PROBERB 2
2
Ka bainong ha kaba wad ïa ka jingstad
1Ko khun, lada men pdiang
ïa ki ktien jong nga,
bad kynshew ïa ki hukum
jong nga bad me;
2kat ban pyndem
ïa la ka shkor
sha ka jingstad,
bad pyndei ïa la ka dohnud
ha ka jingshemphang;
3bad lada me ïam ïawad
ïa ka jingsngewthuh
bad pynjam ïa la ka ktien
ban ïoh ka jingshemphang;
4lada me wad ïa ka
kum ïa ka rupa,
bad wad bniah ïa ka
kum ïa ki spah ba la buhrieh;
5kumta te men shemphang
ïa ka jingsheptieng
ïa U Trai,
bad men shem ïa ka jingtip
ïa U Blei.
6Naba U Trai u ai ka jingstad;
na ka shyntur jong u
ki mih ka jingtip
bad ka jingshemphang:
7U tyngkai ïa ka jingstad
kaba shisha ïa kiba beit,
u long ka stieh ïa kita kiba ïaid
ha ka jingsngur;
8ba un ïoh sumar
ïa ki lynti ïaid ka jingbishar,
bad ba un ri ïa ka lynti
ki riewkhuid jong u.
9Ynda kumta, men sngewthuh
ïa ka hok bad ïa ka jingbishar,
ïa ka jingbeit,
bad ïa ka lynti babha baroh.
10Namar ka jingstad kan rung
shapoh ka dohnud jong me,
bad ka jingtip kan long
kaba sngewbha
ïa ka mynsiem jong me;
11ka jingsian kan ap sharai
ïa me,
ka jingshemphang kan sumar
ïa me:
12ïa ka ban pyllait ïa me
na ka lynti ka jingsniew,
na ki briew kiba kren
ïa kiei kiei kiba mutlop;
13kiba iehnoh noh
ïa ki lynti ïaid ka jingbeit,
ba kin ïaid ha ki lynti
ka jingdum;
14kiba kmen ban leh
ïa ka basniew,
bad kiba sngewbha
ha ka jingmutlop
ka jingsniew;
15kiba kynriang ha la ki lynti,
bad kiba mutlop
ha la ki lynti ïaid:
16ïa ka ban pyllait ïa me
na ka kynthei nongwei,
na ka nongwei kaba pynsbuh
da la ki ktien;
17kaba iehnoh noh
ïa u lok ka jinglong samla
jong ka,
bad kaba klet noh
ïa ka jutang U Blei jong ka;
18naba ka ïing jong ka,
ka dem sha ka jingïap,
bad ki lynti jong ka
sha kiba la ïap;
19na kita kiba leit sha ka
ym don kiba wan phai pat,
lymne kim poi shuh
sha ki lynti ka jingim:
20khnang ba men ïaid
ha ka lynti ki briew ki babha,
bad ba men sumar
ïa ki lynti ïaid jong ka hok.
21Namar uba beit
un ïoh shong ha ka ri,
bad uba janai
un ïoh shong sah ha ka.
22Hynrei, ïa ki bymman
yn ot noh na ka ri,
bad ïa kita kiba leh shukor
yn rat noh na ka.
The Bible Society of India