JINGKHEIÑ 22
22
U Balak u phah ktien ïa u Balaam
1 #
Jkñ. 33:48. Te ki khun Israel ki la ïaid noh, bad ki la ïashong dara ha ki pyntha jong u Moab, harud ka Jordan kaba shaphang shane marpyrshah ka Jerikho. 2Bad u Balak u khun u Sippor, u la ïohi ïa kiei kiei baroh ïa kiba ki la leh ki Israel ïa ki Amor. 3Te ki Moab ki la sheptieng eh ïa ki briew, naba ki la bun: bad ki la khuslai eh ki Moab namar ki khun Israel. 4Bad ki Moab ki la ong ha ki tymmen ki san ki Midian, “Mynta une u paidlang un jliah noh ïa kiei kiei baroh kat kiba don baroh sawdong ïa ngi, kumba u jliah noh u masi ïa u phlang jong ka khyndew.” Te u Balak u khun u Sippor, u la long u syiem ki Moab ha kata ka por. 5Te u la phah ïa ki nonglam-ktien ha u Balaam u khun u Beor, sha Pethor, kaba hajan kata ka wah, ha ka ri ki khun ki briew jong u, ïa ka ban khot ïa u, u da ong, “Ha khmih, don u paidbah byllien uba la mih noh na Ijipt; ha khmih, ki ïatap lin ïa ka khmat ka pyrthei, bad ki ïashong ruh ha marpyrshah ïa nga: 6Namar kata te, nga kyrpad ïa me, to wan mynta, to tim ïa une u paidbah na ka bynta jong nga; namar ki kham khraw bor ïa nga: toi lehse ngan da lah ïa ka ban jop noh ïa ki, bad ban beh noh ïa ki na kane ka ri: namar nga tip, ba ïa uta uba men kyrkhu ma me, un long ba la kyrkhu, bad ïa uta uba men tim ma me, un long ba la tim keiñ.”
7Te kita ki tymmen ki san ki Moab bad ki tymmen ki san ki Midian, ki la ïamih noh bad ka bainong khan ha la ki kti; bad ki la wan poi ha u Balaam, bad ki la ïathuh ruh ha u, ïa ki ktien jong u Balak. 8U te u la ong ha ki, “To thiah basa hangne mynta ka miet, te ngan phai ktien ha phi kat kumba un kren U Trai ha nga:” bad kita ki rangbah ki Moab ki la ïashong bad u Balaam. 9Te U Blei u la wan ha u Balaam, bad U la ong, “Kiei kine ki briew kiba don bad me?” 10Te u Balaam u la ong ha U Blei, “U Balak u khun u Sippor u syiem ki Moab, u la phah ktien ha nga, u da ong, 11‘Ha khmih, don u paidbah byllien uba la mih noh na ka ri Ijipt, uba tap lin ïa ka khmat ka pyrthei: to wan mynta te, to tim ïa ki na ka bynta jong nga; toi lehse ngan da lah ïa ka ban jop ïa ki, bad ban beh noh ïa ki.’ ” 12U Blei te u la ong ha u Balaam, “Me wat leit ryngkat bad ki; lymne wat tim ïa uta u paidbah: naba u long ba la kyrkhu.” 13Bad u Balaam u la khie mynstep, bad u la ong ha kita ki rangbah u Balak, “To khie leit sha la ka ri: naba U Trai um shah ïa nga ban leit ryngkat bad phi.” 14Te kita ki rangbah ki Moab ki ïakhie joit, bad ki la leit wan noh sha u Balak, ki la ong ruh, “U Balaam um treh ban wan ryngkat bad ngi.”
15Bad u Balak u la phah pat ïa ki rangbah kham bun, bad kiba kham donburom ban ïa kita kiwei. 16Bad ki la ïawan poi ha u Balaam, ki la ong ruh ha u, “Kumne u ong u Balak u khun u Sippor, ‘Nga kyrpad ïa me, to wat shah ei ei ruh em da lei lei ban pynpep ïa me ban wan sha nga: 17namar ngan pynkyntiew ïa me sha ka burom ka bakhraw eh, bad ïa kiei kiei baroh kat kiba men ong ha nga, ngan leh: namar kata, nga kyrpad ïa me, to wan, to da tim noh ruh ïa kine ki briew na ka bynta jong nga.’ ” 18Te u Balaam u la ïathuh, bad u la ong ha ki shakri u Balak, “Lada u Balak un ai ha nga ka rupa, bad ka ksiar, kat ban pyndap ïa ka ïing jong u, ngam lah leit palat ïa ka ktien U Trai uba U Blei jong nga, ïa ka ban leh ka barit, ne ka bakhraw keiñ. 19Hynrei, nga kyrpad ïa phi, to sah ma phi ruh hangne mynta ka miet, ba ngan ïoh tip U Trai un ong aïu shuh ha nga.” 20Te U Blei u la wan ha u Balaam mynmiet, bad U la ong ha u, “Lada ki la wan khot ïa me kine ki briew, to khie, to leit ruh lem bad ki; hynrei, pynban, ïa kata ka ktien ïa kaba ngan ïathuh ha me, ïa kata hi men leh keiñ.”
