JINGKHEIÑ 25

Ki Israel ki pynïasoh ïa lade bad u Baal-peor

1Bad ki Israel ki la ïashong sah ha Shittim, bad ki briew ki la sdang ban klim bad ki khun kynthei ki Moab: 2Ki ruh ki la khot ïa uta u paidbah ha ki jingkñia ainguh ïa ki blei jong ki; te uta u paidbah u la bam, bad u la dem ha ki blei jong ki. 3Bad ki Israel ki la pynïasoh ïa lade bad u Baal-peor: te ka jingbitar U Trai ka la meh lep pyrshah ïa ki Israel. 4Bad U Trai u la ong ha u Moses, “To shim ïa ki rangbah baroh ki jong ki paidbah, bad to phasi ruh ïa ki ha khmat U Trai ha pyrshah ka sngi, ba kumta, ka jingbitar ba-meh lep jong U Trai, kan ïoh phai noh na ki Israel.” 5Bad u Moses u la ong ha ki nongbishar jong ki Israel, “To pynïap uwei uwei ïa la ki briew kat kiba la pynïasoh ïa lade bad u Baal-peor.”

6Te ha khmih, uwei na ki khun Israel u la wan, bad u la wallam ïa kawei ka briew, ka kynja Midian, ha ki para jong u ha khmat u Moses, bad ha khmat u paidlang baroh ki khun Israel, haba ki dang ïaïam ha phyllaw Ka Tabernakl ka jingïaseng. 7Te haba u Phinehas, u khun u Eleasar, uba u khun u Aaron lyngdoh, u la ïohi ïa kata, u la mih joit napdeng uta u paidlang, bad u la shim ïa u sum ha la ka kti; 8bad u la bud nadien uta u briew uba kynja Israel hapoh ka ïingjaiñ, bad u la sum lyngba ïa ki baroh ar ngut, ïa uta u briew keiñ uba kynja Israel, bad ïa kata ka kynthei, lyngba na ka kpoh jong ka. Te kumta, la pynsangeh ïa ka jingïapthem na ki khun Israel. 9Te ki la ïap noh ha kata ka jingïapthem jin arphew saw hajar.

10U Trai te u la kren ha u Moses, U da ong, 11“U Phinehas, u khun u Eleasar, u khun u Aaron lyngdoh, haba u la long uba shitrhem na ka bynta jong nga hapdeng jong ki, u la pynphai noh ïa ka jingbitar jong nga na ki khun Israel, ba ngam shym la pynduh noh ïa ki khun Israel ha kaba nga la thut eh. 12Namar kata, to ong, ‘Ha khmih, nga ai ha u ïa ka jutang ka jingsuk jong nga: 13te kan long ha u, bad ha ki symbai jong u hadien jong u, kaba ka jutang ka jinglong lyngdoh ka bymjukut; namar ba u la long uba shitrhem na ka bynta U Blei jong u, bad ba u la pynlong ka jingpynïasuk na ka bynta ki khun Israel.’ ”

14Te ka kyrteng jong uta u briew uba kynja Israel ïa uba la pynïap, uta keiñ ïa uba la pynïap lem bad kata ka kynja Midian, ka la long “u Simri”, u khun u Salu, u rangbah ka ïing u kpa jong u na ka jaid Simeon. 15Te ka kyrteng kata ka briew kaba kynja Midian ïa kaba la pynïap, ka la long “ka Kosbi”, ka khun u Sur; u rangbah jong u paidbah, bad uba na ka ïing ka bakhraw ha ka ri Midian.

16U Trai ruh u la kren ha u Moses, U da ong, 17“To pynshitom ïa ki Midian, to pynïap ruh ïa ki: 18naba ki ïa-pynshitom ïa phi da ki buit runar jong ki, da kiba ki la ïashukor ïa phi shaphang u Peor, bad shaphang ka Kosbi, ka khun jong u rangbah ki Midian, kaba ka para jaid jong ki, ïa kaba la pynïap ha kata ka sngi ka jingïapthem kaba namar u Peor.”

Currently Selected:

JINGKHEIÑ 25: KHB

Highlight

Copy

Compare