JINGKHEIÑ 21
21
Ki Kanaan ki ïaleh thma ïa ki Israel
1 #
Jkñ. 33:40. Te u syiem ka Arad, u kynja Kanaan, uba shong sah shaphang shathie, u la ïohsngew ba ki Israel ki ïawan na ka lynti ki nongsyntiat; bad u la ïaleh thma ïa ki Israel, bad khyndiat na ki u la kem ha kliar ka wait#21:1 kem ha kliar ka wait: ka jingmut jong kine ki kyntien ka long ka jingpynlong koidi.. 2Te u Israel u la kular da ka jingkular skhem ha U Trai, bad u la ong, “Lada men aiti noh shisha ïa kine ki briew ha ka kti jong nga, nga te ngan pynjot noh khoit ïa ki shnong jong ki.” 3Bad U Trai u la shahshkor ïa ka ktien jong ki Israel, bad U la aiti noh ïa ki Kanaan; ki te ki la pynjot noh khoit ïa ki, bad ïa ki shnong jong ki: bad u la khot kyrteng ïa kata ka jaka “ka Hormah”.
Ki 'seiñ ding
4 #
Deu. 2:1. Bad ki la ïaid na u lum Hor da ka lynti ka Duriaw Basaw, ïa ka ban leit sawdong ïa ka ri Edom: te ka la pisa eh ka mynsiem jong uta u paidbah namar kata ka lynti. 5Te uta u paidbah u la kren pyrshah ïa U Blei, bad ïa u Moses, “Balei phi la ïalam ïa ngi na ka ri Ijipt ba ngin ïap ha ka ri khlaw? namar, u kpu ym don, lymne ka um ruh ym don; bad ki mynsiem jong ngi ki la sngewjli ïa une u kpu basniew.” 6Te U Trai u la phah ïa ki 'seiñ ding hapdeng uta u paidbah, bad ki la puh ïa ki briew; te ki la ïap shibun eh ki briew na ki Israel. 7Te namar kata, kita ki briew ki la wan ha u Moses, ki la ong ruh, “Ngi la leh pop, ba ngi la kren pyrshah ïa U Trai, bad pyrshah ïa me ruh; to duwai ha U Trai, ba un shim noh ïa kine ki bseiñ napdeng jong ngi.” Bad u Moses u la duwai na ka bynta uta u paidbah. 8Te U Trai u la kren ha u Moses, “To thaw ïa me ïa u 'seiñ ding, bad to buh ruh ïa u halor u dieng: ba uwei uwei baroh ïa uba la puh, haba u la khmih ïa u, un ïoh im.” 9#Ïoan. 3:14.Te u Moses u la thaw ïa u 'seiñ rnong, bad u la buh ïa u halor u dieng; te lada u bseiñ u la puh ïa uno uno u briew, haba u la khmih ïa uta u 'seiñ rnong, u la ïoh im keiñ.
Ki Israel ki ïaid lynti ïa ki pud ka Moab
10Te ki khun Israel ki la mih noh, bad ki la shong dara ha Oboth. 11Te ki la ïaid na Oboth ruh, bad ki la ïashong dara ha Ije-abarim, ha ka ri khlaw kaba marpyrshah ka Moab, shaphang kaba mih ka sngi. 12Nangta ruh ki la mih noh, bad ki la ïashong dara hajan ka wah Sared. 13Nangta ki la ïamih noh, bad ki la ïashong dara sha shiliang ka Arnon, kaba ha ka ri khlaw, kaba mih noh na ki rud ki Amor: namar ka Arnon ka long ka pud ka Moab, hapdeng ka Moab bad ki Amor. 14Namar kata, ba la ong ha Ka Kitab Ki Thma Ki Jong U Trai,
“Ïa kaba u la leh
ha ka Duriaw Basaw,
bad ha ki wah duid Arnon,
15bad ha ka khriang
ki wah duid
kiba hiar ha kaba shong
ka Ar,
bad kaba don ha ka pud
u Moab.”
16Nangta ki la leit sha Beer: kata ka long kata ka pukri ba U Trai u la kren ha u Moses shaphang jong ka, “To ïalum lang ïa ki briew, nga te ngan ai um ha ki.” 17Ki Israel te ki la ïarwai ïa kane ka jingrwai:
“A pukri to kyrsoi noh;
ma phi to rwai phai ktien
ïa ka:
18Ki syiem ki la ïatih
ïa kata ka pukri,
ki rangbah jong u paidbah
ki la ïatih ïa ka,
lem bad uta u nongai hukum
da ki diengduh jong ki.”