U angel bad ka kadda u Balaam
21Te u Balaam u la khie dang step, bad u la teh jin halor ka kadda jong u, bad u la leit lem bad kita ki rangbah ki Moab. 22Te ka jingbitar U Blei ka la meh namar ba u la leit: bad u angel U Trai u la ïeng ïaleh ïa u ha lynti. Te u la shong halor la ka kadda, bad ar ngut ki shakri jong u, lem bad u. 23Bad kata ka kadda ka la ïohi ïa u angel U Trai ba u da ïeng ha kata ka lynti, bad ba u da don la ka waitlam ba la sei ha ka kti jong u: te ka kadda ka la kiar noh na kata ka lynti, bad ka la leit sha ka lyngkha: te u Balaam u la shoh ïa ka kadda ban pynphai ïa ka sha ka lynti. 24Hynrei, uta u angel U Trai u la ïeng ha ka lynti ki brisoh Waiñ, ha kaba don ka kynroh baroh ar liang. 25Te haba ka kadda ka la ïohi ïa uta u angel U Trai, ka la kyntur ïa lade sha kata ka kynroh, bad ka la ban eh ïa ka sla'jat jong u Balaam ha kata ka kynroh: te u la shoh pat ïa ka. 26Bad uta u angel U Trai u la leit kham jngai, bad u la ïeng ha ka jaka kaba khim, ha kaba ym don jaka ban phai, lymne sha kamon, lymne sha kadiang. 27Te haba ka kadda ka la ïohi pat ïa uta u angel U Trai, ka la dem khop hapoh u Balaam: bad ka jingbitar u Balaam ka la khie lep, bad u la shoh ïa ka kadda da u diengduh. 28Bad U Trai u la plie ïa ka shyntur kata ka kadda, ka te ka la ong ha u Balaam, “Nga la leh aïu ïa me ba me la shoh ïa nga kumne lai sien?” 29Te u Balaam u la ong ha ka kadda, “Namar ba pha la lehbeiñ ïa nga: A ban da don ka waitlam ha ka kti jong nga, ba kumta ngan da pom ïap ïa pha mynta.” 30Kata ka kadda te ka la ong ha u Balaam, “Ngam dei ka kadda jong me, halor kaba me la ju shong naduh ba nga la long ka jong me, haduh mynta? Nga la ju leh kumne ïa me mynno mynno ruh ne em?” U te u la ong, “Em.”
31Te U Trai u la pynpeit ïa ka khmat u Balaam, bad u la ïohi ïa uta u angel U Trai ba u da ïeng ha kata ka lynti, ba u da don ruh ka waitlam ba la sei ha ka kti jong u: te u la dem ïa la ka khlieh, u la dem ngon ruh. 32Bad uta u angel U Trai u ong ha u, “Balei ba me la shoh ïa la ka kadda kine lai sien? Ha khmih, nga la mih noh ban long u nongïaleh ïa me, namar kane ka lynti jong me ka long kaba mutlop ha khmat jong nga: 33te kata ka kadda ka la ïohi ïa nga, bad ka la kiar noh na nga kine lai sien: lymda ka la lah kiar noh na nga, shisha mynta nga la lah pynïap noh ïa me, bad nga la ri pynim ïa ka.” 34Bad u Balaam u la ong ha uta u angel U Trai, “Nga la leh pop; naba ngam shym tip ba me la ïeng ïaleh pyrshah ïa nga ha kata ka lynti: te mynta, lada ka long ka basniew ha khmat jong me, ngan leit phai noh pat keiñ.” 35Te uta u angel U Trai u la ong ha u Balaam, “To khie leit bad kine ki briew: hynrei, ïa kata ka ktien ïa kaba ngan kren ha me, tang ïa kata men kren.” Kumta, u Balaam u la leit lem bad ki rangbah u Balak.
U Balak u pdiang sngewbha ïa u Balaam
36Te haba u Balak u la ïohsngew ba u la wan u Balaam, u la leit tan ïa u haduh ka nongbah u Moab, kaba harud Arnon, kaba ha ka bakut eh ka pud. 37Bad u Balak u la ong ha u Balaam, “Nga shisha ngam shym la phah khot eh ïa me? te na ka balei mem shym la wan ha nga? nga don bor ne em ban kyntiew burom ïa me?” 38U Balaam te u la ïathuh ha u Balak, “Ha khmih, nga la wan ha me: hynrei, nga hi, nga don bor aïu mynta ban ong ei ei ruh? Ïa kata ka ktien ïa kaba U Blei un buh ha ka shyntur jong nga, ïa kata ngan kren keiñ.” 39Bad u Balaam u leit ryngkat bad u Balak, bad ki la poi ha Kirjath-husoth. 40Te u Balak u la pynïap ïa ki masi dab, bad ïa ki langbrot, u la phah ai ruh ha u Balaam, bad ha kita ki rangbah kiba don lem bad u.
41Ka la jia ruh ha kaba lashai, ba u Balak u la shim ïa u Balaam, bad u la ïalam ïa u sha ki jaka kyntang bajrong u Baal, bad nangta u lah ban ïohi ïa ka bakut eh jong uta u paidbah.
Currently Selected:
JINGKHEIÑ 22: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
