndit,
lymne ïa ka jingpynjot
jong ki bymman,
haba ka wan lap;
26naba U Trai
un long ka jingshaniah jong me,
bad un sumar ïa ka kjat
jong me
ba kan ym ngat.
27Wat khang ïa ka babha
na kita kiba dei ban ïoh ïa ka,
haba ka shong ha ka bor ka kti
jong me
ban leh ïa kata.
28Wat ong ïa la u paramarjan,
“Khie leit, sa wan pat,
te lashai ngan sa ai;”
haba kata ka don ha me mynta.
29Wat thaw ïa ka basniew
pyrshah ïa la u paramarjan,
haba u shongsuk hajan jong me.
30Wat ïaleh ïa u briew khlem daw,
lada um shym leh sniew
ei ei ïa me.
31Wat bishni ïa u briew
uba leh jubor,
bad wat jied ïa kawei ruh
na ki lynti jong u.
32Naba uba mutlop
u long ka jingijli ïa U Trai:
hynrei, ka jingrieh jong u
ka don bad uba beit.
33Ka jingtim U Trai
ka don ha ka ïing
u bymman;
hynrei, u kyrkhu
ïa ka jaka shong
jong u bahok.
34 #
Jak. 4:6; 1 Pet. 5:5. Shisha un rkhiebeiñ
ïa kiba rkhiebeiñ,
hynrei, u ai ka jingaiei
ïa kiba sngewrit.
35U bastad un ïoh bynta
ïa ka burom;
hynrei, ka jinglehrain
kan long ka jingkyntiew
jong ki babieit.
The Bible Society of India