Te na kata ka ri khlaw ki la ïaleit sha Mattanah: 19bad na Mattanah sha Nahaliel: bad na Nahaliel sha Bamoth: 20bad na Bamoth sha ka ri them kaba ha ka ri Moab, sha khlieh uta u lum uba khmih sha ka ri khlaw.
Ki Israel ki jop ïa u Sihon
(Deu. 2:26-37)
21 #
Deu. 2:26-37. Te u Israel u la phah ïa ki nonglam-ktien ha u Sihon u syiem ki Amor, u da ong, 22“To shah ïa nga ban ïaid lyngba ïa ka ri jong me: ngan ym phai sha ki lyngkha, lane sha ki brisoh Waiñ; ngin ym dih na ka um jong ki pukri: hynrei, ngin ïaid da ka lynti bah u syiem, tad ynda ngi la lait na ki pud jong me.” 23U Sihon te um shah ïa ki Israel ban ïaid lyngba ïa ka ri jong u: hynrei, u Sihon u la lum lang ïa ki briew jong u baroh, bad u la mih noh ban ïaleh pyrshah ïa ki Israel sha kata ka ri khlaw, bad u la wan sha Jahas; bad u la ïaleh thma ïa ki Israel. 24Ki Israel te ki la jop ïa u da ka syrti waitlam, bad ki la shimti ïa ka ri jong u naduh Arnon, haduh Jabbok, haduh ki khun u Ammon keiñ: naba ka pud ki khun u Ammon kaba skhem. 25Bad ki Israel ki la shimti ïa kito ki nongbah baroh: ki Israel ki la shong sah ruh ha ki nongbah baroh ki jong ki Amor, ha Heshbon, bad ha ki nongrit jong ki baroh de. 26Naba ka Heshbon ka la dei ka nongbah u Sihon u syiem ki Amor, uba la lah ïaleh thma ïa uta u syiem ki Moab uba mynshuwa, bad uba la lah knieh noh ïa ka khyndew jong u baroh na ka kti jong u, haduh Arnon keiñ. 27Namar kata, kiba ïaphawar ki ong,
“To ïawan haduh Heshbon,
to ai ban tei,
to ai ban pynskhem
ïa ka nongbah u Sihon:
28namar ka la mih noh
ka ding na Heshbon,
bad ka thylliej ding
na ka nongbah u Sihon:
ka la bam duh ïa ka Ar
kaba ha Moab,
bad ïa ki trai jong
ki Bamoth Arnon.
29Kordit ïa me, u Moab!
Me la ïap,
A u paidbah u Khemosh:
u la ai mraw
ïa la ki khun shynrang
ïa kiba la lait,
bad ïa la ki khun kynthei
ha u Sihon
u syiem ki Amor.
30Ngi la siat ïa ki;
ka Heshbon ka la jot noh
haduh Dibon,
bad ngi la pynjot noh
ïa ki
haduh Nophah kaba kot
haduh Medeba.”
Ki Israel ki jop ïa u Og u syiem jong ka Bashan
(Deu. 3:1-11)
31Kumta, ki Israel ki la shong sah ha ka ri ki Amor. 32Te u Moses u la phah jngoh ïa ka Jaser, bad ki la ïajop ïa ki shnong rit jong ka, bad ki la beh noh ïa kita ki Amor kiba la don hangta. 33#Deu. 3:1-7.Te ki la ïaphai noh, bad ki la leit da ka lynti Bashan: te u Og u syiem jong ka Bashan u la mih noh, haduh Edrei, ma u bad ki briew jong u baroh, ban ïaleh thma ïa ki. 34Bad U Trai u la ong ha u Moses, “To wat sheptieng ïa u: naba ha ka kti jong me nga la aiti ïa u, bad ïa ki briew jong u baroh, bad ïa ka khyndew jong u; te men leh ïa u kumba me la leh ïa u Sihon u syiem ki Amor, uba la shong sah ha Heshbon.” 35Kumta, ki la shoh ïap ïa u, bad ïa ki khun shynrang jong u, bad ïa ki briew jong u baroh, haduh ba ym shym la iehnoh sah wat uwei ruh em: ki la shimti ruh ïa ka khyndew jong u.
Currently Selected:
JINGKHEIÑ 21: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
