JINGKHEIÑ 20
20
Ka um dih na u mawsiang
(Eks. 17:1-7)
1Te ki khun Israel, kata, u paidlang baroh, ki la ïawan poi ha ka ri khlaw Sin ha u bnai u banyngkong: bad uta u paidbah u la shong sah ha Kadesh; hangta ruh ka la ïap ka Miriam, bad hangta la tep ïa ka.
2 #
Eks. 17:2-7. Bad ym shym la don um ïa uta u paidlang: bad ki la ïalum lang ban ïaleh pyrshah ïa u Moses, bad ïa u Aaron. 3Kita ki briew ruh ki la ïakren sngewsih ïa u Moses, bad ki la ïathuh, ki la ong, “A ban da ngi la lah ïap noh mynba ki para jong ngi ki la ïap noh ha khmat U Trai! 4Balei ruh phi la ïalam ïa u paidlang U Trai sha kane ka ri khlaw, ba ngin ïap ha ka, lem bad ki jingri jong ngi? 5Balei ruh ba phi la pynmih artet ïa ngi na ka ri Ijipt, ban ïalam ïa ngi sha kane ka jaka ka basniew? ka jaka khlem symbai, khlem soh Dumbur, khlem soh Waiñ, bad khlem soh Pong; ka um ban dih ruh ym don.” 6Te u Moses, bad u Aaron, ki la leit noh na khmat uta u paidlang sha ka jingkhang Ka Tabernakl ka jingïaseng, bad ki la hap dem ruh la ki khmat: te ka burom U Trai ka la paw ha ki. 7U Trai ruh u la kren ha u Moses, u da ong, 8“To shim ïa uta u diengduh, to lum lang ruh ïa uta u paidlang, ma me, bad u Aaron u para jong me, to kren ruh ha uta u mawsiang ha khmat jong ki, te un ai noh ïa ka um jong u; bad to pynmih noh ma me ruh ha ki, ïa ka um na uta u mawsiang: kumta men ai dih ha uta u paidlang, bad ha ki jingri jong ki de.” 9Te u Moses u la shim ïa uta u diengduh na khmat U Trai, kumba u la hukum ïa u.
10U Moses te, bad u Aaron, ki la ïalum lang ïa uta u paidlang ha khmat uta u mawsiang, bad u la ong ha ki, “To sngap mynta, phi ki nongïaleh pyrshah; ka long ne em ba ngin pynmih um ha phi na une u mawsiang?” 11U Moses ruh u la rah ïa la ka kti, bad da uta u diengduh jong u, u la shoh ar sien ïa uta u mawsiang: bad ka la mih noh shibun ka um, te uta u paidlang u la dih, bad ki jingri jong ki de. 12Bad U Trai u la kren ha u Moses, bad ha u Aaron, “Namar ba phim shym la ngeit ïa nga, ïa ka ban pyndonburom ïa nga ha khmat ki khun Israel, namar kata keiñ, phin ym ïoh ïalam ïa une u paidlang sha kata ka ri ïa kaba nga la ai ha ki.” 13Kane long ka um Meribah: naba ki khun Israel ki la ïaleh ïa U Trai, bad la pyndonburom ïa U ha ki.
U syiem Edom um shah ïa ki Israel ban ïaid lynti lyngba ka ri jong u
14Te u Moses u la phah ïa ki nongkit-ktien na Kadesh sha u syiem ka Edom, da kaba ong, “Kumne u ong u Israel u para jong me, ‘Me tip ïa ka jingjynjar baroh ïa kaba la jia ha ngi: 15kumno ba ki kpa jong ngi ki la leit hiar ha ka ri Ijipt, bad ba ngi la shong sah ha ka ri Ijipt kham slem; ki Ijipt ruh ki la pynshitom ïa ngi, bad ïa ki kpa jong ngi; 16bad haba ngi la kyang duwai ha U Trai, u la shahshkor ïa ka ktien jong ngi, bad u la phah ruh ïa u angel jong u, bad u la pynmih noh ïa ngi na kata ka ri Ijipt: te ha khmih, ngi don ha Kadesh, ka shnong ha ka bakut ka pud jong me:’ 17nga duwai ïa me, ‘To shah ïa ngi ban ïaid lyngba ïa ka ri jong me: ngin ym ïaid lyngba ïa ki lyngkha, lane lyngba ïa ki brisoh Waiñ, lymne ngin ym dih ruh na ka um jong ki pukri: ngin ïaid na ka lynti bah jong u syiem, ngin ym phai sha kamon lane sha kadiang, tad ynda ngi la lait na ki pud jong me.’ ” 18Te u Edom u la ong ha u, “Wat wan ïaid hajan jong nga, ba ïoh ngan wan ïaleh ïa me da ka waitlam.” 19Te ki khun Israel ki la ong ha u, “Ngin leit kiew da ka lynti bah, bad lada ma nga, lane ki jingri jong nga, ngin dih na ka um jong me, ngan siew ïa ka dor jong ka: ngan tang shu ïaid lyngba da la ki kjat, khlem da leh ei ei ruh em.” 20U te u la ong, “Men ym ïoh leit lyngba.” U Edom ruh u la wan mih ïaleh ïa u da shibun u paidbah, bad da ka kti kaba donbor. 21Kumne, u Edom um treh ban ai lynti ïa u Israel lyngba ka ri jong u: kumta u Israel u la phai noh na u.
U Aaron u ïap ha u lum Hor
22Te ki khun Israel, kata, uta u paidlang baroh, ki la ïaid na Kadesh: bad ki la wan poi sha u lum Hor. 23Bad U Trai u la kren ha u Moses, bad u Aaron, ha u lum Hor, harud ka ri Edom, u da ong, 24“Ïa u Aaron yn ïalum lang sha ki briew jong u: naba un ym ïoh leit sha kata ka ri ïa kaba nga la ai ha ki khun Israel, namar phim shym la kohnguh ïa ka ktien jong nga ha kata ka um Meribah. 25#Jkñ. 33:38,39.To shim ïa u Aaron, bad ïa u Eleasar u khun jong u, to wallam artet ruh ïa ki sha u lum Hor: 26te men loit noh ïa ki jaiñ jong u na u Aaron, bad men pynphong ruh ïa ki ha u Eleasar u khun jong u: te ïa u Aaron yn ïalum lang sha ki briew jong u, hangta ruh un ïap.” 27Te u Moses u la leh kumba u la hukum U Trai: bad ki la ïaleit kiew sha uta u lum Hor ha khmat uta u paidlang baroh. 28#Jkñ. 33:38; Deu. 10:6.Bad u Moses u la loit noh na u Aaron ïa ki jaiñ jong u, bad u la pynphong ïa ki ha u Eleasar u khun jong u; bad u Aaron u la ïap hangta ha khlieh uta u lum: te u Moses bad u Eleasar ki la ïahiar noh na uta u lum. 29Te haba uta u paidlang baroh u la ïohi ba u la ïap u Aaron, ka ïing ki khun Israel baroh, ki la ïambriew ïa u Aaron, laiphew sngi.
Currently Selected:
JINGKHEIÑ 20: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
