PROBERB 4
4
Ka dor jong ka jingstad
1To sngew, phi ki khun,
ïa ka jinghikai u kpa,
bad to shahshkor
ban tip ïa ka jingshemphang:
2Naba nga ai ha phi
ïa ka jinghikai ka babha;
to wat iehnoh noh
ïa ka aiñ jong nga.
3Namar nga la long u khun
ïa la u kpa,
uba lung bad kumba marwei hi
ha ka jingñiew ka kmie
jong nga.
4Te u la hikai ïa nga,
bad u la ong ha nga,
“To ka dohnud jong me
kan bat ïa ki ktien jong nga;
sumar ïa ki hukum jong nga,
bad to im:
5to pynïoh ïa ka jingstad,
to pynïoh ïa ka jingshemphang;
wat klet ïa ka,
lymne wat phai noh
na ki ktien ka shyntur
jong nga:
6Wat iehnoh noh ïa ka,
te kan ri khop ïa me;
to ieit ïa ka,
te kan sumar ïa me.
7Ka jingstad ka long
kaba kongsan;
to ïoh te ïa ka jingstad:
bad da kiei kiei baroh
kiba me don
to ïoh ïa ka jingshemphang.
8To kyntiew ïa ka,
te ka ruh kan kyntiew ïa me:
kan wallam ïa me
sha ka burom,
haba me piam ïa ka.
9Kan ai ka jingdeng ka jingaiei
ïa ka khlieh jong me:
ïa ka pansngiat ka jingitynnad
kan aiti ha me.”
10To sngew, ko khun,
bad to pdiang ïa ki jingong
jong nga;
te ki snem ka jingim jong me
kin long shibun.
11Nga la hikai ïa me
ha ka lynti ka jingstad;
nga la ïalam ïa me
ha ki lynti ka jingbeit.
12Haba me leit,
ïa ki jingjam jong me
yn ym pynkhim;
bad haba me mareh,
men ym jynthut.
13To bat skhem ïa ka jinghikai;
wat pyllait ïa ka:
to sumar khop ïa ka;
naba ka long ka jingim
jong me.
14Wat leit sha ka lynti ïaid
ki bymman,
bad wat ïaid ha ka lynti
ki riewsniew.
15To kiar na ka,
wat ïaid ha ka;
to phai noh na ka,
te shu nang ïaid.
16Naba kin ym thiah noh,
lymda ki la leh sniew;
bad ka jingïohthiah jong ki
ka la duh noh,
tad ynda ki la pynkyllon
ïano ïano.
17Namar ki bam ïa u kpu
ka jingbymman,
bad ki dih ïa ka Waiñ
ka jingleh-jubor.
18Hynrei, ka lynti jong u bahok
ka long kum ka jingshai
ka batyngshaiñ,
kaba nang tyngshaiñ
nang tyngshaiñ
haduh kaba janai ka sngi.
19Ka lynti ki bymman
ka long kum ka jingdum:
kim tip ha-ei ki ïajynthut.
20Ko khun, to shahshkor
ïa ki ktien jong nga;
to pyndem ïa la ka shkor
ha ki jingong jong nga.
21Wat ai ba kin leit noh
na ki khmat jong me;
to sumar ïa ki hapdeng
la ka dohnud.
22Namar ki long ka jingim
ïa kita kiba shem ïa ki,
bad ka jingkhiah
ïa ka doh jong ki baroh.
23To ri khop ïa la ka dohnud
da kaba sumar eh;
naba na ka ki wan ki jingmih
ka jingim.
24To buh noh na me
ïa ka shyntur bamutlop,
bad ïa ki rmiang
shyntur bamutlop
to buh noh sha jngai na me.
25To ki khmat jong me
kin khmih sha ba-beit,
bad ki irmat jong me
to kin khmih beit
sha shuwa jong me.
26 #
Heb. 12:13. To pynmadan ïa ka lynti ïaid
ki kjat jong me,
bad to ai ban pynskhem
ïa ki lynti jong me baroh.
27Wat phai noh
lymne sha kamon
lymne sha kadiang:
to pynkynriah ïa la ka kjat
na ka basniew.
The Bible Society of India